Quatro Ciàcoe
Mensile de cultura e tradission vènete
de Luigi Frosi

Le nostre brave done

Nona Ena, a giugno 105 ani

Quatro Ciàcoe
2-06-2005: do generassion a confronto - 104 Nona Ena, 1 ano Matilde - davanti a la torta.
A go catà el me amigo Enzo che 'l vigneva zo da Teolo e el me ga contà che 'l jera stà a catare so nona:
"No la xe proprio me nona" el me ga dito, "la sarìa me amia, ma par rispeto la ciamo nona, anca se de nevodi la ghe n'à na quarantina. Pensa che al do de giugno la fa 105 ani! Me mama la jera so sorela pi zóvane che a la fine de i ani '80 la se ga malà e dopo la xe anca morta. In chel periodo la Ena (Elena), cussì se ciama me nona, la vigneva ogni dì a casa mia par farne da magnare, netare, lavare e tuti i mistieri de casa, anca se la gheva squasi 90 ani. Par nialtri la jera come se la fusse stà nostra mama! In chel periodo me fradèo la ciamava 'nona' e cussì, da alora, anca par mi la xe deventà 'nona Ena'. Questa xe una de le reson parché me son tanto tacà a ela.
In chei tenpi, fin che la taconava sù qualche calseto o qualche mudanda, la me contava de la so vita che, contarla tuta, el sarìa on romanso longo assè. So pare, Vitorio, el jera un Gastaldèo, una de le fameje più vece de Teolo. A 18 ani el xe partìo par l'America in serca de fortuna, el xe stà prima in Brasile, dopo in Argentina e par ùltimo ne i Stati Uniti, ma dopo un tòco el xe tornà casa senza gnanca un schèo. Dopo qualche ano, catà un tòco de morosa, el se ga maridà co la Emilia Eufrasia Girardi, che so mare la jera de la fameja de i Trissino, nòbili de Vicenza. El Vitorio e la Emilia i sarìa stà i me noni da parte de me mama, i ga 'vùo diese fiòi che i 'ndava d'amore e d'acordo, tuti xe 'ndà a scola e i viveva felissi e contenti. Nel 1915 xe scopià la guera e nel '17 Piero, uno de i fiòi, a gnanca 19 ani el ga lassà le strasse a Caporeto. Intanto i inglesi, ne la retroguardia, i ga confiscà i pòrteghi de la casa de me noni par métare i so cavài, restando là par un bel tòco.
Quatro Ciàcoe
Nona Ena... parecià par la festa 2005.
La Ena gheva 'lora squasi 17 ani, la jera na gran bela mora e un soldà inglese ga scuminsià a farghe la corte. El jera un bel toso, ciò, grando, biondo co i oci celesti cofà el mare e la Ena ga perso la testa anca ela.
So mama Emilia però la 'a ga senpre tegnùa de ocìo 'parché la paja no ciapasse fogo'; intanto el reparto el xe partìo par el fronte sul Piave e l'inglesin no 'l se ga pi visto. Dopo qualche aneto, la Ena, la ga pensà che jera ora de métare sù fameja e, fra i tanti spasimanti che ghe coreva drio, la se ga maridà con Umberto Furlan, dito Pesse, che 'l jera uno de i più grandi caretieri de la zona. El jera paron de do barossi e de do muli: uno se ciamava Goba e st'altro Nana; el fazeva servissio giornaliero Teolo-Pàdoa co càrichi de legna da brusare e de vin.
A le tre de matina el tacava la Nana al barosso che so fradèo Meo, la sera prima, el gheva caricà, el se sentava davanti co le rédene so na man e st'altra ben salda al sara (el fren a manovela) e fin che no 'l rivava zo a Vila el gheva el so da fare parché, oltre la dissesa, el gheva da conpagnare el caro ne le curve anca massa pericolose. Rivà zo dal monte, a Vila, el molava tuti i comandi, el se meteva el tabaro ben rujà sù, el capelo in testa e 'l se indormessava. Intanto la Nana 'ndava vanti par la so strada, tegnendo la man drita e, sensa fermarse mai, la rivava a Tencarola. Prima del ponte ghe jera na piassola co la famosa Ostarìa da Arturo; qua el mulo se fermava parché jera el posto par la marenda sia par lu che pa 'l paron. Có 'l se fermava, el Pesse verzeva l'ocio, el saltava zo dal barosso, na sbrancà de fen e na secia de aqua pa i muli e lu, in ostarìa, el se cucava raquante fete de salado e du goti de chel moro; dopo se ripartiva par Pàdoa. Portà la mercansìa a destinassion, se tornava pa 'a stessa strada. El belo l'è che sia el Nana che la Goba, no gheva problemi de orientamento e cussì el paron se pisolava volentieri fin casa. Tornà, el catava la sena pronta, na scudela de pasta e fasòi, raquante fete de polenta e na bea feta de schissoto da tociare sol vin.
Quatro Ciàcoe
Nona Ena e la "mussa da socolaro": che sia pi vecia ela o la "mussa"? (foto Enzo Ferron)
Un giorno, jera de febraro, co un fredo can, tornando casa el Pesse, ga ciapà na ingrumada de fredo e no ghe xe stà più gnente da fare: la Ena xe restà, cussì, sola co i so oto tosati da tirar sù. Come che la gai fato, no la sa spiegarse gnanca ela: i pi grandi la 'i ga mandà a lavorare e i pi pìcoli a scola fin che i se ga diplomà e anca laureà. On fià a la volta tuti se ga postà ben e tuti se xe maridà.
La 'casa madre' xe senpre a Teolo dove che la vive co so fiòi: el Ciucia (Renzo), el Moro (Livio) e Poise (Arrigo), ma chi che comanda xe senpre la nona Ena, e ogni doménega la Camila e la Picola (Maria) le va catarla senò la se incassa... Tuti ghe vol ben e da quando che la ga conpìo 80 ani, al 2 de giugno i organiza na gran festa, invitando fiòi e nevodi, parenti e tuti quei che vol farghe festa. Co sta storia se ga mucià pi de 150 persone, cussì, i fiòi i ga conprà na vecia casa vissin de Praja e ogni ano i parecia tole e careghe soto i àlbari e, a l'onbrìa, festa par tuti fin sera. Có la ga festegià i 100 ani, el sìndaco e le autorità del paese ghe ga consegnà na targa, ma ne i ani dopo la se maravejava parché no vigneva più sti personagi e la se lagnava parché, ogni ano in più, jera par ela più inportante de l'ano prima. La dize che la xe drìo deventare vecia parché la fa fadiga a stare in pìe, ma la ga caro de vìvare cussì de longo parché la se pol gòdare i so nevodi, ma no la ga paura gnanca de morire parché no la vede ora de incontrarse co i fiòi: la Melia (Amelia), el Nani (Ferdinando) e el Vito (Vittorino) che i xe in paradiso. L'ano passà, par la festa de i 104 ani, quando che xe stà ora de brindare e de tajare la torta, preparà come ogni ano da so nevode Antonietta e Chiaretta, co le 104 candelete inpissàe, la se ga emossionà, fasendo do làgrime come na putela. Poco dopo, ghe so' andà tacà e ghe go dito che la ga on spìrito e on core che i xe senpre zóvani; ela la me ga cardà, la me ga fato na caressa e insieme ghemo cantà 'Vivere fin che c'è gioventù, perché la vita è bella e la voglio vivere sempre più!'"
El me amigo no 'l gheva più fià; mi jero comosso. Lo son anca 'desso, pensando che sta dona la xe na gran bela persona, la ga ciapà la vita come un regalo grando, la ga vivesto co passion e timorata de Dio, la ga dà tanto par la so fameja e 'desso la se gode l'amore e l'afeto che la ga sparpajà ne i so 105 ani in te sto mondo. Cussì la continua a vìvare serena e contenta fin che 'l bon Dio vorà! Ghe lo auguremo tuti de core: "Auguri nona Ena!!!"

[torna sopra]

 

Archivio
2022 21 20 19 18 17 16 15 14 13 12 11 10 9 8 7 6 5 4 3 2 1  
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Genaro
Dissenbre
Novenbre
Otobre
Lujo-Agosto
Giugno
Majo
Aprile
Marso
Febraro

Dal nùmaro de Marso:

Editoriale
Leggi l'articolo Guai, se perdemo la dona!
La xe senpre stà modelo e perno de ideali, valori e stili de vita par la fameja e par la socetà. Stemo 'tenti, òmeni, a no stufarla!
de Mario Klein
 
Devossion popolare
Leggi l'articolo I devoti de la Tera
de Ugo Suman
 
Le nostre brave done
Leggi l'articolo Nona Ena, a giugno 105 ani
de Luigi Frosi
 
Da Rovigo
Leggi l'articolo La tratorìa
de Gianni Sparapan
 
Tradission de na volta (in visentin)
Leggi l'articolo "Bàtere Marso"
de Antonio Maraschin
 
Da la Bassa Veronese
Leggi l'articolo Ida Murari, 'na maestra speciale
de Lucia Beltrame Menini