|
Da Rovigo
La Maria
 |
| Na casa strania fata sù a tòchi... |
Quando chi me ga dito de andare a catare la Maria, par farme cuntare la so storia de poareta insangoanà, mai me sarìa spetà na roba conpagna.
"Speremo che la sia ancora viva!" a me ga dito l'omo. "A credo che la sia vegnù casa da l'ospedale" - a ghe risponde so mujere, che dopo, oltà verso de mi, la me dise: "El varda che solo nantri a podemo andare drento in te chela casa. E lu no 'l staga a meravejarse de gnente, parché i xe selvàdeghi!"
Insuma a sonemo e risonemo el canpanelo de na casa strania, fata sù a tòchi, co le scale che le porta dessora soto on paro de archi. A vien a vèrzarne on omo de meza età e de meza statura, co la barba in desórdene ca te gavarissi dito èssare on pastore sardegnolo. El ne vèrze la porta. Ma 'pena vegnù drento a catemo in tera on paro de cassete co do gate piene de gatini: na diesena de bestie che le teta ramenàndose drento le cassete. E sùbito dopo a ne vien incontro, gratàndose na recia, on bel cagneto, e co lu nantra diesena de gati chi va e vien da na càmara a l'altra, magnando i muciti de carne masenà spargujà sol pavimento. E da nantra càmara a vien fora nantro omo co la barba longa e vestìo da strazaro. A 'ndemo in cusina, ca gh'è on odore cussì càncaro ca gera da putin ca no sentiva na roba conpagna: e le lastre le xe tute sarà. Insuma, on odore de can e de gato e de magnari marzi, da tòrte el respiro. E in cusina a gh'è na ragaza sentà co i oci despersi ca varda verso in su, e ferma imòbile co la vita spozà a la tola da magnare col botilion de vin in mezo.
E de qua, a gh'è la Maria. Sprofondà drento na specie de otomana desfà, 'pena che la ne vede, la se fa forza su i gunbi par alzarse e saludarne e dopo la se senta ancora e la scominzia a girare la testa in tondo come on sole; e i oci i se ghe inlùmina come quili de on demonio ca rida, vardando ora l'omo ora la dona, e a boca verta, ignonde ca ghe conpare, ora da na parte ora da l'altra de la lengoa, on solo dente.
"De dove xela?" "Da Belun - la me fa - da Aleghe." "L'è bela Aleghe" a ghe digo, e po' a ghe cunto che mi so' stà par on ano da le so parte.
E alora la Maria la me vèrze la so boca e la ride co sta léngoa ca ghe bala da na parte a l'altra del dente, e la me dise: "L'è bela, la montagna, ca se sta ben, al fresco e mi vuojo andare in montagna a morire, parché là ghe so' nata e la me piase". E i oci ghe se inlumina de na luse bona. E ancora la se alza, fasendo forza su i gunbi par darme on baso so la massèa, a mi, ca go fato vegnere in mente le so montagne. E come se la ghesse fato na gran fadiga, la se sprofonda ancora in te la otomana, respirando malamente ca pare che la gabia el segon in gola, fin che la fiola, senza gnancora vardare gnissun, la taca a parlare da ela sola, alzando e sbassando el tono del so ciacolare inùtile e senza senso.
A me sento male, drento e fora. E alora a ghe fago de moto a marìo e mujere, ca vuòjo andare via e ca go on inpegno grando, e che la intervista a ghe la farò nantra olta. E cussì a vegno fora, ringraziando el Signore, che mai pi ghe andarò drento in te chela casa.
A Lendinara, a la fine del Domila.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Novenbre:
Editoriale
Cossa xela sta crisi?
Ormai el xe tuto on discoramento su la situazion generale che se ga fato crìtica. Se ghe dà la colpa al governo, a l'euro, a la guera, al petrolio...
de Mario Klein
Da Belun
Ai tenp de na olta
de Biancamaria De Vecchi
|
