|
Da la Marca
Cachi e piostri
Ne i paesagi spoji e spenti de le nostre canpagne e de i nostri giardini ne i mesi de inverno spica vivamente i àlbari de i pomi cachi o cacheri che co i so fruti dorài de tante dimension i porta ’na nota alegra nel grisor de la stajon morta, inpissando l'aria freda col so color squilante.
Le xe piante cussì difuse, sia in canpagna che in çità, che vegnarìa spontaneo pensar che le sia ’na presensa remota ne i nostri paesi, ma no la xe propio cussì parché ’sti fruti i xe rivài da l'Orierte a le nostre tere poco pi de un secolo fà, a la fine de l'Otoçento, partendo co ogni probabilità dal brolo de qualche vila de l'entrotera venessian par sparpagnarse pian pian in ogni canton de la region, sia par motivi ornamentali che alimentari.
El caco el se ga aclimatà sia come cultivar, co le sotovarietà de i ragni che xe i pi gustosi co i so fruti grossi e striài, de i vanilioni e de i costolài, come pur soto forma de varietà inselvadegada, da i fruti pìcoli e vivaci ciamài piostri, co ’na deformassion del so nome sientìfico “Diospyros”.
A difarensa de altre piante, come le patate e i pomodori, i cachi i xe stài acetài subito da i contadini che, essendo da sècoli in lota co la fame, i ga intuìo subito i vantagi de ’sti pomi, pieni de proprietà nutritive e utilissimi ne i inverni che no finiva mai. I nostri veci i çercava senpre de avérghene qualche pianta viçin casa parché i diseva che un caco el xe pien de sostansa come un vovo e i cèi i lo magna volintiera.
Circolava ne i filò ’na storia fantasiosa secondo la qual a inportar i cachi dal Giapone pxe stà l’omo che ga portà in Italia la ex schiava negra Bakita, diventada po’ suora a Padova, santificada recentemente e protagonista de un telefilm.
In Giapone, dopo la seconda guera mondial, la pianta del caco, co le so foje lustre e la so scòrsa grisa, la xe diventada el sìnbolo del movimento antinuclear parché, quando che se ga posà el fongo de l'atomica sora Hiroshima e Nagasaki, l'unica pianta che ga resistìo a a desolassion la jerà propio el caco che continuava a drissarse contro el cielo lìvido; da quele piante xe stà ricavàe tante piantine che ogni ano le vien spedìe in ogni parte del mondo par celebrar gemelagi co le scuole de le çità che se dichiara de-atomizàe o denuclearizàe.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Ormai la xe na strage
Più se ghe ne parla e più se zerca de métarghe on freno a la violenza su le done, più aumenta i deliti contro “l’altra metà del cielo”. El fenomeno xe in continuo aumento: solo in Italia, vien copà pi de 100 done ogni ano. Cossa dire? Cossa fare? Cossa sperare?
de Mario Klein
|
