|
Editoriale
Tanti, tanti auguri... Ma de cossa?
Semo ogni giorno pi cativi: copemo, stupremo, distrugemo, 'sassinemo l'umanità e Dio... Cossa podemo augurarse?
 |
| Auguri che i nostri putini i possa star fora in corte a zugare, come na volta, senza che riva "lupi manari". |
Farse i auguri el xe on bisogno, na necessità, on rito, na tradission, na speranza tegnùa in vita, nonostante tuto. Se no se féssimo gnanca pi i auguri a Capodano, alora la se metarìa male, ma male sul serio. Par fortuna ne resta el corajo de zercare chela parte de bon che se ga deposità, col passare de i ani, sul fondo del core de l'omo. L'onbrela se vèrze quando che piove, i auguri i se fa soratuto quando calcossa no va ben! E sicome, proprio in sti tenpi, le xe tante le robe che no va ben... questo xe el momento pi adato a dirse: "Tanti, tanti auguri!"
- Auguri che le galine, ànare, oche e faraone le guarissa presto da l'influenza;
- auguri che i ovi sbarloti i vaga a finire te 'l luamaro, come na volta, e no su la pasta;
- auguri che l'inchiostro el resta ne le pene e ne i calamài e no 'l se méscola pi al late;
- auguri che tute le mame che xe in stato no le meta al mondo fiòi cretini che dopo i va ne i canpi de calcio a ucolare cori razisti;
- auguri che nassa on qualche Leonardo che 'l se inventa on artegagno par spostarse in màchina senza dover tegnere de ocio le "targhe pari o dispari";
- auguri che i putèi italiani, e quindi anca vèneti, no i sia pi cussì grassi par via de marendine e furissi, ch'i xe gunfi come mas-ceti pieni de maco;
- auguri che tute le done le possa nar fora de casa quando ghe pare e piase, senza córare el ris-cio de vegnere violentà da on foresto;
- auguri parché le done no le subissa pi violenza in fameja, magari propio dal marìo;
- auguri parché veline e velone le se coerza on poco de pi, có le se rasvòltola in television;
- auguri par i pròssimi partecipanti a l'Isola dei famosi, parché i possa canbiare de posto e nare a specializarse in Eritrea, in Afghanistan, in India: de sicuro i tornarìa a casa laureà in "miseria, fame e malatìe" e con manco zimerie;
- auguri par chi ghe piase la guera: che ghe sia permesso de darghe la cacia a le zeche e a le cavalete, visto che forse le sarà el nostro pròssimo flagelo;
- auguri che tuti i genitori i se sforza a insegnarghe ai fiòi fin da pìcoli che la vita xe un dono da tegnerse da conto, da no butare via co na polvareta o na siringa;
- auguri che tuti i muri e i plàtani del mondo i gabia da spostarse ogni volta che i vede tosi in màchina drio narghe in coste;
- auguri parché el sesso el sia on profumo da snasare solo quando sbocia el fiore de l'amore;
- auguri parché la religion no la sia na scusa par spartire el mondo in fedeli e infedeli;
- auguri che finissa i viaji e i sbarchi de i clandestini, dopo che ghemo capìo che dovemo rinunciare a calcossa de "nostro" par mandarlo ne i Paesi del terzo mondo;
- auguri che ogni dialeto - conpreso quelo vèneto - el sia considerà una de le tante lingue che on omo el pole saver parlare, senza doverse vergognare se el sa parlàrgane solo una: el dialeto!
Eco, volendo a ghe xe na infinità de auguri che se se pole fare: basta solo doparare la testa e el core!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Genaro:
Editoriale
Tanti, tanti auguri... Ma de cossa?
Semo ogni giorno pi cativi: copemo, stupremo, distrugemo, 'sassinemo l'umanità e Dio... Cossa podemo augurarse?
de Mario Klein
|
