Da Arzergrande (PD)

Biologico

Comunque sia, anche i prodoti coltivà co antiparassitari i xe coltivà co un contròeo sanitario…

El formento, me popà, eò tajava co ’l messoreto…

Confidemo che tuti i ghe daga na man a sti zóvani a vìvare anca de tera…

De sti tenpi va de moda el biologico. Se ne sente parlare un fià dapartuto e in tute ’e maniere. Par radio, teevision, internet. Pare quasi che tuto so ’l giro de pochi ani sia deventà biologico. Tanti e senpre de pi, coltiva eà tera senza sojussion chimiche. Co tanto de certificassion so ’e etichete no podemo che fidarse. Oncò pare che gabia na inportanza vitae nutrirse de biologico e chissà parché, me domando, eò gavemo capìo soeo da pochi ani.
Specifichemo ansituto che, disendo questo, no se voe sviire tuto el resto, parché, comunque sia, anche i prodoti coltivà co antiparassitari e altri agenti chimici, i xe coltivà co un contròeo sanitario tae da no infierire so ’l nostro organismo, o almanco cossì eà dovarìa éssare.
Disemo che nel contesto, oncò xe pi considerà el biologico, ma vojo anca fare sta considerassion, pi che altro par riportare testimonianza personàe de queo che, a i me tenpi, jera el biologico.
Eòra no ’l xe ciamava cossì e no ghe jera na distinsion de coltivassion parché l’unica roba che ’ndaseva versà so i canpi jera, (chi che eò gaveva) el leame de casa. Ghe jera chi che gaveva na vachéta, un musso, un porséo e se rancurava eà paja de eà staea dove che viveva sti animài.
El formento, me popà, eò tajava co ’l messoreto, lo portava casa co ’l careto tirà da na mussa che eà porto oncora so ’l cuore da tanto “umana” che eà jera. Eò stesso el faseva co ’l formenton, parché el se spanociava so ’l canpo, el se meteva ne i sachi de tea e dopo, senpre co ’l stesso sistema, el se portava a casa. El canpo de erba medica (spagnara) el vegneva tajà co ’l falsin, messo a muci co ’l rostéo e tirà sù co eà forca.
No ghe jera ancora i tratori, eà tera vegneva arà e semenà co ’l cavaeo che ’l tirava l’aratro e dopo eà semenatrice.
Tuto questo par dire che pi biologico de cossì no se podeva.
Oncò fare biologico eà ne pare na roba pressiosa e fora da i schemi de ’a evojussion e, par serti versi eà xe cossì, ma, in fondo, eà xe eà roba pi naturàe de sto mondo.
Se sa che a fare biologico no se fa quantità.
Se usa eà paroea “biologico” parché oncò xe de moda cossì ma se podarìa benissimo dire, apunto, “prodoto naturàe de ’a tera”.
Tanti zóvani, dopo varie peripessie par trovare un lavoro i ga riscoperto i vaeori de ’a tera.
Dopo eà corsa sfrenà par sfrutarla, par farghe produre de pi, finalmente qualcuno se ga incorto che eà tera xe come na mama e bisogna voérghe ben. El tenpo ne dirà se tuto questo poe recuperare el tenpo perso a farghe del mae.
Par ’desso ghe xe un fià de pi bona volontà de prima. Confidemo tuti che anca ’e autorità se fassa parte ativa e daga na man a sti zóvani a vìvare anca de tera; che no i se senta pi sviìi se qualcuno dovesse ciamarli contadini, parché eà tera e soeo eà tera dà tuto queo che serve par vìvare, proprio come che fa na mama: co tanto Amore.

[torna sopra]