Quatro Ciàcoe
Mensile de cultura e tradission vènete
de Armando Mondin

Turismo e degrado venessian

’A nàssita e ’a fine de Venessia?

Eco un segno de inciviltà…
Eco un segno de inciviltà…
El mito e ’a legenda ’a festegia ’a nàssita de Venessia el 25 de Marso e, la fa risair a l’ano 421 d.c., quando che vegneva posada ’a prima piera de ’a cesa de de San Giacometo a Rivo Alto.
’E notissie ’e se perde tra ’e onde de ’a laguna parché, come autentica cità-stato e mito, ’a realtà no ’a pol èssar gnanca capìa ben a i nostri giorni, come el solco de confine tracià da Romolo e Remo a Roma.
Cussì da sto sentener de isoete a péo de aqua nasse quea che deventarà ’a più inportante cità d’Europa, ’a più granda potensa marinara, ’a capitàe de l’ arte del mondo conossùo.
El sogno de Venessia el ze Venessia stessa anca ancùo, nonostante ’e tante porcàe conbianàe da nialtri moderni. Sto posto incredìbie, romantico, popoeare, ma anca rafinà, de arte più granda, el continuarà a sonar ne ’e me rece come un canto imortàe projetà verso l’infinito.
Sarò par ’a me cità un guardian de ’e so beesse indifendìbii, de ’a so laguna in perìcoeo, come del so mar navigà da scoasse, plastica e navi grande come el canpanil de San Marco!
Gnente posso far par fermar venti, trenta milioni de persone che ogni ano pesta i masegni de i canpi e de ’e cai ma, posso scrìvar co tuta ’a me forsa par sigar de sta vergogna. Posso come D’Annunzio, Goethe e mieri de altri scritori imortài, anca se come ’eori no son, amar ’e aque verdi e i marmi e ’e piere de Venessia sensa timor de ’verme ciamà scritor.
Penso che se i sindaci e tuti quei che ga governà ’a me cità a vario tìtoeo i gavesse anca na minima parte del rispeto, del ben che mi ghe vojo a sta poesia ciamada banalmente cità, no i gavarìa podesto dir che no xe possìbie far queo che se dovarìa parché no se pol farlo par ’a burocrassia, el governo de Roma, ’e legi europee e cussì via.
Nessun perdono par questi che xe drio distrùger una de ’e poche maravege del mondo. Ogni momento, ogni passo me ricorda sti vandaismi materiài e spirituài. Sì, parché Venessia ’a xe anca spirito alto, fiero, iripetìbie.
Ieri, passando davanti a quea che gera ’a Capèa del Doge, go visto ’a base de dó coeone in marmo da i coeori verde e bianco-rosato che ’e xe drio sgretoearse. Cossa spetemo a méterghe man co amor e salvar ’a basìica de San Marco?
Cossa spetemo far vaer ’a democrassia e ’e legi, cussì da alontanar da Venessia: tuti i abusivi che vende a i turisti el gran par i coeonbi che el xe stà vietà par evitar che Piassa San Marco ’a sia piena de sterco; i lanciatori de razeti iluminài che te fa védar el cuor de ’a cità come na giostra; i venditori de borse false; chi te frega el tacuìn da ’e scarsèe; chi se senta su i scaini de ’e cese par magnar queo che i se porta da casa ’assando par tera tute ’e scoasse de sto sior pranso; chi pissa drio i cantoni, se ’ava nudi su ’e fontane davanti a grandi e putèi.
No se riesse gnanca a fermar chi, tanti, par na spece de nova moda i se buta ne i canài a noar, anca se i sa che l’aqua ’a ze sporca e ghe ze ’e pantegane. Cossa podemo far de più, nialtri venessiani, par vergognarse.
Ma el potere nò! I ga senpre na scusa, i passa ’e colpe, i scarica tuto a qualchedun altro e no i vol moear ’a carega.
Co tute ’e rogne che i ga, co tute ’e capèe che i conbina i vol restar a governar. Forse i se sente come un Doge, o conponente del Magior Consilio, o Patrissi. Ma sti signori de na volta i ’ndava a conbàtar, i ris-ciava ’a pèe ogni minuto. No i gaveva paura de far aplicar ’e legi, no i gaveva paura de condanar i ladri, i assassini, i trufatori. Al stesso tenpo i foresti i gera in quantità ma i doveva come i venessiani rispetar ’e règoe del bon vìvar, senò i vegneva messi in gaera o pezo.
Par questo Venessia antica ’a ze deventada imortàe, grassie a eà so zente, a i so governatori che vardava al ben de ’a Serenissima, no a i so pìcoi intaressi personài e de partito. Insoma i gaveva caràtare, come se dise, òmeni e done parché anca ’eore ’e gaveva na parte inportante ne ’a vita de Venessia. Tante volte ’e sostituiva i òmeni che gera in guera o via par mesi a pescar, nòbii e popoeane ’e gera forte, decise, sicure del so èssar fémene inportanti. Distanti da i so òmeni ’e govervava i beni, tanti o pochi che i fusse co capacità, oltre che curar co amor i fiòi.
Al giorno de ancùo nialtri moderni semo cònplici de tuti sti fati deitosi, semo assassini de ’a beessa, de ’a poesia, de l’ arte che soeo qua ’a ze cussì granda parché, come diseva Goethe, qua l’arte ’a se sposa insieme co ’a casa de fianco, co ’a riva de fronte, co el paesagio che ghe sta intorno. Par governar Venessia bisognarìa èssar amanti de Venessia. Strìnzarla co afeto, basarla e deventar eà stessa come in un sogno reae de puressa, audacia, coragio. Intanto che spetemo, ’a cità più bea del mondo ’a se sgrétoea, ’a xe ’assada in man a ’e varie mafie come quea del Troncheto che sfruta tuto e tuti e i venessiani i vien mandài via da Venessia par far posto al gnente. E infine soeo par fare naltro esenpio tra i tanti che se podarìa far, come faeo el sindaco a passar ogni giorno sul Ponte de ’a Libertà e a eà fine de questo, a eà altessa de girar par el Troncheto, no védar quatro metri quadrati de tera che dovarìa èssar na “aiuola”, ’assada co erbasse e quasi senpre piena de carte, botilie, invesse che piena de fiori par dar a chi che riva un pìcoeo, ma beo segno de civiltà. Méterla un poco a posto costarà 4.500 euro, no ’ndemo a tocar i grandi nùmari. Par questo ghe propongo al sior sindaco de métarghe eu metà de sti schei, st’altri i meto mi, cussì dimostremo co i fati ’e nostre idée, e no come senpre co ’e ciàcoe.

[torna sopra]

 

Archivio
2022 21 20 19 18 17 16 15 14 13 12 11 10 9 8 7 6 5 4 3 2 1  
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Febraro
Genaro
Dissenbre
Novenbre
Otobre
Setenbre
Lujo-Agosto
Giugno
Majo
Aprile
Marso
Genaro
Dissenbre
Novenbre
Otobre
Lujo-Agosto
Giugno
Majo
Aprile
Marso
Febraro
Editoriale
Leggi l'articolo Che belo el silenzio…
El silenzio el xe la roba pi straordinaria che esista in natura: no ’l xe solo mancanza de rumore, el ga na infinità de significati, el pole èssare studià e interpretà filosoficamente o artisticamente, ma senpre el vole dire: tasere, non parlare, pensare, concentrarse, scoltarse. Solo cussì nasse idée nove, decision inportanti e risposte sicure.
de Mario Sileno Klein
 
Da San Giorgio in Bosco (PD)
Leggi l'articolo No se scherzha cu i esami
de Luigi Antonio Zorzi
 
Da i Coli Euganei
Leggi l'articolo El cavadenti de stiani
de Gemma Bellotto
 
Turismo e degrado venessian
Leggi l'articolo ’A nàssita e ’a fine de Venessia?
de Armando Mondin
 
Da Vicenza
Leggi l'articolo Na bala passà in pressia
de Ines Scarparolo
 
Da Verona
Leggi l'articolo Erasmo da Narni: el Gattamelata
de Mirco Castellani