Quatro Ciàcoe
Mensile de cultura e tradission vènete
de Gigi Vasoin

El pan: l'oro de i pòpoli
Le me esperiense de putèo a fare el pan. La so storia infinita da la note de i tenpi. Sìnbolo de unità familiare, de amore e de fecondità. El durarà fin a la fine de l'omo.

El venditore de pan. La stanpa xe de i primi del 1800, ma ghemo visto anca noialtri, prima de l'ultima guera, el fornaro co' la sesta sul careto o la bicicletta, saratuto in canpagna.

Xe vignù fora in 'sti giorni un libro gustoso "L'oro dei popoli" (Ed. La Garangola) de la Accademica de la Cucina Italiana Antonietta Broggi Mariacher co' 120 "ricette" par l'uso de'l pan in te la preparassion de antipasti, primi e secondi piati e dolsi. Le xe "ricette" sènplici ma complete e fàssili da fare. Se poe farle co' qualsiasi tipo de pan e le xe tute liziere che le va ben anca par putini e ansiani. El libro scominsia co' la presentassion de l'Accademico Nemo Cuoghi che nota le caraterìstiche de'l pan: re de la tola de i siori e de i povari, salvessa de la zente in te i momenti difìzili, modo de magnare in grande varietà de cotura e de gusto. Squasi ogni pàgina ga 'na "citazione" de persone cèlebri e 'na stanpa antica che se riferisse al pan, a la so preparassion e a la so vèndita.

El forno de pan in te 'na stanpa tedesca. Se vede che tuto el mondo gera alora, verso la metà del 1800, paese, come che el ghe xe 'desso.


In te'l libro ghe xe anca 'na "prefazione storica sul pane" scrita da mi. Quando che la Mariacher me ga domandà se ghe la scrivevo, so' stà tanto contento. E dirò parché! El pan me ga svejà un saco de ricordi mii e de la me fameja che xe inpossìbile desmentegare.
Basta savere che a l'àngolo fra via Altinate e via Eremitani ('desso ghe xe 'na farmacia), fra le do case de me Nono, esisteva un forno de pan. Me Nono gera un agricoltore co' canpagna a Carrara S. Giorgio e Carrara S. Stefano. Co' la so bravura e la so inissiativa el gaveva creà in te' le do strade tre boteghe: el forno de pan, come che go dito, la vèndita de vin, e quea de verdure. In gran parte i prodoti vigneva fora da le canpagne e alora saltava fora anca do sicuresse: la bontà de la merce el basso costo de la materia prima.
Me contava me Papà che, in te i giorni de festa o de vacanse, el Nono voleva che i tosi de casa provasse la esperiensa de lavorare el pan, dizendo che i doveva rèndarse conto de le fadighe de i fornari: alsarse tanto presto a la matina, sfadigare par l'inpasto, resìstare al caldo de'l forno. Me Papà e i fradèi lo faseva anca volentieri. Anca se i fosse stà contrari, no' ghe sarìa stà gnente da fare, parché queo che el Nono gaveva dito gera scrito. Parlando co' i fornari me Papà gera vignù a savere tanti particolari su'l pan e la so storia, particolari che lu me ga riferìo e che mi dopo gavarìa conpletà.
Ma el beo xe stà che, quando ghemo savudo questo, mi e me fradèo semo stà noialtri a domandarghe al Papà de 'ndare a la matina bonora zo a 'iutare i fornari e se divertìvimo un mondo, anca se ne tocava de alsarse a la matina co'l scuro proprio in te i giorni de festa o de vacansa. Gèrimo deventà amissi de i operai che gaveva visto co' sinpatìa 'sta disponibilità de i "paronsini" anca se ghemo capìo che i faseva de tuto par farne lavorare sì, ma schivando le fadighe più grosse e i perìcoli de la vicinansa co'l forno.
Par esenpio i ne faseva preparare la pasta par el pan dolze che gera poca e più liziera. Dio solo sa quante tentassion che go' vudo de fermare un bel bocon de pasta su'l deo ìndeze e ficàrmela in boca. Serto che, quando i fornari i ne dizeva che la gera pronta e che vedévimo dopo vigner fora da'l forno quee bee fugassete color maron scuro che lassava intorno un bon odore de vanilia, se sentìvimo orgoliosi de la nostra fadiga e ne faseva piassere ciapare i conplimenti de i operai.
"La legenda dize che mejari de ani fa l'homo sapiens ga scominsià a andare a cacia de bestie - ne ga contà el Papà - par far tàzare le buèe che brontolava e anca par covèrzarse el corpo de'l fredo. Po', andando in aqua, el se ga inacorto che ghe gera i pessi che, coti su'l fogo, gera boni e i spini de i pessi più grossi ghe serviva. Ma la so scoperta più importante xe stà quea che, vardàndose intorno el ga notà el canbio de le stagion e el canbio de la natura co' tuti i so fruti. E el xe deventà agricoltore. Da questo xe nate le prime pape e frìtole fate co' le semense".

El pan de i poareti. Da seno, un tenpo, ghe gera gran signore de l'aristocrassia o de la borghesìa che passava tante ore de la giornata a fare de'l ben.


El Papà gera partìo da distante, ma xe stà el Maestro che me ga dà le notissie più fondamentali su la lavorassion vera del pan: "La prima panificazione, dopo le esperienze precedenti sia con il frumento sia con il farro fatte dai cinesi che avevano svolto tali esperienze sulla base di tradizioni antichissime, venne effettuata dagli egiziani circa 4000 anni avanti Cristo, con la contenporanea scoperta anche del lievito. È già con gli Egiziani una panificazione raffinata che colpisce l'attenzione degli Ebrei rimasti schiavi dei Faraoni. È tale la loro attenzione che i loro discendenti, scappati con Mosè dall'Egitto e arrivati nella terra promessa, sviluppano la panificazione che, col tempo, è assimilata dai popoli del medio Oriente per arrivare fino in Grecia".
Altre notissie le go 'vude dal professore al Ginasio che me ga spiegà che i Romani ga inparà la fàbrica de'l pan invadendo la Macedonia e la ga portà in te la Roma republicana de alora. Sto tipo de magnare 'ndava ben co' i piati rafinati che i siori se preparava e che 'ndava ben anca pa' i poareti dato che el costava poco. In più le autorità republicane ga favorìo la fàbrica de'l pan par mezo de "cooperative" che se serviva de'l lavoro de i schiavi comandài a lavorare par 364 giorni a l'ano e de far vacansa un giorno solo, queo de la so festa. Lezendo serti libri par preparare i esami de dirito romano a l'università, go scoperto che i Romani de'l periodo republican e de queo inperiale, gaveva tanti tipi de pan. "Panis candidus, panis cibarius, panis plebeus, panis durus ac sordidus, panis ruvidus, panis militaris, panis nauticus", tuta 'na varietà che fa capire la inportansa che 'l pan ga ciapà in te la Roma antica. A provare questo, ghe xe anca tanti resti "archeologici". I Romani ga portà el pan in tuta Europa, ma co "la caduta dell'Impero Romano di occidente" la fàbrica pùblica del pan se riduze de tanto e torna a farlo in grande i fogolari de casa.
In te le me leture fate co'l córare de i ani go savudo su'l pan tante altre robe. Par esenpio, xe in te'l Medio Evo che la fàbrica de'l pan, fata soratuto in te le fameje, vien a avere el caràtere de un dono divino e de unità "domestica" davanti a la disperassion de i pòpoli par colpa de le lote e de le guere che ga devastà quel mondo. In 'sto periodo nasse su'l pan 'na infinità de legende soratuto come sìnbolo de l'amore e de la fecondità.

Palazzo della Ragione, Padova: "Scena del mese di Marzo" (partic.). Illustrassion trate da "L'oro dei popoli" (La Garangola - PD).


A Padova el grande siensiato de medissina e professor de l'Università, Michele Savonarola, nato in sità in te la via che porta el nome de la so fameja, esalta la utilità "dietetica" de'l pan co' le parole de'l so "Libreto de tute le cosse che se manzano" scrito verso la fine de'l 1300, par no' parlare po' de Angelo Beolco, el nostro Ruzante, che in te la so "oratione " al Cardinale Cornaro al Barco de Altivole, parlando de la "straordinarietà" de Padova e de'l so teritorio e de i so prodoti, el canta la bontà de tre tipi, de'l "pan scafetò" (co la molena candida e la crosta crocante); de'l "pan bufeto" (biscoto) e del comune "pan de frare" (de i frati).
Ma col Ruzante semo za in pien Rinascimento, quando che torna in voga la fàbrica pùblica de'l pan e la scoperta de i primi machinari par inpastarlo. Ormai el pan xe, cussì come lo conossemo noialtri, sparpalià in tuto el mondo civile, anca se in te i paesi poareti i continua ancora a stritolare el formento, el faro, el formenton fra do piere e a cusinarghe de sora la farina.
Tuto el resto lo savemo e praticamente lo gavemo davanti ai oci, ma, prima de finire, vorìa dire che'l pan xe uno de i pochìssimi "alimenti comuni" in tuto el mondo e che el finirà co la fine de l'omo. Pensare soratuto che Gesù Cristo lo gà divinamente portà come trasformassion de'l propio corpo.


[torna sopra]

 

Archivio
2022 21 20 19 18 17 16 15 14 13 12 11 10 9 8 7 6 5 4 3 2 1  
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Genaro
Dissenbre
Novenbre
Otobre
Lujo-Agosto
Giugno
Majo
Aprile
Marso
Febraro

Dal nùmaro de Febraro:
Editoriale
Leggi l'Editoriale Vìvare ne la gioia.
Co tuto el turbio che ghe xe in giro, che sia possìbile recuperare un fià de serenità e no vìvare senpre te'l pessimismo pi nero?
de Mario Klein
[torna sopra]

El pan: l'oro de i pòpoli
Leggi l'articolo Le me esperiense de putèo a fare el pan. La so storia infinita da la note de i tenpi. Sìnbolo de unità familiare, de amore e de fecondità. El durarà fin a la fine de l'omo.
de Gigi Vasoin
[torna sopra]

Cronache dialettali
Leggi l'articolo (Q.C. XVIII N. 12 - DISSENBRE 2000).
di Manlio Cortelazzo
[torna sopra]

None
Leggi l'articolo Gente veneta
di M. Luisa Zilio Furin
[torna sopra]

Storia de do leoni
Leggi l'articolo Robe de Ciósa
El leon de Ciósa, el leon de Cavàrsare. a cura de Angelo Padoan
[torna sopra]

Gastone Nuñez
Leggi l'articolo Gente de Verona
On tesoro d'arte da visitar a San Pietro di Morubio: trédese tele par "Omaggio a Dio nostro Padre". de Lucia Beltrame Menini
[torna sopra]