|
Editoriale
Riva setenbre: tuti a scola!
Se vèrze le scole... se vèrze el rubineto de i problemi.
Ogni giorno ghe ne nasse de novi, de stranbi... e de pericolosi
 |
| Le man de sti putèi le xe na risposta pi che inteligente a tante proposte de i adulti... (foto LuPe) |
Sto qua, forse, xe el problema pi serio pa 'l novo ano scolàstico. I recenti fati de Torin e de Milan mete in guardia sul perìcolo che la scola sta corendo, se dovesse ciapare piè sta novità. Pare che a Torin sia za in funzion de le classi de scola elementare pagà da genitori islàmici, con maestri islàmici che insegna solo materie in base ai programi del so Paese de provenienza. A Milan, el Licèo "Agnesi", dando segno de grande facilonerìa, ga studià de métare sù na classe par soli studenti islàmici, parché cussì ga deciso i genitori che no vole che so fiòi se insenbra co st'altri.
A go capìo: alora la parola "integrazion" la esiste solo par nialtri che, ben o male, a semo drio convìnzarse che el mondo el xe canbià, che bisogna èssare toleranti e solidali, che ocore inparare a convìvare anca con chi ga idèe, fede, religion e civiltà difarenti... Ma che raza de integrazion saréssela sta qua, se quei che xe stà costreti a vegnere qua da nialtri i se ciama fora e i vole fare tuto un discorso par conto soo?
Se podarìa capire che i genitori de sti putèi i domandesse che ghe fusse de le lezion integrative par mantegnere viva anca la cultura del Paese de orìgine! Diversamente, vorìa dire inpedire el dialogo e el confronto, favorendo inveze l'isolamento e la nàssita de separatismi e de muri ormai inconcepìbili!
Se no se parte da la scola a far créssare la civiltà de l'amore, de la dignità e de l'ugualianza universale, gavaremo perso in partenza la batalia del vero e civile progresso.
Xe proprio fasendo ste ìsole culturali, sti saraji de prepotenza e de intoleranza, che se favorisse la mentalità razista e fondamentalista!
Mi vedo che anca nialtri vèneti 'desso a semo drio recuperare la conossenza de la nostra storia, de la nostra cultura, lingua e tradizion, che ghìvino un fià perso de vista. Ma no lo femo mia creando classi par soli vèneti o brusando i libri de storia-leteratura-geografia-arte... italiane, europèe o mondiali: lo femo a fianco e insieme a la cultura de base, aumentando el nostro saère, slargando i confini e integrando la nostra cultura.
La lege la dovarà fare el so dovere e farse rispetare anca da chi xe vegnù da fora, se no se vorà che deventemo tuti spaesà, cioè un Paese de stranieri in casa nostra! Se ga l'inpression che 'ncora na volta la religion la sia na scusa par tut'altre mire...
L'aiuto, la solidarietà e l'acolienza che se sta dando no ga da passare come se la fusse na "debolezza", ma come segno de civiltà ocidentale e - parché no? - cristiana, tante volte sugerìa proprio da chel crocifisso picà sul muro de na scola, de i ufici pùblici e in tante case, e che sta dando cussì tanto fastidio!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Setenbre:
Editoriale
Riva setenbre: tuti a scola!
Se vèrze le scole... se vèrze el rubineto de i problemi.
Ogni giorno ghe ne nasse de novi, de stranbi... e de pericolosi
de Mario Klein
Storia vèneta
La batalia par el Pasubio
Un libro 'pena vignù fora, par mezo de l'editore Itinera Progetti, fa pi ciaro su na vicenda stòrica che se credeva straconossùa
de Giordano Dellai
|
