|
Da Adria (RO)
Grassi duri 'fa i fighi
Te vedi sti bocia par la strada e la stragrande magioransa i è tuti int'el sgionfadelo: bei tondi cofà i balunsiti, ciciotèi come de i porseleti a l'ingrasso e so mare che la ga senpre paura ch'i patissa. Intanto luri i manda zo pop-corn (nantri ghe ciamàvino galiti, có s'i fasìvino inte la padela co' dessora un covercio parché no i saltesse par tuta la cusina), patatine, merendine, crechers, gelati, pastine e altri golosessi del gènere. Me ricordo i mi ùltimi ani de mestro: có finiva la ricreassion ghe jera i sestini colmi de tòchi de biscotini, de meze merendine con la cicolata, co' la crema, co' le màndole, ciupa-ciupa 'pena licà, caramele ciucià e spudà fora; tuto a la facia de la "fame nel mondo". Nantri, a chel'età lì, co' la guera 'pena fenì, jèrimo tuti grassi duri 'fa i fighi, co' d'i lachiti come quii d'i sàltari, par cuntare le coste bastava méterse contro sole! E par forsa! Le nostre merendine le jera (có le gh'jera!): patate mericane, panin co' la marmelata o co'l salame (par quii ch'i lo gaveva), na ciopeta de pan seco e, pitosto spesso, un bel da gninte. I golosessi i ne tocava, se l'andaseva ben, na volta a la setimana: có vegnìvino fora da messa o da dutrina, co' la nostra manceta in scarsela, andasìvino in piassa, soto i pòrteghi, da la Stela Pagana a torse la fava luìna, el pomo co'l caramelo, le carate o na naransa (dal '43 al '45 gnanca quela!). Se zo de ora a ne vegneva el buseto int'el stómego, dentro la credensa no catàvino gran che: un tòco de pan moro, na feta de polenta freda, qualche fruto - de le volte le jera croladure col so bel bigatin dentro -, suca, patate mericane lesse, qualche volta se podeva intivare na fetina de mortadela (ch'a ne se saveva co' che carne che la fusse stà fata); quelo jera!, e fortuna chi ch'a gh'in eva.
Mi m'à senpre fato da rìdere có se lesevo che Pinochio prima l'à magnà el pero e dopo le péle, parché nantri piri o pumi a i emo senpre magnà a morsegoti co' pèle e tuto, al màssimo na strosadina s'un gunbio e via. E i àmuli zerbi? El jera el sport più comune in primavera: dove ch'a gh'jera amolari abordàbili se podeva senpre catare do guardiani: el paron de là da passaja e quache bocia de qua; el primo tendeva el secondo e 'l secondo tendeva el primo!
Có 'l paron girava l'ocio i àmuli i cascava su la strada, senpre al de qua de la sieve. Ma anca bisi, fava, sarese, pèrseghi, ua, pumi, piri e fighi a cadeva ch'i no fusse massa tacà a la strada: gh'jera senpre man pronte a sunare indove che no le aveva semenà. Jera squasi inpossìbile catare boche melesie: tuti i magnava de tuto, anche a ris-cio de qualche mal de pansa. A tola no gh'jera tanto da giondare, el fasolo el jera el re de la cusina: minestra de fasòi, fasòi in tocio, fasòi in potacin, fasòi cunsi, fasòi sfritegà; e po' le patate : lesse, roste, frite, cunse, soto la sénare; e le verdure (che alora le jera solo de stagion) ; el pésse: quelo pescà in canale, o sinò i gànbari del ganbararo e le rane del ranaro. La carne? Ogni morte de Papa.
Me ricordo che có 'ndavo a l'Asilo Gregnanin i me daseva risi e vérze, ma a casa mia no volevo risi e capussi, che no i me piaseva! E alora mi mama la me diseva: "E s'a no ghe fusse proprio altro?" "Prima a pianzo - a ghe rispondevo mi - e dopo a li magno." La sera, specialmente par nantri bocia, el jera cafelate e pan. Mi me piaseva da mati el late con la polenta: late da na stala vissina, 'pena munto e po' buì - ch'el faseva chela bela pèle zala dessora - e polenta calda, brustolà su i serci de la cusina. Na volta, me ricordo come s'a fusse 'desso, vien in casa na mamana par farghe na puntura a mi mama; mi ò 'pena scuminsià la mi scudela de polenta e late, intanto ela la prepara la siringa, el coton, l'alcol; mi scuminsio a mandar zo i mi boconi. A un serto punto la se ferma, la me varda: a so' tuto rosso e da la fronte a scuminsia a colar zo qualche riga de sudore. "Varda come ch'el magna de gusto chel bocia!" fa ela. E mi, deventà ancora più rosso int'el sentirme i oci adosso, ò fondà ancora de più el sculiero int'el mi late de bojo, godéndomelo come s'el fusse stà anbrosia.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Lujo-Agosto:
Editoriale
Dài, cóntame calcossa de belo!
Massa crònaca "nera", massa notizie che fa scareze su le pàgine de i nostri giornài. Informare vol dire par forza spaventare?
de Mario Klein
Sbiansi de sagessa popolare
Segantini in fusara
Da un s-ciapo de sgualdrinote in bela vista xe vegnùo fora el spunto par rivisitare na squadra de segantini in fusara
de Dinerio
Cultura in provincia
Quando la moda xe... fata in casa
Organisà dal Comune de Campodarsego, a do passi da Padova, na insòlita sfilata de moda, che ga fato cultura, tradission... e divertimento
de Luigi Perini
|
