|
Da Arzergrande (PD)
Nessun gavarìa mai pensà…
 | | Vardavo ’e distese de margherite e pensavo… |
El xe un tenpo, questo, che nessun gavarìa mai pensà de vìvare. Se qualcun me ’o gavesse ’ito, no ghe gavarìa credùo.
Podendo farlo, so sti dì, so’ ’ndà a caminare so i me canpi, visto che par queo no ghe xe restrission.
Vardavo l’erba del prato, ’e distese de margherite e pensavo che no poe éssare vero queo che semo drio vìvare… Dopo me so’ dà un pissegon par rèndarme conto e go capìo che, purtropo jera tuto vero. A eà fine me so’ convinto, anche parché bisogna convìnsarse…
Tra un programa e ’n altro, i ne martèa el sarvéo tuto el dì e par questo, no taco gnanche più eà teevision. Se sta mae savere che ghe xe cossì tanta zente che sofre e pensare che al posto suo podarìssimo éssarghe noialtri. Sì parché no basta tute ’e atension de sto mondo. Te poi ’ndare a fare un fià de spesa san e vegnere casa maeà.
’Ndavo a trovare de i anziani, setimanalmente, prima che no se podesse mòvarse e ’desso i ciamo par teèfono ma no eà xe eà stessa roba. I ga bisogno de ’a presenza fisica, de qualcun che i varda so i oci, che ghe tegna eà man, che ghe fassa un soriso… I pi anziani i sofre tanto sta roba parché prima almanco, qualche passo i ’o faseva; par quei che jera oncora boni de ’ndare in bicicleta, i faseva chel mezo chiòmetro tanto da poder dire de ’vere visto un tochetin de mondo che no ’l fusse senpre queo.
E comissio a convìnsarme anche mi che xe beo ’ndare in piassa a bere un cafè o spostarse so ’l marciapiè a védare eà sieve de lauro in fiore o ’e aioe comunài tenpestà de bociòi de rose. Có te si zóvane a sti particoeari no te ghe pensi, no te ghe fè caso, ma quando l’età scanpa via, anche el pi pìcoeo de i fiori poe donarte solievo, come so sto caso, come so sto tenpo cossì pien de gnente o de robe nove che no savemo cossa che ’e sia. ’Desso semo “obligati” a ’vere tenpo e xe mèjo che no ghe ne butemo via gnanca un fià. Cossì, tante robe che prima no fasévimo, ’desso ghe demo eà so giusta inportanza, conprese ’e persone che prima no saeudàvimo, ’desso ghe femo un aceno co eà testa.
E tuto torna. So ’e strade no ghe xe pi longhe fie de màchine e so i aparechi posti a i incroci de ’e strade el risultato xe che se registra aria quasi pura. Eà nostra tera, eà natura, visto che noialtri no se decidévimo de fermarse parché bisognava ’ndare senpre de corsa, eà gavarà ’ito: “’Desso ve fermo mi!” ’Desso el cièo el xe pi lìnpido, i fiumi, i mari i xe meno inquinà… Resta da capire na roba: se veramente anche l’omo xe canbià.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Tenpo de selte
Quelo che che ne se para davanti el xe on tenpo de selte. Naremo mèjo o pezo? No se sa! Xe oncora presto par dirlo. La pi parte dipendarà da quelo che ghemo inparà te i dì de clausura. Dovaremo ’bituarse al canbiamento, rinunciando a zerte esagerazion e comodità che prima le ne paréa robe normali.
de Mario Sileno Klein
Rovigo viva
El teritorio de la Grande Quercia
de Lidia Maggiolo
Da la Bassa Padovana
On tratore salva pecatori: el Landini
El Landini a testa calda el ga rivoluzionà l’agricoltura dopo i poco afidàbili tratori a petrolio, che i morìa de colpo in mezo al canpo, tiràndose drio tante maledission!
de Roberto Soliman
|
