Sensassion

Odori e profumi

I profumi de’a nostra tera i nasse ancora dapartuto, a cominciar da quei che podemo sentir dentro i boschi de ’e nostre montagne più famose e manco conossùe, che i te ciapa i pensieri e i te fa sentir contento del presente e del futuro, come l’odor penetrante de l’aria de i laghi de ’e alture che qua e ’e ze ’e più bee. Come el profumo de i campi ne ’a pianura che anca co i so coeori ’a te pitura de alegrìa l’esistensa. Come l’odor forte del salso del nostro mar e de ’a nostra laguna che el te porta dapartuto dove ti vol ’ndar e, dopo, tornando su ’e montagne, ghe ze ’a vista de i fiori più bei.
Come xe bei quei nati ’torno i laghi, dentro i canpi; come xe afassinante respirar i profumi e i odori de ’e pinete in riva al mar dove nasse e vive anca qua l’osmarin che mi ghe ne respiro l’ànima a pieni polmoni fin a ciapar ’a me pena e scrìvar sul me libro tascàbie poesie e raconti che, rieséndoi, i profuma anca de osmarin.
Dopo ghe xe ancora tuti i odori de i nostri magnari che se sente ne ’e cusine de ’e nostre case come l’inconfondìbie odor de puenta, de brodo, de vin bon che el ciapa l’essensa de sta tera.
Odori, profumi, sensasion che mi trovo qua dove che son nato mi e tante generassion de me antenati e che no ’e ga paragon co nessun de i tanti, pur bei, posti dove che so’ stà.
Tera veneta, che na volta ti geri el più bel teritorio del mondo e che ’desso tanto ti ga perso, ma tanto ti ga conservà, sercarò de difènderte co ’e me fòrse contro tuto queo che vol cancearte, contro ’a modernità negativa e contro ’a canceassion de ’a to storia superba e de tuti i profumi che soeo su sta tera tanto fortunà se ga podesto e se pol sentir ancora, par portar chissà fin dove sta forsa positiva.
El Veneto, soeo el Veneto, co tuti i so profumi el me rende sereno, parché respiro aria forte, inconfondìbie che a xe nata in tenpi remoti, ma senpre vissini ai me pensieri, che mi me piase tanto e da i quai no riesso a stacarme. A volte penso che el sia un difeto sentirme cussì tacà a ’a me tera, ma cossa posso farghe se sento anca i odori che vien fora da ’e piere antiche de ’e nostre cità e paesi antichi, se ’esendo un antico manoscrito che parla de storie, crònache venete, me apare come na imàgine atuàe co tuti i odori e i profumi de chea data e questo soeo ’esendo carte vece de el Veneto che ’e me ciapa come el vento tol sù na foja legera.

[torna sopra]