|
Editoriale
La xe dura, ma speremo
Se volemo continuare nel lavoro de difesa de la nostra cultura e de le nostre tradizion, semo costreti a domandarve aiuto
 |
| L'aria che tira... ga roersà parfin l'acento de "c'è" de le Poste! Speremo che l'augurio el sia quelo che le ne porta a destinazion la rivista... in tenpi "decenti"! |
Lo savemo che, quando che la partìa la xe invià da on bel tòco, xe bruto dover anunciare che vien canbià le règole del zogo. Xe bruto ma no ghemo alternativa. Da sto mese, i nostri letori, 'bituà a torse la rivista in edìcola, ghe toca pagarla 3 euro, tondi tondi (e aumenta anca l'abonamento).
No ghe credarì, ma ne dispiase cussì tanto che quasi se vergognemo de rivare a questo. Nel giro de sti quatro ani (el prezo vecio no 'l xe mai canbià da dissenbre 2002) le ghemo strolicà tute, e no ghemo mai batù cassa. Ma sta volta no ghè stà verso de risòlvare el problema senza "disturbare" i nostri letori.
I aumenti de tuto, ma proprio de tuto, i xe soto i nostri oci: le Poste in prima fila. Far finta de no védare no se pole. E 'lora cossa se ga da fare? Ghemo da sofegare la creatura proprio 'desso che la xe drio festejare i so 25 ani de vita? Ghemo da rinunciare a tegnere in funzion on argagno de difesa de na identità, rapresentà da la nostra lingua vèneta che ne aiuta a colmare i vodi che no xe bona de inpinare quela italiana?
Sicome no semo mai stà pessimisti, gnanca sta volta no se ghemo sentìo co le buele in man. L'Editoriale Padova, pa 'l ben de Quatro Ciàcoe, el ga tolto la decision, confidando, pi che nel bon core, ne la conprension e ne l'inteligenza de chi ne lèze: persone, che semo convinti de conóssare ben e che proprio lore ne insegna che senza sacrifici no deventa poareto gnanca on sior!
Sì, parché, se on sior no 'l se sacrìfica... a spèndare e a spàndare, come falo a finire in miseria? Par magnarse fora on capitale, bisogna che 'l trìbola
de chel poco! Ma lassemo stare che no 'l xe 'l nostro caso.
Tornemo a la speranza, anca se forse, mai come in sto tenpo, la parola "speranza" la fa fadiga a farse strada nel parlare e nel pensare de oncò. Gran rabaltamenti, teste mate, cubiamenti da età de la piera, pòpoli che more de guera e de fame, barufe de religion e de culture difarenti, posti de laoro malsicuri, no se sa pi a chi darghe mente: ormai tuto pol sucédare (fora che l'omo incinto!); roba da darse na bòta in testa o da cavar la spina!
Ma, qua te vojo! Par noantri che dissendemo da na raza che ga tribolà e che ga senpre fato fadiga a fàrghela, el pan e la polenta i xe 'ncora inpastà de speranza. E po', cara zente, noantri semo anca cristiani, o almanco semo stà batezà, e dunque savemo che, insieme a la fede e a la carità, ne xe stà regalà da Dio anca la speranza. Certo, no xe fàssile pensare al bel tenpo, có se xe soto la piova, ma xe pèzo pensare che no sbala pi e che no torna el sole!
Dunque, o par virtù o par necessità, xe mèjo despetolarse fora da inturbiamenti e incoatarse vizin al fogo de la bona sorte: te vedarè che, prima o dopo, la ne peta incoste anca a noantri. Par adesso, come ghemo dito, ne basta èssare capìi e 'jutà da chi ghe vol ben al nostro dialeto vèneto, pa 'l rispeto che 'l se mèrita e pa 'l vanto de averne traghetà fin al 2007, co le nostre fassine al coerto, con salute quanta basta, e voja de nar 'vanti.
Questo xe l'augurio che se femo, parché co la speranza ciapa na bela ziera anca la vita!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
La xe dura, ma speremo
Se volemo continuare nel lavoro de difesa de la nostra cultura e de le nostre tradizion, semo costreti a domandarve aiuto
de Mario Klein
Memoria viva
I Papafava, ùltimi Carraresi
Le aventure corajose de me Papà che ga sercà el tesoro de i Carraresi. La so disponibilità de farme conóssare la storia de Padova. Mi go sercà de savere le orìgini de 'l nome Papafava
de Gigi Vasoin
Da Verona
Giorgio Ferrante
nel Futurismo veronese e l'amicissia con Umberto Boccioni
de Wanda Girardi Castellani
|
