|
Editoriale
No stemo lamentarse almanco a Nadale
Disocupazion, euro in crisi, borsa in calo, aziende che falisse, licenziamenti, proteste violente, amortizatori sociali, manca i schei par far balare l’orso… Ma che Nadale saralo?
Se, inveze de inpegnarse a fare calcossa de utile, soratuto par i altri e non senpre e solo par se stessi, se ghe va drio al fiume de parole, dite e scrite (TV e giornài)… ora de sera a se ga la sensazion che ne manca la tera soto i piè.
In sto modo, se finisse col nar via de testa, col védare senpre el bicere mezo vodo e se se sente co on piè in te la fossa.
Se sa che la màchina del progresso la màsena tuto e tuti, la xe come na aluvion inprovisa de aqua e fango.
Bisogna tacarse a calcossa par no finire te ’l bandoto del magnare del mas-cio. Ocore girare la testa, voltarse indrìo, vardarse intorno, capire che ghe xe chi sta pezo, e védare da dove semo partìi, ricordarse quelo che jèrimo, la vita che se faséa quando l’aria tajava le rece, el piato conosséa solo verze, e on pomo ghe sarava la boca al stómego.
Alora… se mandava zo el gropo, se se metéa le sgiàvare e se ’ndaséa in zerca de mus-cio par fare el presepio.
Altri tenpi, altre teste, altra mentalità, altri costumi e tradizion. Manco zimerie, manco egoismo.
E se faséa Nadale co ’l poco che se ghéa, ma co on calore drento che scaldava i pensieri e desfava el giazo del core.
Padre David Maria Turoldo el ga dito: “Non cercate le cose grandi, ma le piccole… fatte con il cuore.” Quanto xe vero! Quanto pi cuore gavévino na volta in quelo che fasévino!
Nò, no intendo dire che bisogna vìvare de rinpianti e nostalgìa par on mondo ormai morto e soterà. Digo che la memoria, el ricordo, el pensiero tuto personale che no more mai, ga da portarne so la strada del risanamento, contro la desolazion de on presente che varda solamente avanti.
Insoma pole salvarne solo e soltanto l’aiuto del passato. La vera economìa de la vita la pol nàssare solo da la moderazion. El mondo no ’l pole risòlvare i so problemi se no ’l selie la misura, la rinuncia, la virtù del saverse anca contentare, in nome de na ugualianza pi giusta.
Se semo convinti de questo, anca el Nadale che vien no’l sarà on Nadale de crisi, on Nadale morto, on Nadale in… bianco e nero.
El sarà magari on Nadale poareto anziché de benèssare e dunque on Nadale a la vecia maniera, fato de i sentimenti che ga sfidà i ani, el tenpo e i canbiamenti massa sguelti.
El sarà on Nadale che se se contenta de quelo, del poco che se ga, on Nadale che no se ghe sara la porta in facia ai boni propositi e, in sta santa ocasion, gnanca a Dio.
Eco, distante da i grandi regài, vizin a le pìcole robe vissùe e fate col cuore, el nostro no ’l sarà mai on Nadale de gnente!BON NADALE
A COLABORATORI, LETORI, INSERZIONISTI, EDICOLANTI E TUTI QUANTI
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
No stemo lamentarse almanco a Nadale
Disocupazion, euro in crisi, borsa in calo, aziende che falisse, licenziamenti, proteste violente, amortizatori sociali, manca i schei par far balare l’orso… Ma che Nadale saralo?
de Mario Klein
Memoria viva
I tran de ’na volta a Padova
El bel servissio che faseva i tran a elètrico da gran parte de la sità fin a i borghi e anca verso i Coli Euganei.
I treni de la “Veneta” portava i clienti fin a i confini de la provincia e più in là
de Gigi Vasoin
Da Rovigo
La Storia granda e quela pìcola
de Gianni Sparapan
Da Verona
El miracolo del “campo 60”
de Wanda Girardi Castellani
|
