No se pol desmentegarse

Al de là del mare e de le montagne

El paradiso de Falcade.

Le Pale de San Martino.

Quela che lesemo sta volta, la xe na esperiensa vissuda da Vitalina Maria Frosi e contà nel so libro Racconti di un tempo memorabile; la scrive quelo che la ga vissùo na volta che la xe stà in Italia co’ de i amissi e la xe ’ndà a fare na gita a Falcade, passando dal mare a la montagna.
Xe da vèrzare na parentesi par dire che nel Brasile del Sud el clima xe stranbo co le stajon difarenti da le nostre: xe vero che d’istà se more dal caldo, ma gnanca d’inverno se more dal fredo. Ne la stajon freda, capita poche volte che de note se riva soto zero (da contare su i déi de na man) e a la matina tuto xe coerto da la brina come da nialtri, che però la sparisse ’pena che spunta el sole co i so 25-30 gradi. Là la neve no i la ga mai vista anca se i core sùito a fotografare quando la brina inbianca la sità o el paese. Me ricordo i tiri che ga fato Marciano, un nevodo brasiliero, quando che lo go portà sù al rifugio Lagazuoi in te la so ultima visita in Italia: el saltava su la neve come un cavareto tanto da ciaparlo che no l’andasse in pericolo. Questo par dire che la neve i la cognosse solo par ’verla vista in television o ne le cartoline e che i resta inmagà có i ghe mete i pìe insima: “Incredibile, ma vero!”
Jera pien inverno e Vitalina la jera ospite in casa de amissi a Venessia. Questi i gheva na caseta in montagna a Falcade e, par fare calcossa de novo, el sabo i xe partìi par passare la doménega su la neve. In màchina tuto xe stà belo: el caldin de la vetura jera providensiale, i panorami incantevoli e el tràfico scorévole. Par la Vitalina jera tuto novo e anca la conpagnìa la jera bona: dó persone studiàe, gentìi e acolienti in te un viajo pien de novità. In te na curva de la strada spunta un lago tuto giassà, lucido e splendente. Sora al giasso ghe jera un osèo che svolassava e el se posava squasi a balare su chel specio slusegante. In chel momento ghe pareva de èssare tornà putèa: la vedeva la so casa d’inverno quando nel prà na possa de aqua se giassava apena apena e la se divertiva a tirare qualche scaja che la sprofondava sùito, ronpendo la crosta leziera del giasseto. Sto ricordo ghe ga fato vìvare la stessa emossion provà da putèa da st’altra parte del mondo al de là de l’oceano.
La màchina, intanto, la continuava la so corsa verso Falcade e la neve oramai gheva inbiancà la strada e tuto el panorama jera romai coerto de neve. Drìo la strada ghe jera tanti sachi de sale che i sarìa servìi par fassilitare el passajo de le màchine e de la zente a pìe. Rivài che jera squasi sera, la xe restà incantà a vardare le montagne pi bèe e pi alte che no la ghesse mai visto in vita sua. I so amissi ghe mostrava le cime intorno, ciamàndole par nome: le Pale de San Martino co ’l Cimon, el Rolle, el Focobon, el Mulaz, el San Pellegrino, el Rosetta e altre ancora. Par la Vitalina el xe stà el primo vero incontro co le Dolomiti. Falcade, in mezo a chei giganti pieni de neve, el ghe pareva na roba granda, un logo de pase e de chiete, un vero paradiso.
Sandro, el paron de casa, el ga tolto sù de i grossi tòchi de legno par el camineto: jera necessario scaldare la casa. Intanto che ’l fogo faseva el so dovere, Sandro el ga tajà zo raquante fete de salado par un spuntin, qualche ciopa de pan biscoto e un bel goto de vin. Traverso i veri se vedeva i cuerti de le case pieni de neve. A chel punto la Vitalina ga capìo che le cartoline che la gheva ciapà da qualche parente italian le jera vère, le jera reali e chei panorami esisteva par davero. Dopo ’vere senà, tuti in leto presto, par scaldarse e anca parché strachi dal viajo. La matina drìo, la conta la scritora, i xe ’ndai a fare marenda al bar davanti, in piassa de la cesa: un bel capucino e na brioche calda; intanto le canpane le sonava a festa e se sentiva l’eco in mezo a chel mondo de silensio e de pase. Momenti de gran emossion, la dise la Vitalina, squasi da tignere el respiro par gòdarse tuti; istanti cussì magici mai vivesti prima che i ghe xe restài par senpre ne la so memoria. Par tuto el dì la xe restà come inmatonìa; i amissi i la ga capìa e no i ga volesto rónparghe l’incantesimo fin quando xe rivà l’ora de tornare a Venessia. Rivài a Belun, Adriana e Alessandro, i ga aprofità par fermarse da i parenti; anca là Vitalina se ga catà come a casa sua: la stessa lingua che la gheva inparà a casa da i sui anca se da st’altra parte de l’oceano.
El sole pian pianelo el se scondeva drio i monti e, sensa córare massa in pressa i xe rivà a Venessia; lassà come al solito la machina in Piassale Roma, Sandro ga tirà la barca a riva par fare l’ultimo tòco e rivare casa, proprio davanti a “La Fenice”.
Jera finìa cussì chela passegiata maraviliosa e scuminsiava, par la Vitalina, naltro mondo de ricordi che strapassava el mare e le montagne oltre i confini de sto mondo.

[torna sopra]