|
Editoriale
Ano novo, vita nova. O quasi?
Chel vecio proverbio che se sente a l’inizio de l’ano che ’l gabia ancora valore o che ’l sia solo na spintonà par nare ’vanti? Epure ogni ano che passa calcossa de novo el ghe xe: l’età, la TV che da “digitale” la deventa “satellitare”, i schei che da euro i deventa “bitcòin”… Che ’l sia questo el “novo” de st’ano?
 | | Vuto védare che st’ano xe la volta bona che… |
No se pol negare che, co la velocità che canbia le robe al dì de oncò, tante volte te pare de vìvare te nantro mondo.
Te ’l novo libro de 366 giorni ghe sarà tante ocasion par canbiare vita e darghe la svolta che la se merita. Ma, prométare de canbiare, xe come zugare co chela baleta tacà a l’àstico: te ghe dè on colpo drito e inte on àtimo la te torna indrìo roersà, te la lanci verso tera e la te vien ’dosso de colpo, rivando da l’alto.
No xe facile decìdare de canbiare vita. Abitudini e usanze no le se canbia, girando la pagina del mese so ’l calendario: ghe vole ben altri motivi e, soratuto, che no se sia obligà a farlo.
Anca se da novenbre de l’ano vecio e fin a aprile de l’ano novo mi decidesse de no nar fora de casa co la màchina, la lege la me òbliga a montare le gome da inverno, parché in sto periodo podarìa capitare, anca contro volontà, de dover nare fora in màchina e, co la neve, co ’l giazo e co ’l fredo bisogna garantirse e garantire sicureza. Questo el ga on costo e no te lo fè volentieri, parché te si obligà a farlo, come a pagare el bolo.
E anca se el canbiamento el dipende da mi, la xe senpre na musica difìzile da sonare: ma mi sòi bon? me convien? cossa dirài quei che me conosse?
Se podarìa anca provare. E se sbalio, che figura ghe fazo? Quela del poro sugaman?
Metemo che decidemo de canbiare, concentràndose solo so na roba… metemo, so ’l laoro. Se se dedichemo anima e corpo so sto inpegno, coremo el ris-cio de trascurare tante altre robe altretanto inportanti: la fameja, i amici, la salute, el tenpo libero…
L’alternativa la sarìa quela de puntare su tanti boni propositi: fasendo na roba a la volta, magari se riva a qualche risultato. Ma no xe dito! No se xe sicuri!
E ’lora se capisse che ghe vole equilibrio, par no rimandare senpre a doman o a l’ano che vien. La conseguenza positiva de l’equilibrio xe quela de darghe fiducia e speranza a la propia esistenza.
E a proposito de “fiducia e speranza”, prima che ne gira la testa al pensiero de dover decìdare el canbiamento, femo na roba giusta, anzi dó o tre robe giuste:
– prima ringraziemo l’Editore che ne dà la possibilità de publicare quelo che scrivemo;
– dopo ringraziemo tuti i nostri colaboratori che, co i so scriti, i continua a far vìvare na parte del nostro passato;
– po’ ghe disemo grazie a i nostri letori abonati ch’i ga la pazienza, mese dopo mese, de spetare che el raro postin el meta te la so borsa anca la nostra rivista par portàrghela al destinatario (che no capimo parcossa no la vègna tolta sù par tenpo, visto che la pesa manco de 200 grami).
Eco che, senza volerlo, a ghemo espresso on desiderio e on augurio de canbiamento par l’Ano Novo, con la speranza… che ’l se realiza.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Ano novo, vita nova. O quasi?
Chel vecio proverbio che se sente a l’inizio de l’ano che ’l gabia ancora valore o che ’l sia solo na spintonà par nare ’vanti? Epure ogni ano che passa calcossa de novo el ghe xe: l’età, la TV che da “digitale” la deventa “satellitare”, i schei che da euro i deventa “bitcòin”… Che ’l sia questo el “novo” de st’ano?
de Mario Sileno Klein
Da l’Alta Padovana
I 800 ani da ’a rifondazhion de Sitadèa, tra storia e fantasia
de Luigi A. Zorzi
|
