Editoriale

Vìvare ne la gioia
Co tuto el turbio che ghe xe in giro, che sia possìbile recuperare un fià de serenità e no vìvare senpre te'l pessimismo pi nero?

Vìvare ne la gioia... par no deventare de piera, fredi come na statua (inper. Caracalla, 211-217 d.C.).

Un bel problema, questo de la contenteza! Ma, proprio parché xe pi fàssile inroscarse, velenarse el sangue e rabiarse pitosto che rasserenarse, xe necessario roersare la pegnata e lucidarghe el fondo par speciarse e védare quanto xe bruto vìvare senpre col magon e col muso longo.
Fato questo, vardemo in sù, anca se xe nùvolo: el cielo xe de tuti e in qualche canton ghe xe la feta che semo paroni noaltri. Na conbina de orizonte, dove Qualchedun ga semenà la nostra bona stela, un fiore che tante volte el resta là e el va in galon parché, no conosséndolo, lo lassemo 'ndove che'l xe.
No ghe xe gnente de pi umano e de pi naturale che quela de èssare sereni, de èssare in pace, de sentirse contenti e tranquili. E no ghe xe gnente de pi stùpido che córarghe drio ai sogni inpossìbili. Forse ghemo vudo tuti na bruta scola, dove ghemo inparà a moltiplicare i desideri, a fare la soma de i traguardi mai vinti, a deventare paroni de robe… che se toca, che, da sole, no le darà mai la felicità.
Forse ga proprio reson Seneca che'l ga dito che "L'uomo più felice è quello che non ha bisogno della felicità". In altre parole, tuto sta nel sentirse contenti de quelo che se ga e nel darghe un peso e un significato a quelo che se ga. El segreto de la felicità el sta proprio qua: nel darghe inportanza e nel darghe valore a quelo che za gavemo. Quando uno el xe malà, no so cossa che'l darìa par star ben (e èssare, quindi, felice). Ma, apena che'l sta ben, el se desméntega del valore de la salute riaquistà e el taca a danarse l'ànima drioghe a robe che no'l ga. Xe pi che normale avere desideri e aspirazion, solo che ghe vole un giusto equilibrio tra quelo che se xe e quelo che se ga.
In fondo, xe pi fadiga córarghe drio a na farfala che stare lì sentà e lassare che la sia ela a girarte 'torno e magari posarse su de ti… credéndote un fiore foresto! A dire la verità, no so gnanca mi parcossa go tacà a tirar fora sti discorsi. Qualchedun dirà che'l xe tenpo perso; mi invesse digo che xe mèjo parlàrghene de ste robe, parché xe solo inpizando un fogo che xe possìbile scaldarse. E tuti ghemo bisogno de scaldarse davanti al fogo de na serena riflession sul modo de vìvare ne la gioia.
Cussì, ragionàndoghe sora, se pol capire che xe vero che de'e volte se gira el mondo in zerca de un fià de pace e, dopo, te te inacorzi che te la ghevi te la porta de casa! Questo ne fa dire che no xe vero che la gioia, la felicità no la esiste: forse semo noaltri che la zerchemo te'l posto sbalià!
'Desso semo in Carnevale: un tenpo de alegrìa, de spensieratessa, un tenpo senza règole e pien de libertà. Anca questa la xe na forma de benstare, de serena esistenza: solo che la dura poco, parché la vien da robe che no dura!
A dura tanto de pi: el ricordo del ben fato ai altri; l'aiuto dà a chi ga bisogno; l'òpera de socorso portà là dove se ga roversà la pegnata de le disgrazie; el proprio dovere fato con amore e senza brontolare; el regalo fato senza spetarse che'l vègna ricanbià; el soriso regalà a chi ne stà intorno o na careza a chi la speta da un tòco; na bona siera verso chi ga manco talenti o manco cultura de noaltri...
Quante robe bele che se pol fare in sto mondo, anca se'l xe pien de ingani e de trabuchèi. E in sto modo vìvare ne la gioia e non far morire el seme de la felicità che ghe xe nel core de ogni omo.

[torna sopra]

Dal nùmaro de Febraro:
Editoriale
Vìvare ne la gioia.
Co tuto el turbio che ghe xe in giro, che sia possìbile recuperare un fià de serenità e no vìvare senpre te'l pessimismo pi nero?
de Mario Klein
[torna sopra]

El pan: l'oro de i pòpoli
Le me esperiense de putèo a fare el pan. La so storia infinita da la note de i tenpi. Sìnbolo de unità familiare, de amore e de fecondità. El durarà fin a la fine de l'omo.
de Gigi Vasoin
[torna sopra]

Cronache dialettali
(Q.C. XVIII N. 12 - DISSENBRE 2000).
di Manlio Cortelazzo
[torna sopra]

None
Gente veneta
di M. Luisa Zilio Furin
[torna sopra]

Storia de do leoni
Robe de Ciósa
El leon de Ciósa, el leon de Cavàrsare. a cura de Angelo Padoan
[torna sopra]

Gastone Nuñez
Gente de Verona
On tesoro d'arte da visitar a San Pietro di Morubio: trédese tele par "Omaggio a Dio nostro Padre". de Lucia Beltrame Menini
[torna sopra]