|
Editoriale
Guai, se perdemo la dona!
La xe senpre stà modelo e perno de ideali, valori e stili de vita par la fameja e par la socetà. Stemo 'tenti, òmeni, a no stufarla!
 |
| Un fiore par tute le done e, in particolare, con stima e afeto, a le nostre colaboratrici che xe in copertina: da l'alto verso destra, Mariuccia Bazzaro, Gemma Bellotto, Lucia Beltrame Menini, Lucia Cozzolino, Giacinta Dall'Ora, Irma Dalle Molle, Maria Damonte, Biancamaria De Vecchi, Rita Donà, Luciana Ecchiotti, M. Luisa Furin Zilio, Wanda Girardi Castellani, Franca Isolan Ramazzotto, Lidia Maggiolo, Maria Penello, Piera Rompato, Ines Scarparolo, Luigina Tavi, Gianfranca Turchetto. |
Disemo sùbito che sta qua la xe na question pitosto seria. E no parlemo solo per esperienza personale, ma anca par convinzion e costatazion de che dano ghe sia se manca la dona in fameja, ne la socetà, nel volontariato, ne l'arte, ne la polìtica, nel sport, nel mondo del lavoro...
Có manca la dona, xe come quando int'on canpanile sona na canpana sola: a xe fadiga che la possa spàndare ne l'aria "segni" de festa; al màssimo, la bate reciamo parché va sù messa, o la ne informa che so sta tera ghe xe na creatura de manco. Anca questa xe vita, ma in parte ghemo modo de métarghe rimedio se puntemo su la presenza de la dona.
Però, solo se se ga un grande conceto de la dona, solo se l'omo xe convinto che la xe la so propia metà, cioè la parte che conpleta la so carne e la so mente, se pole evitare el ris-cio de pèrdarla. Se inveze se continua a pensare, dire e prométare la parità de diriti tra omo e dona, fasendo gran poco perché questo suceda, ben, 'lora go paura che semo so na bruta strada. E no stemo ilùdarse che la parità la gabia da passare 'traverso na zena al lume de candela la sera San Valentin, o nel regalarghe mimosa l'8 de marzo: massa poco se volemo certificare el nostro rispeto de i diriti de la dona.
Ma sì, va ben anca la serata trasgressiva passà in pizerìa tra de lore: quela la xe la serata de le done, de la conplicità, del far comarò, del parlar male de i òmeni. Ghe vole anca questa, ma l'ocasion "tuta rosa" ga da servire anca a far riflètare i òmeni. Riflètare par inpegnarse sul serio...
Sul serio? Ma, a cossa? A fare oncò, doman, dopodoman e dopo oncora, calcossa de quelo che fin 'desso ga fato solo ela o ghe ghemo fato fare solo a ela. E anca viceversa: lassarghe fare calcossa de nostro. Cussì, far nàssare un novo futuro. Ne i raporti personali co la dona... rónpare co i gesti abitudinari, rinovarse, inventarse calcossa de novo: la fantasìa, el zogo, el diversivo, la sorpresa i serve a mostrare rispeto, amore, stima, desiderio. E stemo pur certi che, in sto modo, zercando de miliorare la vita de la dona, finiremo col miliorare anca quela de l'omo che tante volte el xe tentà de lassarse 'ndare, de malarse el fègato co i rinpianti pitosto che acetare el canbiamento.
Questa la xe una de le sfide del nostro tenpo, la xe na partìa che se zoga propio tel canpo de le rivendicazion de la dona. No stemo desmentegarse che, oncò che se parla tanto de integrazion, le vere esperte in sto canpo, par natura, par matrimoni misti, mediazion tra diverse mentalità, tra fiòi e anbiente, lingua e religion le xe proprio le done. Solo che, nonostante le probàbili "quote rosa", i òmeni no i lassa lìbere tante careghe parché le done le possa sentarse ne i posti de comando.
Anca se no lo volemo amétare, el peso del mondo intiero el xe postà su le spale de milioni e milioni de done.
Se ste spale le dovesse rónparse o anca solo stufarse... a semo del gato! Se volemo che questo no suceda, slarghemo el bigòlo e spartimo el peso metà paromo.
Anca questo xe un modo par darghe na man de "rosa" al futuro del mondo.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Marso:
Editoriale
Guai, se perdemo la dona!
La xe senpre stà modelo e perno de ideali, valori e stili de vita par la fameja e par la socetà. Stemo 'tenti, òmeni, a no stufarla!
de Mario Klein
|
