Da Belun

La cesa de San Pietro in Salce

Cesa de S. Pietro in Salce. (disegno de A. Burlon)

Anca sto an, come l’an passà, la cesa de San Pietro – Belluno centro, siora de ani, de storia… l’é a la “ribalta” par l’Arte: l’an passà par le “Pale lignée” de Andea Brustolon, st’an par le Piture de Sebastiano Ricci (1659-1734)… quadri realizà a l’inizio del ’700 (mostra dal 30 Aprile - al 29 Agosto 2010: an percorso espositivo che unisse Museo-Crepadona-Cesa de San Pietro).
Al Museo Diocesano de Feltre, an tut che “aggancia” a la grande Mostra in Laguna a l’isola de San Giorgio Maggiore, che riunisse na setantina de opere del grande pitore belunese. Tut pi che bel… Ma mi reste a la Cesa de San Piero de Salce, quatro chilometri da Belun, dove son nata e vivesta fin so i quatro ani, paese natìo de me Papà e de me Noni, tant che, spèce so i dì che al laoro no magna le ore… al nostro caminar, papà, mama e noialtre tosate, ne portéa a Salce… e có era al 29 de giugno, San Pietro e Paolo, ècone su a la cesa… dove, ancora adèss ritrove la “poesia de quei dì”.

A la Cesa de San Piero: Có sona a festa / su la canpana / e da Ti, San Piero, / tuti la ciama, / eco che riva / squasi in procession / grandi e picioi / co devozion. / I boce de corsa / i é su te ’n fià / st’altri , misuràndolo, / ècoli te ’l sagrà : / sto verde prà, che / da tut intorno, / se gode la vista / de tut an mondo. / “Al mondo nostro” / che l’é sol un: / “Salce, Piave, montagne, / la Val de Belun”. / Po’ strucàndosse entro / se va tuti in pressa / pronti a cantar / a San Piero la Messa. / … Al tenp al passa / i ani, se core drio… / Te sé senpre grando, / San Piero, / co le ciave da Dio! / …

La consegna delle chiavi a S. Pietro, pala de l’altar magior de la Cesa de S. Pietro in Salce (dipinto de Antonio Federici, Belun 1790-1869)

La cesa de San Piero de Salce – no se conosse con esateza l’època de quan l’é stà fata –. Sul portal d’ingresso principale é scolpide ste létere: MDLXXVIIII (1579).
Tradizion: me piase conservar la tradizion de “la barca de San Piero”: so an vaso bastanza grando, – na olta se doperéa an fiasco sfodrà – se lo inpienìa de aqua e la sera prima de San Piero se ghe butéa entro la ciara de ’n ovo e se lo metéa fora a l’aria, mèjo se in mèdo l’erba, e la matina del Santo eco in trasparenza la barca, co àlbero e vele che a le olte la riva su fin a l’orlo de l’aqua. Ancora ’dess có riesse a intravéderla là bela, la me dà na zerta emozion e… fin che la barca va… afidonse a Dio.
Ricordi: manco a farlo a posta, so al nostro caminar verso casa, dopo la festa, eco che rivéa an tenporal che féa dir: “Ma so Mare de San Piero no i podéa tegnerla là ancora an cin!?” Na storia popolare la conta che la “Mama de San Piero” i la mola fora da l’inferno par oto dì, verso i ultimi de giugno e che i tenporài de sta stajon i é causa soa... Mi no ghe ò mai credest a sto contar, parché se na Mama l’à mess al mondo an Santo grando come San Piero… l’era e l’é stata anca Ela na Santa grandissima… Però i tenporài i càpita e i é anca forti…

[torna sopra]