|
Da Ciósa (VE)
Inberìo de fredo
 |
| … me domandèvo come un storno perché la zente voleva el pesse congelào… |
Avrò avùo sédese ani e niancora avevo la barba. Finìe le scuole d’istà, m’ò trovà da lavorare da i do fradèi Cencin, dadrìo la pescarìa.
L’Otelo gera ancora pi bon de so fradèo. I conpreva el pesse da i pescaori e i lo congeleva dopo avere fato confessìon su pìcole guantiere de polistirolo.
Portevo stivaloni in pìe, braghe de veludo e inpirào ne la testa un capelo da russo. Inbragào da un capoto inbutìo, andevo a lavorare in te le cele al fredo.
Là, ghe gera vèntole grande, che gireva a tuta cana, come ne i ’parechi che vole ancora nel sielo. No ve conto e no ve digo, fiòi, quanto fredo che ò patio!
Là dentro, de prima bòta ghe gera quarantasinque soto zero e dopo vintiun soto per la longa conservassion. Tuti i dì su e zo su ste cèle, inpenìndose de fredo, portando dentro e fuora sto pesse.
Le buganse ai pìe me gera venùo fuora!
I mòcoli dal naso i me coleva zo e i se induriva come pirioti de giasso.
Bravi òmeni gera i Cencin per el so mestiere; no ghe despiaseva bévare onbre in conpagnìa e nianche merende, assagi a scotadéo per le ostarìe. A ogni conprà e una vendùa, ghe gera assicurà una magnà e una bevùa.
I afari, dopo, ghe xe ’ndài male e da boni veci i à dovesto molare.
Alora, el pesse che i ghe porteva in botega, a gera fresco apena ciapào, che a se moveva ancora ne le casse. Mi gero ancora un fìo e, me domandèvo come un storno perché la zente voleva el pesse congelào.
Fra mi e mi parlevo da solo e me rispondevo: “’Sta zente, xe insemenìa, no’ capisse niente, i dovarave magnare rane!”
De pesse, i paroni ghe n’aveva vendùo a camion, vagoni e a nave piene. A ogni butà, così per nualtri de botega, la merenda gera senpre assicurà.
Ò lavorào là i tre mesi d’istà, inberìndome de fredo su quele cèle e, ve confesso: i schei che ò ciapào congelàndome i suori, me li ò dopo tuti magnà, sbusàndome le culate in punture. I reumatismi avevo ciapào!
Pecà che el dotore Amati xe morto; de resto, ve contarave elo quante scàtole de punture che m’ò portào a casa.
Co’ quel cristian avevo fato amicissia e, quando in botega a me parleva dal banco a se vardeva la cesa che xe al de là de la piassa.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Eco el mese del soriso…
“El mese del soriso e de l’alegrìa” se diséa na volta quando rivava Febraro a regalarne frìtole e cróstoli, màscare e mascaramenti, feste in piaza e ne le case, e ogni pensiero tristo vegnéa messo da na parte, pensando che xe mèjo patire dopo, pitosto che prima…
de Mario Klein
Da Rovigo
La stessa meraveja
de Gianni Sparapan
Da Vicenza
Na bruta facia
de Maria Penello Mingardi
|
