Editoriale

Cantare per la vita
De solito se laora, se magna e se zerca de star ben par vìvare; anca in tenpi duri se fa de tuto par canpare el manco pezo. Servirse del canto par sostegnere l’idea che la vita xe on ben prezioso assè, el xe on gesto nobile e sociale

Propio par dimostrare che la vita viene prima de tuto, prima del guadagno, del consumismo, de la crisi, de la disperazion e de la morte, el 19 de Majo, a le nove de sera, a l’Auditorium “C. Pollini” de Padova, el Coro La Valle, insieme con l’AIDO, i ga organizà la XXIII Rassegna di Cori - Città di Padova.
Belo sto cubiamento tra chi dona la vose e chi dona “organi e tessuti” par darghe la possibilità de continuare a vìvare a chi ga bisogno de on trapianto. La se ciama “cultura del dono e de la solidarietà” par darghe speranza a chi xe restà senza: senza forza de conbàtare, senza voja de nar ’vanti, senza speranza de podérghela fare.
Eco ’lora che, dopo l’intervento del Presidente AIDO provinciale padovan, dr. Paolo Fasolo, da la presentatrice Emanuela Stefani xe stà invità uno a la volta i cori protagonisti de la serata: el Coro LA VALLE de Padova - direto dal M° Luciano Pengo, la Corale MORTALISATIS de Maserà (PD) - direta dal M° Alessandro Kirschner e el Coro LA SORGENTE de Morgano (TV) - direto dal M° Dino Zanatta. Tuti insieme – anca se ognuno a modo suo – i ga intonà on canto con un’unica finalità: sostegnere l’idea che ‘da una vita spezzata, un’altra vita può risorgere’. Stesso significato ga avùo el ricordo fato dal presidente del La Valle, Maurizio Paesotto, de l’amico Umberto Simonetto, sconparso da poco.
Aplausi, armonia, musica, canto e tanta emozion da dedicare a chi ga bisogno de un ragio de sole e de na parola, parché el cata na risposta al so bisogno de speranza par vìvare.
Questo xe el privilegio de chi afida, come in sto caso, al canto corale l’incarico de manifestare “la bellezza del dare”, vera terapìa de l’anima e del corpo.

El Coro “La Valle”. El Presidente del “Pollini”, Iles Braghetto, premia el M° Luciano Pengo.

El presidente M. Paesotto col presidente AIDO, Paolo Fasolo. El Coro “La Sorgente”.

La Corale “Mortalisatis”. L’Assessore a i Servizi Sociali del Comune de Padova, Fabio Verlato, con Emanuela Stefani.

(foto de Mario Bortoletto)

[torna sopra]