|
Un artista nostran
Marangon per passion
 | | L’artista marangon Guido Borina co’ in man na piola soraman. |
|
 | | Riprodussion del cason de inissio ’800, dove xe nati i fradèi Borina. |
|
 | | Modelo de trebia, funzionante, del primo ’900. |
|
 | | Riprodussion de la Mercedes del 1928, oferta da Hitler a Mussolini, a Vila Pisani de Stra. |
|
Ècolo qua Guido, el scoagnaro de sinque selegati in casa, ansi cason Borina. Nato nel 1931 da Candido deto Canevèa, dinastia fra le più antiche in paese de Noventa Padovana, e da Concetta Cavinato, apunto in un antico cason de fameja che sorgeva su pochi canpi drio la spala sanca del canale Piovego. Lu xe uno de i ultimi artisti nostrani maturà fra le generassion de i ani Trenta, un bocia dotà de bon inzegno che se ga fato co le so man, tacando lavorare da garzon de botega ne la falegnamerìa tirà ’vanti da i so fradèi più veci, fin da l’età de 13 ani o poco più. Nel 1958 Guido Borina el s’à maridà con Redenta Sorgato, na tosa de bona fameja, nata anche ela t’un cason a le Gramogne de Camin (PD). Da la copia xe nati tre fiòi, do mas-ci e na fémena, ormai tuti sposà, e ’desso i se gode el soriso de tre nevodete. In quasi 60 ani de lavoro nel Mobilificio F.lli Borina, che produseva mobili pregiài, a furia de manejare seghe, piole, trivele, sgube e scarpèi, l’arte del marangon ghe xe entrà nel sangue e ghe ga rinfrancà na vecia passion che lu ga sercà de sfogare da quando fra fradèi xe stà deciso de serare l’atività.
L’artesan legnajolo, molà el lavoro e ormai co’ un bon peso de ani su le spale no se ga mai dà per vinto da l’età, ga rancurà tuti i so atressi doparài in botega per na vita intiera e, per no stare a man in man, el ga pensà de inpegnarse te la creassion de pìcoli ogeti, rigorosamente de legno, produsendo màchine e atressi agrìcoli, tuta na serie de fedeli testimonianse d’un recente passato che ricorda usanse e tradission de la civiltà contadina tramontà ormai da calche diesena d’ani.
Da l’eposission de le so òpere, fruti de l’inzegno e del so gran ’tacamento a i ricordi, spica na antica trebia in miniatura, funsionante a la perfession, dal batidore a la boca che buta fora la paja e a le bochete che scorla el fromento drento la mesura, un lavoro da incanto. Altro bel colpo de ocio lo ofre un barossin tirà da un cavalo par menare a spasso el massarioto in sità, come se usava na volta. A Guido, dal so serbatojo de inzegno creativo no ghe xe scanpà de mente gnanche calche riferimento storico, come la riprodussion autentica de la Mercedes del 1928, copia de la vetura oferta da Hitler a Mussolini ne la reale Vila Pisani de Stra, in ocasion del maledeto incontro de stato avegnù el 14 zugno del 1934, durante el quale xe stà firmà l’acordo de entrata in guera.
Donca ghe xe tanti modi per ricordare el nostro passato, con filmati d’època, con servissi fotografici o de crònaca, ma anche come ga pensà de fare l’artista Guido Borina, che ringrassiemo calorosamente, per ’verne spalancà le porte del so laboratorio de casa dove el ne ga fato tocare con man pressiose creassion artistiche pregne de emossionante storia locale.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
L’inportanza de i noni
Cossa saréssela la vita se no ghe fusse i noni! Chi xe che viziarìa i nevodi, ma soratuto chi xe che ghe farìa conóssare tuto chel mondo, in parte vèro in parte inventà, che ga bisogno de costruirse drento, on poco a la volta, chi sgnaoleti gnancora slatà?
de Mario Klein
Da Verona
Na storia in tenpo de guera
de Lucia Beltrame Menini
|
