|
Editoriale
Cara dona, te scrivo…
Te scrivo parché te sapi quelo che penso de ti. A te lo digo prima che te riva la mimosa de l’8 de marzo: no sta’ rifiutarla, ma zerca de farghe savere a l’omo che te vòi de pi, parché te vali tanto de pi!
 | | … a te scrivo, par védare s’a te si bona de desgatejarte fora on poco… |
Te confido che sti propòsiti xe pi fàzile scrìvarli che realizarli, parché so sta jostra a cadenele a ghe semo tuti du e, par desmontare, fin che la xe drio girare, a ris-cemo de sbrojarse dapartuto. Sarìa un pecà, spece par ti, proprio ’desso che riva la Festa de la Dona, farte védare in giro tuta sgorbazà, co la facia piena de strissi e de brose!
Ben, mi a te scrivo, par védare s’a te si bona de desgatejarte fora on poco da sto ingropamento de abitudini che se ga inraisà e che te fa pi male che ben.
Métatela via che l’8 de marzo risolva tuti i to problemi! Tra ti e l’omo ghe xe ’ncora massa robe che no va: ocore la piena convinzion che se se vole fare la strada insieme, no se pole mia ’verghe massa canarine par la testa. Par carità: a jera ora che l’omo el te molesse la caveza, ma me pare che ti te te si messa a córare a la cavalina e qualche volta a te te cati… a caval de le braghe.
A lo go capìo: te disi che oramai te riessi a cavàrtela da sola, ma sta’ ’tenta, parché xe pericoloso. Crédame: me fa tanto male védare la brutalità de qualche omo che sfoga su de ti la so viliaca bestialità.
E pensare che el mondo intiero ga bisogno de ti: l’omo par primo, la fameja, la socetà civile, el mondo del laoro, la polìtica, el volontariato, l’arte, la sienza, la cultura…, l’aria che respiremo, la stajon che intardiga a rivare… Te na parola sola: l’universo ga bisogno de ti, cara la me dona!
De ti, però, senza massa greji par la testa, co le còtole o co le braghe, vestìa o, al momento e al posto justo, come t’à fato madre natura, ma no par mostrare le to grazie davanti a l’ocio boaro del Grande Fratello o a L’isola dei famosi. Ghe vole na s-cianta de retegno!
El “feminismo” xe partìo con de le sacrosante domande, ma el xe finìo col far deventare merce el to corpo. Se vardemo ben, television e giornài i fa publicità con corpi mezi nudi de dona. Te ghe vole el senso de la misura: te ghè da sentire che te vali in quanto te si dona e no in base a quelo che te poi mostrarghe a l’omo.
No te poi negare che, anca qua da noantri, la vita de la dona la xe ben canbià: par la pi parte la ga on laoro fora casa; economicamente la xe pi indipendente; la pole far de manco de sposarse e restare single; la pole parfin vìvare la so sessualità senza catarse… “compromessa”: la lege ghe consente de decìdare se e quando deventare mama…
Par avere tuto questo, però, a te ghè pagà el dazio: te ghè perso on poca de la to spontaneità, te si costreta a èssare senpre pinpante, a mostrare che te si bona de fare la dona de casa e anca de fora casa, senpre bela, senpre magra, senpre zóvane, a la moda, sinpàtica, dolze, morbinosa, materna… insoma senpre drento te chela gabia che par sècoli te ga tegnù l’omo.
Sicome te vojo ben, te dago on consilio: ricòrdate che l’omo no ’l xe onipotente e che el riscato de la to dignità el ga da passare senpre traverso l’amore vèro. Varda ’vanti, fate rispetare, vòjeghe ben a la to libertà, purché no la te porta in òrbita massa distante dal pianeta de la to vita, e se te sfiora on sentimento de maternità, ciàpelo sul serio, parché quelo te poi vantare de poderlo fare ti e solamente ti!
E se sto mondo no ‘l vole incricarse, xe ben che ’l se ricorda che el futuro de l’umanità el passa ’traverso la dona!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Cara dona, te scrivo…
Te scrivo parché te sapi quelo che penso de ti. A te lo digo prima che te riva la mimosa de l’8 de marzo: no sta’ rifiutarla, ma zerca de farghe savere a l’omo che te vòi de pi, parché te vali tanto de pi!
de Mario Sileno Klein
Da Verona
Complicà come ’na Pasqua!
de Wanda Girardi Castellani e Mirco Castellani
|
