Da Ponteongo (PD)

El passato in fotografìa

Da eà prima publicassion, un grupo de ansiani de 'a Casa de Ponteongo, te i ani '30.

Xe 'pena finìa in te 'l Sototeto de eà Biblioteca Comunàe eà "XIII Mostra di documenti e foto d'epoca", organizà e gestìa come senpre da l'Archivio Stòrico-fotogràfico ponteongan, in coeaborassion co eà Biblioteca e l'Assessorato a eà Cultura. Xe trèdeze ani che tra 'e manifestassion del "Maggio Pontelongano" vien reaizà 'sta inissiativa, senpre co foto nove che eà zente de Ponteongo continua a portare a l'Archivio.
Eà xe 'na facenda scomissià 'na quindezena de ani fà pa eà voeontà de do fotoamatori del posto, Paolo Benvegnù e Giancarlo Zaggia. Eà proposta i eà ga fata a Andrea Vettorato, che a chel tenpo jera Assessore a eà Cultura ('desso el xe presidente de eà Pro Loco) che ga fato sua 'sta idea co intusiasmo e che 'l ga imediatamente coinvolto eà Biblioteca. Co comunicati comunài e servìndose anca del Boetin parochiàe, ghe xe stà domandà ai ponteongani de 'ndare a rovistare in te i casseti e a rispolvarare i albi de fameja in çerca de foto vece, de Ponteongo e de i so abitanti.
Eà zente xe stà invità a portare 'ste fotografìe, e anca documenti che fusse de intaresse comune, in Biblioteca dove che 'e sarìa sta riprodote da i do fotoamatori e cataeogà, co eà assicurassion che i originài sarìa stà restituìi ai legìtimi propietari. El paese ga risposto a sto apèo co na adesion che xe 'ndà al de eà de ogni spetativa. In te 'sti quìndeze ani xe stà seessionà pi de 1.500 fotografìe, riprodote, ingrandìe, cataeogà, tanto che 'desso l'Archivio Stòrico-fotogràfico de Ponteongo el xe uno de i pi consistenti de tuta eà provincia.

Na foto de i primi ani '50, oncò de grande atuaità: cortèo de sioperanti pa i licenziamenti al Zucreficio de Ponteongo.

Oltre a 'e trèdeze mostre xe stà fate anca do publicassion: una in te 'l 1995, intitoeà "Pontelongo. Immagini e documenti - 1880-1950" e una in te 'l 2004 intitoeà "Pontelongo - Un posto buono per vivere". Ai do fotoamatori che ga 'vù 'sta inissiativa se ga zontà ultimamente (da coando che 'l xe 'ndà in pension e che 'l ga eassà i vari incàrichi poìtici e aministrativi) Adriano Comunian, cultore de storia locàe, e cussì el Archivio poe gòdare anca del so pressioso contributo.
El xe on fato inportante anca parché foto e documenti continua a rivàrghene, magari anca da chi xe emigrà tanti ani fà portàndose co eori imàgini e ricordi del so paese e de eà so fameja e 'desso, savù che ghe esiste 'sto archivio, i mete a disposission de eà comunità paesana 'sti documenti. In pi, i tre che se òcupa de 'ste robe i ga anca scomissià de 'e richerche de caràtare sientìfico (come che sta sucedendo pa 'l zucreficio) interpeando enti, società, altri archivi.
'E mostre che xe stà fate xe stà visità da tanta zente e xe curioso védare come i se soferma a riconóssare persone che magari i gheva desmentegà.
E po' xe emossionante par tuti rivédare el paese come che 'l jera 'na volta, trovarse davanti a on specio che te porta indrìo de trenta o coaranta ani, ritrovare i modi de vestire e de èssare de tanti ani fà.
Sì, chi che ga visità chée mostre e spèssie chi che se meta a sfojare i albi che contien i ingrandimenti de tute chée fotografìe ga eà possibiità de riparcórare e de rivìvare tanti momenti de eà so storia e de eà so vita. Bastarìa coésto pa capire el gran vaeore de l'enorme lavoro che xe stà fato e che continua a èssare fato da i tre che ga curà e cura el Archivio Fotostòrico del paese.

[torna sopra]