|
Da Piove de Saco (PD) - On personajo al mese
Claudia Nicchio
 | | … le galine e le oche le sta insieme e le ghe fa i ovi… |
Ghe xe tanti modi de raportarse co eà Natura: se poe descrìvarla, se poe contenplarla, se poe imèrgerse drento de éa. Claudia Nicchio va ben al de eà de tuto coésto: coando eà scrive poesìa che apunto a eà natura eà se ispira, eà finisse par identificarse co éa, e eà deventa de volta in volta àlbaro, foja, tronco, raise, vento… Eà se sente parte ativa e partecipe in te ’na conpenetrassion e ’na spèssie de osmosi che ghe fa quasi canbiare identità. E coésto ghe permete de slargarse in te ’na atmosfera altra, ’na dimension che sconfina da i limiti de ’l nostro èssare umani. Eà xe ’na sensassion, coésta, che ghe dà eà possibiità de vìnsare chel maèssare esistensiàe che deriva da eà consapevoessa che el tenpo passa, che el tenpo voea inesorabilmente, esaltando el so deriderio de vita, eà so forsa e eà so determinassion che xe on segno evidente de eà so giovinessa.
Se trata de ’na poesìa che straripa de tension alimentà da ’na propension a ’na soitùdine che eà porta a vardarse drento, a anaisare ’e so emossion, ’e so reassion, i so pensieri, ’e so riflession. Ghe ne risulta ’na profondità straordinaria che te ciapa e te stravolge. Se resta prisonieri de eà so poesìa anca se no senpre se riesse a captare conpletamente el senso de ’e so alusion, a vìnsare chel so modo de dire e no dire, no sveàndose mai conpletamente, a capire cossa che eà spinze a usare acostamenti lessicài e de imàgini fora dal lingoajo comune, co costrussion sintatiche che stupisse pa eà so originaità.
Ma anca se tanti versi resta veà de mistero, se vien amalià da eà atmosfera che i riesse a creare, dàndote el senso de i sogni, de i pensieri, de ’e emossion che i ga creà.
AUTOBIOGRAFIE
Apro il contenuto della vita mescolando i colori:
fiori gialli, alberi blu, chiaro di luna,
il fumo del camino, le luci delle case,
i nostri volti e le loro autobiografie.
Claudia Nicchio
[torna sopra]
|
