|
Memoria euganea
Lavorare su i canpi
Lavorare la tera voi dire somenare, arare, trasportare fen, paja, formento e formenton, legname e anca loame par concimare i canpi. Ma anca conóssare i nomi de i atressi, ciamarli par el so nome, nomi che romài no se dòpara pi, solo calche vecio come mi e dopo ’ndarà tuto desmentegà. Romài la tera la xe lavorà da i tratori e altri strafanti, che de la tera no i fa pi parte.
Cussi go pensà che sarìa "saggio" ricordare come se lavorava na volta, e come che se ciamava i atressi e come se comandava le bestie, quando se ’ndava a arare, e quando se caresava a portare in corte el formento par fare el cavajon e cargare el fen e fare le frigne e i pajari, tute mansion che se faséa a man, ma bisognava anca savere fare, parché ogni stajon ghe jera on modo de fare.
Par stavolta parlarò solo de atressi par arare i canpi. In te ogni fameja de contadini ghe jera la so stala co le robe necessarie, do o quatro vache, (i pi siori, anca tri pari); le vache le jera da lavoro, ma anca da late, che ’l se vendeva a le fameje e se ciapava calcossa par conprare el necessario par la fameja. El late el jera na risorsa inportante par sopravìvare, ma le vache le jera soratuto par i lavori pesanti, come arare, e anca par trasportare: ogni contadin el gheva la so barela par questo.
Par arare la prima roba la jera métarghe el zòo bardà e on timonsèo tacà via al versuro tegnù co na fitora, ingansare el versuro co na roda pìcola e una on poco pi grandeta: la roda pi granda in làgana e la pìcola dessora la steola, par sgajare el tiro de ’e bestie, tacà soto al versuro che xe la gomiera, che la taja i sloti e el versuro li volta via.
Anca le bestie le jera una picoleta e chel’altra on poco pi granda par via che la jera so la làgana pi bassa, e uno parava le vache che le conosséa tuti i comandi, e on altro el tegneva i maoni del versuro.
I comandi? "To-e-tò" come dire: "va’ avanti"; par incorajare se diséa: "Uèh..." e lore le tirava co pi forsa; par girare a man sanca se disea: "Ols-fora" e par girare a drita se diséa: "Ols tò-e-tò" e lore le capiva, parché ’e conosséa la vose del paradore, e mi da putèo drìo de lori co on baileto che có rivàvino in fondo al canpo, bisognava netare el versuro de la tera che se tacava, e le bestie senò le faséa pi fadiga a tirare, e questo el jera el cònpito de noantri tosati. Se sa che in casa de i contadini se scumissiava presto a lavorare, ogni brasso el contava par tirare ’vanti.
Ma ’ndando drìo co na frasca par smarassare i tavani che i se tacava soto la coa de ’e bestie (el jera el posto ’ndove che i becava). Ste poare bestie, pare oncora de védarle co la bava a la boca e la lengoa fora, però sto lavoro el se faséa de matina presto, quando che jera fresco; a ora de marenda se metéa le bestie in stala e se ’ndava a fare marenda e dopo noantri ’ndavino a rónpare i loti, fin che i jera tenareti; anca sto mestiere el jera par grandi e pìcoli, e nessun mai se lamentava, bisognava farloe se ’ndava vanti.
Cossì go tirà in balo anca tante parole che forse in altre parte le se ciama difarente.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Quando la Tera trema...
Oltre a la Natura anca la Tera che trema ne ricorda che cussì no se pole nare ’vanti. Serve na profonda riflession par capire dove sbaliemo e in cossa ghemo da canbiare. Pa ’l nostro ben!
de Mario Klein
Da Rovigo
I mignini de Floriano
de Gianni Sparapan
|
