|
Editoriale
L’inportanza de i noni
Cossa saréssela la vita se no ghe fusse i noni! Chi xe che viziarìa i nevodi, ma soratuto chi xe che ghe farìa conóssare tuto chel mondo, in parte vèro in parte inventà, che ga bisogno de costruirse drento, on poco a la volta, chi sgnaoleti gnancora slatà?
 | | El posto e l’ora, par i noni, no i conta. (foto da Animatamente) |
La “Festa dei Nonni”, istituìa dal Parlamento nel 2005, fissà par el 2 de otobre, el giorno che se ricorda i Angeli Custodi, la vole propio métare in risalto el ruolo discreto de protezion de i noni, a la maniera de i àngeli.
Pensemo a quanto i xe preziosi in on tenpo de crisi come quelo de ’desso: fameje che non ghe la fa a rivare a metà mese col poco guadagno de na mama che va a stirare o netare le case, e on popà senza pi laoro. Chi xe che pol narghe drio a i fiòi ’ncora picenini, se non i noni, pronti a “zogare” da genitori, i tenpi suplementari de na partìa che par lori no finisse mai.
Ga reson quei che dise che bisognarìa farghe on monumento ai noni in tuti i nostri paesi, parchè i xe el pan e el late de l’infanzia. E come i àngeli, i noni no bandona mai i so cari nevodi: anca a sessant’ani i resta senpre “i so putini”.
Spesso se sente dire che i noni i xe come i putini. Difati la generazion de i noni la xe quela pi adata par narghe incontro a quela de i pi pìcoli, a capire al volo le pìcole emozion, i picoli bisogni, la gioia de le scoperte, a sanare la bua de i primi rabaltoni…
La medaja de i noni, però, la se òssida on pochetin, quando se parla de la tenereza de i noni cocoloni, el pi de le volte preferìi da i nevodi, parché i genitori, che ga la responsabilità educativa de i fiòi, i xe on fià pi duri. Xe anca vèro, ma ne le fameje indove che ghe xe i noni, i putèi ga on “dopo-scuola” ùnico al mondo; par lori se vèrze el libro de la vita, co le pàgine che parla de amore, de rispeto, de fadiga e de tanto corajo, de sacrifici e sconfite, ma anca de sodisfazion e vitorie.
I noni xe come i volumi de na enciclopedia, senpre verti dove i putèi ghe pole lèzare vece storie, fati realmente sucessi, ma anca pantomine, fòle, legende, tradizion, filastroche, tiritere, nine nane e canzon, che, sveji come xe i putèi de oncò, i podarà confrontare con tuto quelo che lori i sa za.
E parché no contarghe de come se zugava na volta quando no ghe jera la disponibilità de ’desso e se se godéa co gnente, co on “scalon” disegnà par tera, con zincoe sasseti fregà sora el zélese par ridurli a cubeti, con scaje de coarelo par rabaltare el “mago” e vìnzare na palanca, con na pueta fata de capoje, con on zercio de bicicleta o de mastelo, col móscolo o la tàrtara, col caroarmato ricavà da on rochelo, co la quarésema in scarsela soto Pasqua, co la s-ciopetarola de sanbugaro e le palòtole de stopa mastegà in boca…
Guai pèrdare l’ocasion de farghe savere ai putini quanto costava el pan quando gnancora esistéa la radio e la television, quando se obediva i genitori, quando a la doménega se ’ndava a messa e a dotrina, e come se spendéa de gusto la mancia del nono o de la mama… E i nevodi, na volta rinvegnù da l’incantamento, i ghe insegnarà ai noni come funziona el computer, come doparare internet, come mandare on SMS col celulare…
Cussì, noni e nevodi, i se rendarà conto de come va el mondo, de quanto el xe canbià in mèjo e in pezo. Spece quando la fameja la xe disgregà, el papà e la mama no i se soporta pi e i sta ogniun par conto soo. Come pure quando la presenza del nono o de la nona in fameja la xe massa pesante, l’anzianità la xe vista come on disturbo, na “interferenza” e ’lora, pitosto de restare parchegià in fameja, i va in ospizio, de so spontanea volontà o parché i ghe li porta.
Ma el cuore de i noni el sarà senpre come el cuore de i àngeli: on cuore che viene dal passato, che vive nel presente e aiuta a vardare al futuro.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
L’inportanza de i noni
Cossa saréssela la vita se no ghe fusse i noni! Chi xe che viziarìa i nevodi, ma soratuto chi xe che ghe farìa conóssare tuto chel mondo, in parte vèro in parte inventà, che ga bisogno de costruirse drento, on poco a la volta, chi sgnaoleti gnancora slatà?
de Mario Klein
Da Verona
Na storia in tenpo de guera
de Lucia Beltrame Menini
|
