|
Da Bovolon (VR)
El vestito de la festa
I primi giorni de Agosto del 1951, na dumìnica dopodisnà, m’avéa messo el vestito de la festa, quel a quadreti pìcoli fato a campana co el col e la còtola inguarnìi de pizo e fermà, su de un fianco, co na ciapalina de veludo.
Spetava qualchedun, na persona speciale; par spetarla son ’ndà in corte, lì ghera un bòzolo de done che, senté sora de le careghine de paja meze scancanè, le se le contava. Me son messa in mezo a lore e, scoltando le so ciàcole, me guardava atorno. Ghera caldo e el color del tramonto el slongava le ombrìe de le case e de la pompa, querzendo quasi tuto el sélese; tacà a le porte de le fameje ghera zestèi de salata e da le finestre vegnéa fora el profumo de polenta cota.
Qualche dona la ’ndaséa a la pompa par torse l’aqua: l’era na pompa dirocà ma la faséa ancora el so dover, la daséa aqua a quìndese famée, no l’era mai ferma.
Intanto una de le done la me dise: “Gheto el moroseto?” Me son sentìa la facia imbrasà e go risposto de colpo:“Nò… nò…” come la m’avesse dito cissà cossa: l’era la malizia che se podéa ’verghe, alora, a sedes’ani. N’altra dona inveze la m’à dito: “C’elo? Come se ciàmelo?” e n’altra ancora:“Che mestier falo?”
Par fortuna, a salvarme da tute ste domande, è vegnù Piero e altri du so amici con la fisarmonica, i s’à messo a sonar: le done le s’à messo a balar fra de lore e i buteleti i à scumizià a saltar.
Mi, intanto, ò sentìo el campanel de na bicicleta; par qualche minuto me paréa che el cor el se fusse fermà: l’era lu quel che spetava, ghe son ’ndà incontro, lu l’à postà la bicicleta e s’avemo messo in mezo a la corte a balar.
Piero el sonava ‘Rosamunda’ ma sul più belo de la canzon , s’à sentìo un gniio… gneeo…, Piero l’era sparìo co la so fisarmonica, l’era cascà nel fosso!
Quanto rìdar!...
Cossita, con poco, se godéene assè, anca na olta.
1° premio, sez. Bovolonesi al Concorso “Veneti nel mondo 2006”, Bovolone-VR.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Ghemo paura che…
Par festejare i trent’ani de vita, xe stà fate tante bele manifestazion de cultura, tante iniziative par raforzare l’inpegno portà ’vanti dal nostro mensile. Xe stà, però, tegnù sconta la preocupazion che, dopo la festa, ghe sia boconi amari
de Mario Klein
Tradission
’Arda che xe rivà le giostre!
de Luigi Frosi
Da Thiene (VI)
L’emigrassion a pìe
Emigrare deventarà, presto, un mestiere...
de Bepin Daecarbonare
Da Verona
Za che te si mojo…
de Lucia Cozzolino Masotto
Da Verona
I 200 ani de l’Istituto Leonardi
de Lucia Beltrame Menini
|
