Venessia, tra fàvoea e realtà

Testamento

Venessia col caigo che un poco sconde e un poco fa védar.

Me sistemarò dentro l’Abassìa de ’a Misericordia, a Canaregio.

Venessia ’a ze fàvoea e realtà. Quasi tuti i se perde ne ’e beesse visìbii de sta cità che no ga uguàe in nessuna parte del mondo. Pochi i se perde ne i tanti segni che se trova sconti qua e là. Se perde in sta magia qualche poeta, qualche pitor, qualche musicista, qualche aviator, qualche diàvoeo.
Venessia cità “cosmopolita” fin da l’antichità, in realtà ’a ze ’a cità de i maghi e de ’e streghe vestìi e sconti in tante realtà missiàe col caigo che un poco sconde e un poco fa védar.
Venessia ’a xe me mare dove dopo ’a vita, vorìa anca che ’a fusse ’a me tonba, anca se no essendo che un povero mago sconossùo a i più, no gavarò più dirito parché ’desso vivo ’pena de eà del ponte. Par fortuna però, nissun me podarà inpedir de tornarghe per senpre co l’anima che no conosse confini.
Me sistemarò dentro l’Abassìa de ’a Misericordia, a Canaregio, dove spojà de i pensieri tereni, farò tanti ritrati de na persona che ’a me piaseva tanto, scrivarò ancora poesie invisìbii che se portarà via i venti e ’e aque alte, intajarò el legno par far statue vive, e ne ’a vissina cesa sconsacrada magnarò e bevarò su queo che xe stà l’altare in piera d’Istria. In pochi secondi voearò ovunque par vardar ’a me cità da l’alto, e se a ’e boche de porto el mar inrabià voesse entrar de forsa anca ne i canài interni, ’o fermarò.
Studiarò un piano par salvar queo che resta de ’a capitàe de ’a Serenissima, magari toéndoea sù e portàndoea a ’e so origini steari, dentro ’e case de i Dei. Finalmente riussirò a parlar co tute ’e statue e ’e piere che par tanti ani gavevo visto ma, non jero riussìo a ’ver el tenpo par fermarme.
Conossarò uno par uno tuti i leoni, che Napoleone ghe ga fato tajar ’a testa par sercar de umiliar Venessia conquistada. Parlarò co ’e fiame de ’e fornase de Muran dove ’a sabia deventava el vero più beo che se gavesse visto.
Sarò ’isiero come el peso de gnente, ma forte par sostegner ’e foreste de alberi inpiantài soto el fango par sostegner ’e case e i ponti. Ogni giorno costruirò na barca par regaearla a eà zente, cussì che par i canài ghe ne sia tante, come che gera ne i primi sècoi de vita de sto posto caro a i maghi.
Su un libro fato da ’a stanperìa de Aldo Manuzio, su carta bianca e pesante, farò queo che no so’ riussìo a finir quando che credevo de vìvar par senpre. Farò un “catalogo” de tuti i segni, ’e scrite, i messagi misteriosi scriti dapartuto, anca se visìbii a pochi, cussì da rèndar imortài tute ’e persone sensìbii che ga voesto ’assar el so messagio ne ’e budèe de sta cità.
Purificarò ’e aque parché i venessiani i possa tornar a far el bagno ne i canài come na volta. Versarò ancora San Sèrvoeo, parché chi sta mal no el sia abandonà par ’e strade a sofrir sensa speranse.
Inpiantarò vigne nel giardin de l’Abassìa e in tuti i canpi dove pol créssar calcossa da magnar. Farò córar i cavài par ’a cità e tornar tute ’e arti e i mestieri come xe scrito su i nizioeti. Ogni tanto vardarò verso San Michele par védar se xe rivà chée poche persone che prima de vegner qua gavevo stimà e ghe gavevo voesto ben.
’A Venessia de i maghi, de i diàvoi e de i leoni vestìi da artisti “infiniti” ’a sarà questa ne i sècoi dopo ’a morte de ’a me onda longa e ’isiera.

[torna sopra]