|
Da la Marca
L’ultima Rogassion
 |
| Àlbaro de le Rogassion in riva al Sil a Cendon de Silea. |
Giusto trenta ani fà, el giorno de San Marco del 1980, a Cendon de Silea xe stà fato par l’ultima volta el rito de le Rogassion co i canti e le benedission in latin.
Le Rogassion o benedission de i canpi in primavera par invocar la prosperità de i racolti jera stàe inventàe nel Medioevo da San Mamerto, protetor da i lupi e le se gavéa difuso subito in tuta l’Europa rural. Co l’avento de 1’industrializassion, de l’urbanesimo e soratuto de la motorizassion, ’sta usansa la ga perso de inportansa e el Concilio Vaticano II, co l’abolission del 1atin, ghe ga dà el colpo de grassia.
Ma tanti veci contadini ghe tegneva ancora a ’sta tradission milenaria e el piovan del paese, don Augusto Celebrin, el ga vossùo incontentarli riprendendo l’antico ritual, canbiando però l’itinerario par evitar el tràfico de le strade pi grande.
A la matina bonora la canpanela ga ciamà i fedeli e da la cesa xe partìa ’na procession che se slongava drioman che la passava davanti a le case colòniche, dove che jera pronti de i altarini co quadri de santi Protetori, fiori freschi e candele; in testa, al cortèo vegneva i zagheti co la crose astile, dove ghe jera i capài e i fabriceri co i farài inpissài, dopo ancora el prete co l’aspersorio e infine i parochiani, òmeni e done, che salmodiava le “tanie” o litanìe lauretane co invocassion a la Madona e ai santi. Ogni invocassion la jera conpletada da la richiesta “ora pro nobis” o “intercede pro nobis” o “exaudi nos” e nel canto se alternava el coro maschile a quelo feminile, che usava do tonalità diverse. Davanti a ogni altarin su la passada de ’na casa el piovan el se fermava, el benedìa co l’aqua santa, ripetendo le formule in latin: “A fulgure et tempestate, libera nos Domine”, “A peste, fame et bello, libera nos Domine”, “Ut fructus terrae dare et conservare digneris te rogamus Domine”. Prima de ripartir se benedìa anca un masso de crosete de legno che jera da picar ai àlbari o inpiantar ai quatro cantoni del poder o de la canpagna per tegner distanti fulmini e tenpesta. I zagheti i se incaricava anca de rancurar le oferte in natura de la fameja che vegnéa consumàe in conpagnìa davanti a la cesa a la fine de la cerimonia. I parochiani, anca quei zóvani, i xe stai contenti de ’sta esperiensa de vita e de fede, tanto che i ga deciso de continuarla, ma l’ano dopo xe morto el vecio piovan, figura legendaria che gavéa sfidà apertamente i Tedeschi durante la Resistensa; el so sucessor, un pretin fautor de la musica moderna anca in cesa no el ga acetà la proposta e cussì ’na tradission pi che milenaria la se ga perso definitivamente.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
L'Onestà?
No la pare pi de moda.
Da quelo che se sente e se lèze tuti i sacrosanti giorni – pur sfonzàndose de no scandalizarse – a se ga l’inpression de vìvare t’on mondo… co na smanegà de coroti e de disonesti. Che la sia propio cussì?
de Mario Klein
Da Vicenza
“Il mare” de Antonio Capuzzo
presentà da la poetessa Lucia Gaddo Zanovello
de Ines Scarparolo
Da Verona
La sapiensa del musso
de Lucia Cozzolino Masotto
|
