Quatro Ciàcoe
Mensile de cultura e tradission vènete
de Luigi Frosi

Na volta no capitava

La riunion de condominio

Forse jera mèjo quando in casa comandava uno solo, el vecio Patriarca, e tuti obediva…
Forse jera mèjo quando in casa comandava uno solo, el vecio Patriarca, e tuti obediva…
Ai tenpi de Marco Caco, quando in casa comandava uno solo, el vecio Patriarca, tuti obediva e se fazeva quelo che ’l dizeva e stabiliva lu. I fioli rigava drito e no ghe jera barufe par le eredità: el pi vecio, dopo che jera morto el pare, el ciapava el so posto e el sercava de èssare autoritario ma, conprensivo e inparsiale come che ’l gheva inparà dal so vecio. De case a ghi ne jera una e par quanto puareta che la fusse se trovava posto par tuti o insieme se tirava sù na camareta par chi ghi n’eva de bisogno.
Me vien in mente quelo che dizeva me mama có se cagnàvino par calcossa; a jèrimo in diese fradèi e pi de qualche volta la fasévino tribulare có reclamàvino el nostro posto a tola, alora ela la sentensiava: “Poco posto ghe vole quando che se se vol ben!” E, proprio el ”ben”, el rispeto, el saverse vignere incontro e spartirse le robe le jera le fòrse che tigneva insieme tuta sta zente diversa par caràtere, ma vissina ne le fadighe del laoro, ne le dificoltà de la vita, ne l’ajutarse ne i momenti de magra… zente forte e inpegnà a ’ndare d’acordo e adatarse a na vita comunitaria che dava serenità e voja de stare insieme.
Verso i ani ’50, el progresso ga portà la possibilità anca a la zente de canpagna de ’vere un posto de laoro in fàbrica, xe rivà cussì la necessità de trovarse un posto da vìvare vissin al laoro e ’lora xe canbià el modo de vìvare de chela zente. Na casa singola costava massa schei e cussì i se metéa insieme tri o quatro amissi, i se fazeva sù un condominio, na casa co pi paroni. Fin che le robe le ’ndava ben, tuto funsionava tranquilo, ma col tenpo le robe canbiava, i laori par tignere sane le case gheva scuminsià a portare la zente a ’vere paura de èssare inbrojà, cussì xe intervegnù la lege par stabilire cossa e come conportarse co’ l’obligo de ’vere na tersa persona, el ”Aministratore” a tignere i conti, a divìdare le spese e a tignere calma la zente nel vìvare insieme. E, proprio sto aministratore, de tanto in tanto, ciama a raduno i paroni del condominio par stabilire democraticamente ogni necessità: pulissia de le scale, curare el giardin, rifare el cuerto, stabilire i orari de le pulissie, come e dove sbàtare i tapéi, el silensio da rispetare e tante altre robe del vìvare comune. Eco che, de tanto in tanto, riva na létara da l’aministratore che ’l taca anca su le scale un aviso, disendo che el giorno tal de i tali a la tal’ora, in casa de pinco palino ghe sarà la ”Riunion del Condominio”.
A mi me ne ga parlà me fiolo che, da quando el se ga cronpà l’apartamento, ogni volta, el vive co fastidio sti incontri: intanto ghe toca ’ndare lu parché so mujere la ga da starghe drio a le putele e, a chel’ora la ga da métarle in leto. Cussì par lu la xe na vera ossession: intanto par el dì stabilìo, senpre sbalià, l’ora, dopo sena e col bocon ancora in gola. De solito se se trova in casa de uno de i condomini, senpre dal stesso, quelo pi rognoso e, par zonta, amigo de l’aministradore e che ’l fa senpre la spia. Po’ el me conta che ghe xe senpre quelo che riva co un’ora de ritardo, el ga senpre la testa su le nuvole, e el se scusa disendo che ’l gheva calcossa altro da fare o parché ghe paréa de ’ver capìo che l’incontro el fusse naltro dì. Cussì, l’aministradore, el perde meza ora par contarghe quelo che xe stà dito, e intanto tuti st’altri i bróntola e i se ramena su la carega. Ma ghe xe anca la sioreta che, par paura de èssare l’ultima a rivare e fare bruta figura, la sona meza ora prima, trovando la sala ancora da pareciare, la parona a tola col sculiero in boca e preocupà de èssare in ritardo. Ghe xe dopo quelo che bisogna telefonarghe tre quatro volte, parché el xe tornà tardi, proprio chela sera là, e el ga ancora da magnare, però tute le volte la xe la stessa solfa. No manca quelo che xe pien de schei come un ovo che ’l vorìa senpre fare de le miliorìe: un ritoco ai belconi o a le persiane, la casseta de la posta nova co la scrita ”No Publicità” parché quela che ghe xe la fa scadere el condominio, el propone anca un gazebo in corte dove métarse la sera d’istà a far comarò, anca se lu el xe el primo a stare par conto suo e gnanca saludare. Tuti ghe dimanda alora se ’l xe drìo dare i nùmari a spèndare tuti chei schei. Dopo ghe xe quelo che ’l ga sentìo dire a la television, a Forum o in bar da i amissi che… Po’ ghe xe el sapienton che ’l ga capìo tuto su i ”millesimi”, e menando la testa el dise che dopo st’altri i va casa brontolando sensa gnanca savere quanto ghe tocarà pagare. E cossa dire de quela che brontola senpre par le spusse o par el rumore de i putèi su par le scale; e quelo che dopo meza ora el taca a sbufare, alsarse da la carega disendo che ’l ga naltro inpegno o quelo che a le riunion no ’l vien mai e dopo el xe el primo a brontolare su tuto. El momento pezo, el xe quando tuti vol dire la sua o i ciàciara col vissin, no se capisse un’ostrega e par zonta l’aministradore el bate la man su la tola come la maestra a scola. Par finire in gloria la parona de casa tira fora na butilia de vin bon e la fugassa che la ga fato aposta: no che ghe xe senpre quelo che vol fare el rafinato, el dize che no xe necessario e cussì resta tuto là come che i ghesse paura de vegnere ’velenà.
A la facia de la convivensa e de la bona armonìa; forse a jera mèjo quando a comandava el vecio, a ghe jera manco pensieri e manco dificoltà.

[torna sopra]

 

Archivio
2020 19 18 17 16 15 14 13 12 11 10 9 8 7 6 5 4 3 2 1  
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Genaro
Dissenbre
Novenbre
Otobre
Lujo-Agosto
Giugno
Majo
Aprile
Marso
Febraro
Editoriale
Leggi l'articolo Guài scandalizarse de i scàndali!
Guài maravejarse de i erori d’i altri, parché vorìa dire giudicare. Questo però no signìfica giustificare, passarghe sora come gnente fusse: vol dire non far deventare pi grando el “male”, magari ricordàndose de la pajeta e de la trave…
de Mario Klein
 
Devossion popolare
Leggi l'articolo La fede de i nostri avi
de Ugo Suman
 
Na volta no capitava
Leggi l'articolo La riunion de condominio
de Luigi Frosi
 
Storia in triestin
Leggi l'articolo El faro de la Vitoria
de Luigi Perini
 
“La Sguaratà” – Ciàcole polesane
Leggi l'articolo E ’ndemo dal dotore
de Romano Beltramini
 
Da Isola Vicentina (VI)
Leggi l'articolo El Monte de Genaro
de Gianni Fioretto
 
Da Verona
Leggi l'articolo Poca colaborassion
de Giacinta Dall’Ora