|
Da Adria (RO)
È scuminsià le scuole
Oto e vintisinque. Cortile de le elementari pien sgionfo de fiòi: mestre che sìgala, co i elenchi in man, par far sù la so coà: ghè quìi veci, ghè quìi novi, serca quìi ca no ghè; tut’un dafare e mare, pari, noni, zii che sa o che no sa a chi molarghe el piòcaro. Le mestre de prima i è senpre quele più ingatejà: le ga i nomi su i elenchi ma per lo più no le conosse i bocia a ele assegnà. Za, có Dio vole, se riva a far le file, o i s-ciapi, tanto l’è istesso. La canpanela l’è sonà e pian pianelo el cortile se svoda e le aule le se inpenisse. I parenti i se sfanta. El cortile se svoda e scuminsia le lession.
A mesogiorno e qualche minuto i genitori i torna: prima un pochi, po’ nantri pochi, fin che a pochi a la volta se fa sù na bela marùgola che, man man che passa i minuti, se fa senpre più fissa. Qualchedun scuminsia a brontolare: “Varda ti, l’è mesoboto e gnancora i vèrze la porta… Cossa s’i tienli a fare ste mestre? No i è gnancora stufe da stamatina?!” Par la verità le mestre le pol èssere anca sgionfe, ma fin che la canpanela no sona no se va fora da la porta. Finalmente drinnn e se spalanca el porton. Ansi la bidela vurìa spalancare el porton ma quatro sinque sucun, mas-ci e fémene sensa distinsion, i s’à cassà lì davanti par èsser i primi a ciaparse sù la so creatura, paura ch’i ghe la porta via! Come se tuti st’altri i fusse lì par stanpacio. In qualche modo scuminsia a vegner fora i primi; po nantra butà e nantra ancora. El porton deventa più libero e i grandi i lassa ’n bel coridoio vodo sul meso, cussì i fiòi pol vegner fora mèjo e più in pressia. A la fine i è fora da la scuola e po’ dal cortile squasi tuti: genitori e bocia. Resta solo qualche bocia più scalmanà che, nonostante el sigalare de so mare, el continua a córere intornovìa al cortile fasendo zig-zag fra i alberi. A un serto punto el se stufa anca lu e tuti i va a casa a magnare.
Pararìa che fusse finì lì. Ma no l’è vero. I orari inte le scuole no i è più quìi de na volta: oto e mesa-meso boto e s-ciao bela! Ancuò ghè el tenpo normale, quelo cosideto “prolungato” e quelo “pieno”. Se tuto funsionesse ben no ghe sarìa problemi: le fameje a seconda de le so sielte i podarìa portare e tore i so fiòi sensa problemi. Invesse no l’è cussì, almanco int’i primi giorni de scuola, ch’i pol èssere na stimana, quìndese giorni o anca de più. Ghè senpre problemi de aule, de insegnanti, de mense. Lassèvelo dire da uno che inte la scuola el ghè stà fin a sessant’ani. E ’lora succede che bisogna andare prima de l’orario canonico, o dopo, a seconda d’i casi. Se po’ i genitori i à sielto el tenpo “pieno”, che no ’l parte mai dal primo giorno de scuola per mi direta antica esperiensa, a ghe toca fare i giri de sant’Orsola. Porta i bocia a la matina, vai a tore a meso boto, ripòrtai a ’n doposcuola – pùblico o privato che ’l sia, pur che ’l ghe sia – e finalmente verso le sinque del dopodisnà, più o meno, finisse la maratona. E sicome luri – i genitori – el più de le volte i ga inpegni de lavoro con orari fissi, serte inconbense le finisse su la gropa de i noni, de i zii o de le done ch’i ga ’vù par casa quando i bocia i jera più pìculi e ogni tanto i stava a casa da l’asilo o da la scuola materna par colpa de qualche magagna stagionale o ligà a l’età. Fortuna che anca i fiòi i cresse e a un serto momento se pol darghe la ciave in scarsela, cussì i va e i vien sensa tanto più bisogno de assistenza.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
No ne resta che vardare in sù
Xe un tòco che vardemo basso, parché ne pare che ne manca la tera soto i piè. L’alternativa xe quela de provare a alzare i oci al zielo e sperare che on filo de luce, on lanpo, na sita, on s-ciantiso el ne ilùmina la strada da ciapare
de Mario Klein
Da Verona
Un indorador gran brao
de Giacinta Dall’Ora
|
