|
Da Verona
Erasmo da Narni: el Gattamelata
 | Monumento equestre al condotiero de “Compagnia di ventura”, el Gattamelata, in Piaza del Santo, a Padova.
|
A Padova, davanti la basilica del Santo ghè da secoli la statua de ’n omo a caval in armatura. Tuti i sa che l’è el Gattamelata… ma quanti i è che va più in là del nome?
Erasmo da Narni l’era nato in Umbria, oviamente a Narni, nel 1370. El so vero nome però l’era Stefano, anca se fin da gióane l’à sempre preferì farse ciamar Erasmo… El parché no’ se lo sa, e se ve vien in mente quel’altro Erasmo “da Rotterdam”, tegnì presente che ’l nassarà come minimo un secolo dopo. So papà Paolo el faséa el fornar, però Erasmo, senténdose portà più par el “mestier de le armi” che a infornar paneti e piadine, ’pena che l’à podù, l’à piantà la botega de fameja par ’ndar far el soldà ne l’esercito de Assisi. Poco se sa de quel primo periodo… a parte che a un çerto momento el “signore” de la çità, Cecchino Broglia, el ga regala la so armatura come premio par el valor dimostrà sul campo.
Nel 1416 troemo Erasmo, ormai conossù come “Gattamelata”, al seguito de Braccio da Montone ne le varie campagne militari che el faséa a Perugia e dintorni. Anca l’origine del so più famoso soranome l’è sconossù, probabilmente l’è un “quasi” anagrama del nome de so mama, Gattelli Melania. In quei primi ani Erasmo l’inparava l’arte de la guera, el se fasèa un nome e el metéa via schèi con el scopo de fondar, ’pena possibile, ’na so “Compagnia di ventura”.
Ma cos’èrele le “Compagnie di ventura”? Tra el ’400 e el ’500 tante çità italiane i era governà da le “signorie”: i Medici a Firenze, i Sforza a Milan, i Estensi a Ferrara, ecc. El più de le òlte par la “signoria”, più che mantegnerse ’n esercito in pianta stabile, l’era preferibile pagar (e profumatamente) de i soldà professionisti, solo par el tenpo che ghe serviva. Cusì in risposta era nate le “Compagnie di ventura”. De solito ’sti eserciti privati i faséa capo a un “condottiero” (cioè uno con la létera de “condotta”… l’equivalente de la “corsa” sul mar); i gavèa ’n armamento de prima selta e l’obietivo, oltre che el “soldo” (cioè la paga… da lì el termine “soldà”) l’era far “bottino”, cioè robar de tuto e de più. Anca parché le spese da sostegner i era alte: a l’epoca n’armatura la costava cifre astronomiche e comunque se dovéa rifornirse de armi e munissioni.
Tornando al Gattamelata, fin al 1427 lo troemo in Umbria, inpegnà ne le varie beghe locali… Quel’ano però salta fora un “cliente” inportante: el papa! L’è proprio al “soldo” de Martino V che l’ano dopo Gattamelata el riesse a conquistar Bologna. Anca col so sucessor Gattamelata el combate in nome del papa… però farse pagar da Eugenio IV l’è senpre n’inpresa esasperante. Cusì nel 1434 el nostro condotier el tròa finalmente un cliente che no fa problemi: la Repubblica Serenissima. I venessiani, pur de avérghelo i è disposti parfin a pagar lori i 10.000 ducati che el papa no ’l voléa sganciar. Ma se el cliente l’è “grosso” anca la “gata da pelar” l’è grossa: Venezia l’è in guera co i Visconti de Milan par el dominio del nord-est e el canpo de batalia l’è spesso… el lago de Garda. Cusì l’è proprio de quel periodo la so più famosa inpresa: quela de portar ’traverso i monti de la Val d’Adese 80 galèe venessiane fin a Riva del Garda, rimétarle nel so elemento e sbaraliar i milanesi. Dopo 4 ani de guere, con vari alti e bassi, finalmente el 28 setembre 1438 el condotier l’entra trionfalmente a Verona.
Elevà ne la nostra çità al grado de “comandante generale de le fòrse venete” no ’l fa gnanca tenpo a sponsar che za el deve ricominçiar la guera. Ma strapassi del genere a setant’ani i è massa anca par un fisico forte come el suo: a Tòrbole el 2 genar del 1440 el vien fulminà da n’emoragìa cerebrale. ’N altro el sarìa morto… lu nò. Portà prima a Verona e po’ a Padova a l’inissio par che ’l se riciapa… La Serenissima la ghe paga parfìn la “malatìa” e tute le cure possibili, ma el 20 giugno del 1441 ne la so casa de via del Domo a Padova, dopo èssar sopravissù par ani su i canpi de batalia, el Gattamelata el mòre serenamente nel so leto.
Nel testamento el condotier el lassa tuta la so fortuna al fiol Gianantonio… con la clausola de èssar sepelì ne la basilica del Santo. La mojer, Gentile da Leonessa, la ghe fa anca far el monumento. Par el laoro vien contatà uno de i massimi artisti de l’epoca: Donatello. Che oviamente el fa un capolavoro. La statua equestre in bronso fòra de la basilica l’è la prima del so genere da i tempi de i antichi romani (pensemo al Marc’Aurelio a Roma) e, come diséa a l’inissio, la conossemo ben.
E la guera con i Visconti? La continuarà ancora par dies’ani, finendo solo nel 1454 con la “Paçe de Lodi” e con el dominio de Venezia fissà finalmente fin a oltre Brescia.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Che belo el silenzio…
El silenzio el xe la roba pi straordinaria che esista in natura: no ’l xe solo mancanza de rumore, el ga na infinità de significati, el pole èssare studià e interpretà filosoficamente o artisticamente, ma senpre el vole dire: tasere, non parlare, pensare, concentrarse, scoltarse. Solo cussì nasse idée nove, decision inportanti e risposte sicure.
de Mario Sileno Klein
Da Vicenza
Na bala passà in pressia
de Ines Scarparolo
Da Verona
Erasmo da Narni: el Gattamelata
de Mirco Castellani
|
