Cese de Padova

La cesa de San Tomaso

Esterno de la cesa de san Tomaso Becket.

Veduta interna de la cesa de san Tomaso.

Antonio Vivarini, Madonna in trono con Gesù Bambino, 1443 ca.

Cesa e pinacoteca (particolare).

Passando da Piassa Castelo a ponte Sant’Agostin, ve trovè su na strada ancora co i cógoli, ciamà via San Tomaso, e al nùmaro 3 ghe xe la cesa de San Tomaso. La cesa de San Tomaso, e più precisamente de San Tomaso, co na eme sola, Becket, la xe stà fata nel XVII secolo su na costrussion za esistente e uncò la podemo considerare uno de i gioièi più pressiosi del baroco de la nostra sità.
Quela che za esisteva, senpre dedicà a San Tomaso, ne consente de tornare indrìo fin al 1200. Quela atuale la xe stà progetà dal padre Gasparo Colombina, finìa nel 1640 co l’oratorio portà a termine nel 1660 circa.
La cesa e la so parochia le xe stà portà ’vanti fin al 1890 da i preti secolari de San Filippo Neri. Sta Congregassion qua a Padova la xe stà fondà dal Padre Antonio Maria Cortivo de Santi e la gaveva la so sede nel convento che gera
vissin a la cesa apunto de San Tomaso. Nel so interno xe conservà come reliquia el core de San Filippo Neri e un so ritrato miracoloso che nel 1632 ga sudà 27 volte. Dal 1890 la cesa e la parochia le vien tegnù da i preti secolari del Vicariato de la Catedrale.
L’òpara de i preti Filippini xe stà talmente inportante che tra la vecia popolassion de Padova la cesa xe ancora nominà come quela de i Filippini, parché sti preti ga senpre fato, oltre che l’insegnamento religioso, anca quelo de l’istrussion elementare de i tozeti, l’assistensa a i malài e a i vecioti e la pratica de la musica e del canto che conpagnava i insegnamenti spirituali.
Quanto la xe sobria, dirìa quasi anonima, a l’esterno, cussì la xe rica al so interno e la xe considerà pressioza par le òpare artistiche e reperti storici che la ga.
A l’interno, fra la cesa e la so canonica, ghe xe na vera e propria pinacoteca co òpare de Luca da Reggio, Giovanni Battista Pellizzari, Francesco Maffei, Ferrari, Bonaccorsi, Pietro Liberi e Onofrio Gabrieli, co un crocefisso atribuìo a Donatello e co i dó meraviliosi angeli in preghiera a fianco de l’altar magiore, realizà da Antonio Bonazza. Sul sofito de la cesa ghe xe tacà quìndese tele del XVII e XVIII secolo che le conta i misteri del Rosario.
Ne la sacrestia ghe xe anca na stupenda “Madonna in trono” de Antonio Vivarini, lassà in eredità a i padri Filippini dal nobile venessian Giuseppe Pichi. L’autore gaveva in realtà dipinta sta tela par la cesa venessiana de San Moisè insieme a dó ante laterali. Ste ante xe finie a la “National Gallery” de Londra mentre la tela xe finìa, come go dito, a la cesa de San Tomaso.
Ghe xe, inoltre, in te la canonica na inportante colession de reliquie, de tessuti, aredi liturgici e oreficerie considerà una de le più estese del mondo, fate da più de mile tòchi.
Contarve de ste robe xe veramente interessante, ma bisogna èssarghe in sta cesa par sentire tuto el fàssino de l’anbiente.
Entrando e passando da altare a altare nel silensio de la devossion e ’ndando drento in sacrestia te te senti trasportà in un altro mondo. Inte un mondo carico de arte e de religiosità che no te te imaginavi.
Come go dito, par fora sta cesa no te dize gninte, ma ’ndando drento te resti imagà da le òpare de arte che te poi védare e da tute le robe in esposission artistiche e reigiose.
’Ndè e dopo me savarè dire la vostra inpression.

[torna sopra]