Da Verona

La vocassion

La me mena inte un negossio che fa tendensa, soto tera, scuro, sensa aria, con la mùsica sbarà a tuta maneta che insemenisse…

Ela ghe piase na sverlandusia trasparente, con tri volani, con le spaline e na scoladura che ghe mete in mostra el petesin, ancora in fase de svilupo…

Ghe telèfono a la me amiga par domandarghe se la ga tenpo de vegner con mi a tor un regaleto par na buteleta che va a la Crésema. La me dise de sì de boto e eco che semo sotobrasso in centro a Verona, contente de nar a far ‘siòpi’ (‘shopping’, dito da me mama) insieme. Mi avaréa deciso de conprar un bel vestitin e ela, che la ga piassè esperiensa de mi in tuti i canpi, la me mena inte un negossio che fa tendensa, soto tera, scuro, con quatro lucete fiape, sensa aria, con la mùsica sbarà a tuta maneta che insemenisse, e ela che la me conta n’altra de le so storie.
“Alora”, la taca, “propio la stimana passà son vegnùa in sto postesin con la Lessia (come la le ciama me mama che l’è anca so nona) parché la se catesse fora qualcossa da métarse intorno come regal par el so conpleano. Ben, semo stè dentro na matina intiera. La s’à proà na trentina de vestiti, uno piassè belo de quel’altro. I ghe staséa ben tuti, anca parché l’è in quel’età che se sbocia, i 16 ani, e in più la ga un fisicheto gnente mal. Ghera anca me marì, cioè so zio, che el s’à intajà de paca che la facenda la saréa nà par le longhe e perciò el s’à stravacà su na bancheta de fero e el s’à inpisocà. Insoma, meti e cava, cava e meti, a la fine l’è indecisa tra du e alora la me domanda consilio a mi e al me omo che intanto el s’avéa desmessià par via de i brontoloni de pansa da la fame. A noantri ne ne piase uno de stile ‘bon ton’ blu a fiori, col coletin tondo e na spana de màneghe; ela invesse l’è inmagà da quel’altro, na sverlandusia trasparente, con tri volani che i ghe sconde a fadiga le mudandine, con le spaline e na scoladura che ghe mete in mostra el petesin, ancora in fase de svilupo, de la creatura, che la pira un bel tòco ma, a la fine la se tol questo qua. L’è cosita sodisfata del so aquisto che la ne consuma de basi. Fato sta che la portemo sùbito a casa parché la ga pressia de mostràrghelo a so mama e a so nona Francesca che la vive con lori.”
“E ghelo piasùo?” ghe domando.
“Tasi e scolta!” la me ribate ela. “Te ghè da saver che sta me neoda, considerà che tute le so amighete i è inmorosè e che ela no l’è bona de arbinar sù gnissuni parché i ghe dise che l’è massa seria, la ga el teror che ghe vègna la vocassion de nar mónega che alora ghe toca tajarse i cavéi. Donca, rivemo da me sorela Marina, la mama de la Lessia, e lì ghè anca me mama, cioè so nona. La buteleta, rossa svanpà par la contentessa e l’agitassion, la core in càmara, la se mete intorno el so bel vestitin nóo e la sfila davanti a so nona (me mama) e a so mama (me sorela). L’è un figurin: la par na bànbola. Me sorela (la mama) la se lustra i oci, orgoliosa de aver messo al mondo na creatura conpagna (anca se no la ghe soméja gnanca un pel, ma l’è tuta so papà) e par ringrassiarne la ne basa mi e anca me so cugnà (me marì).”
“Marisi, me par de védarla! E so nona ’sa gala dito?” salto fora mi.
“So nona Francesca, cioè me mama, che l’è na dona de cesa, la l’à vardà de sbiesso, l’à alsà oci e brassi al cel, la s’à insegnà e el seto cossa l’à sentensià?”
“Cossa?”
“Bel giudissio a vestir na buteleta meza inuda! Mi gavéa ancora qualche speransa che la nesse suora, ma conbinà cosita ghe vol poco a far scapar la vocassion!”

[torna sopra]