Editoriale

Ma parché senpre copare?
Cossa xela sta pìcola guera quotidiana che arma na man sassina, che pròvoca terore tra la gente de bona volontà?

Uccisione di Abele, mosaico, sèc. XII, Monrelae.

Possìbile che la storia umana la gabia senpre tra i piè on Caino pronto a copare el fradelo, pìcolo o grande che'l sia?
Saremo stà anca perdonà, grazie al sacrificio de Cristo, ma mi me sa che semo 'ncora drio scontare la pena pa'l pecato originale! No xe possìbile che no passa giorno che no'l sia funestà da disgrazie volontarie capità par man de omo, che no ghe sia giorno insanguanà da la eliminazion fìsica de persone, nel nome de chissà quale maledeta filosofìa de morte, che ga fato gramegna te na testa da portare in procession quando tenpesta!
No passa luna senza dover piànzare na morte violenta, senza doverse fare el sangue maro sentendo notizia de on delito orendo! El xe on malstare continuo, on ciodo fisso che te dà dolore. A te te senti come tre róe te on caro! E no te poi far de manco de pensare, de rajonarghe sù, de parlàrghene, maravejà che no se possa catarghe rimedio. Varda, seto, che condana che ghemo da 'vere!
Le xe robe che te te senti vegnere el convulso ogni volta che le te vien in mente. E ogni volta, drento de ti, te senti calcossa che se ribela, che rifiuta e condana on sìmile conportamento degno de bestie, non de òmeni che ga anca el corajo de sbandierare on ideale, fasendo tuto da viliachi, de scondon, sti desgrazià in te la testa!
I meritarìa sì de fare la fine de le so vìtime, ma no se pole èssare moltoni come lori. Se spera solo che la giustizia la ciapa sti Caino e la faga valere le règole de la convivenza civile. I ghe scaparà a la giustizia de tera, ma non de certo a quela divina!
Chi, come ne i casi de sti giorni, riva a copare, credo che el lo fassa parché el sa de 'vere perso in partenza la so batalia de la vita: el xe on perdente; i pensieri de la so ànima i xe trasparenti cofà on sfòjo de tajadele tirà on fià massa co la méscola, e i nóa t'on brodo de odio e de paura. Co la crudeltà de Caino no se ragiona: la mira solo a eliminare quelo che la ritien on ostàcolo, no la amete diàlogo, acordo, discussion, canbio merce. Copare e basta, come se'l fusse on conejo, poarin anca quelo!
On vecio proverbio el diséa: "Corajo chè 'l male l'è de passajo". L'è de passajo come tuto e come tuti. Ma intanto me pare che la mama de i delinquenti la sia senpre piena (gravida)!
Cossa fare a sto punto? Maravejarse, star male e basta? O xe el caso de interogarse su cossa xe che arma la man omicida, cossa xe che fa smarzire i pensieri te ste teste de piopa? Ognuno sarà lìbero de tentare na risposta, lìbero anca de torse na parte de responsabilità - nessun xe perfeto -, lìbero de pensare che anca le parole le pole trasformarse in armi che copa, lìbero de ritegnere che no se pole condanare soltanto la violenza de l'omicidio, ma che ocore anca condanare l'esaltazion de la violenza ne i film e in tuto quelo che fa scola, camufà da passatenpo o da cultura.
Che Dio ne la manda bona!

[torna sopra]