Cultura in provincia

Quando la moda xe... fata in casa
Organisà dal Comune de Campodarsego, a do passi da Padova, na insòlita sfilata de moda, che ga fato cultura, tradission... e divertimento

Eco qua: moda, modele e modei par tute e de tute le età. (foto LuPe)

La manifestassion, fata soto le stele, davanti al Municipio, ga avù da la sua la clemensa del tenpo in sta primavera burascosa: na sfilata un poco fora de l'ordinario, parché la mostrava la bona maniera de vestirse par tute le età, da i più pìcoli fin a le signore bastansa mature, e a la moda de la spiagia de tute le generassion. La xe stà na corsa lungo el viale de la giovinessa, ma quelo che xe belo, curioso e straordinario xe che tute le modele e i modèi, pìcoli e grandi, zóvani e de mèsa età, le xe stà tute persone del posto: che fior de putele e che grassia e elegansa de portamento, e che disinvoltura, come che se tratasse de professioniste!
El pùblico, numerosìssimo, ga seguìo con entusiasmo le varie presentassion de i àbiti, oferti in vision da le dite specialisà de la zona, ben reclamisà dal sig. Ortensio Capriotti; ma chi che se ga divertìo più de tuti xe stà el Sìndaco, prof.sa Paola Candiotto, conpagnà dal so Assessore, Adriana Zannoni, a la quale va el mèrito de aver organisà l'evento. Evento che xe finìo, come tute le sfilate che se rispeta, co i àbiti da sposa, ma che ga messo in meso anca ricordi de la moda del primo Novessento. Infati, a un serto momento eco rivare na automòbile d'època da la quale vien zo el sior Agostini co la so Adelina, vestìi ano 1919; e'ncora eco sfilare Franca e Renato Toto in abiti 1930; eco toseti, putele e none co le vesti d'antan.

Passerela par tuti... e par tuti tanti aplausi e sinpatia. (foto LuPe)

Anca la poesìa ga 'vù el so momento, co la rècita de testi de la poetessa Camilla Baracco, fata da Simone Toffanin.
Bisogna dire che la fantasìa, messa al servissio de l'inteligenza, la pol ancora dare boni risultati. E se ga visto!

[torna sopra]