|
Da la Marca
Ricordo de Marcello Cocchetto
 | | El poeta Marcello Cocchetto, durante l’apuntamento poetico “Inno a febbraio”, con testi trati da Cordialità Trevisana. |
 | | Premio San Libero 2015 - Marcello Cocchetto e Giorgio Fantin, con la sorela Wanda e un’amica. |
El sete de setenbre 2020 ne ga lassà par senpre, a la bela età de novantadó ani, vissùi co spirito e inpegno fin a l'ultimo, el poeta Marcello Cocchetto, uno de i personagi pi rapresentativi de la cultura e de la bonomia trevisana.
Dotà de estro e sinpatìa contagiosi, elegante e pronto a la batùa, el gavarìa podùo co la so parlantina e el so entusiasmo diventar un gran presentator de spetàcoli e eventi, se un grave incidente stradal no ghe gavesse rovinà la vita. Comunque co ’l so caràtare gentil e disponibile el xe riussìo a organizar vari momenti de la vita pùblica de Treviso.
Co ’l so amigo Arturo Malossi el ga ideà i gran concerti de Ferragosto in Piassa Madona Granda a partir dal 1980, avendo come "padrino" l’ilustre tenor Mario Dal Monaco.
Senpre co ’l so conpare Malossi el ga fondà el duo comico "Lacrima e Rimorchio" che par la Pro Loco Tarvisium portava ’vanti i vejonçini par i putèi, a conclusion del Carneval Trevisan al Teatro Comunal.
Tanti trevisani i se ricorda ancora el so modo ironico de comissiar le so cronache spassose: "Qui RAI tele-confusione. Buona sera tutti, signori e signore." Anca ne i ultimi ani, có el jera in carossela ne la Casa de Riposo de Santa Bona, el ghe faséa alegría a tuti i ospiti de la strutura co ’l so inesauribile repertorio de barzelete e de fredure.
El ga senpre presentà i spetàcoli del Gruppo Folcloristico Trevigiano sul palco in Piassa dei Signori e le premiassion de i cari mascarài e ne i intervali de le manifestassion el lezeva le poesie in dialeto de i amissi del Cìrcolo de poesia EL SIL, del qual el xe stà redator e colaborator par tanti ani, oltre che assiduo letor fin a l'ultimo.
Par la rivista de "El Sil" el ga fato interviste in dialeto a poeti e artisti, publicàndole in un volumeto intitolà Il cuore dei poeti del Sil nel 2012.
Nel 2015 el ga dà a le stanpe un so libro de poesie, Cordialità Trevisana dove che el dimostra la so maestria sia ne le conposission in lingua che in vernacolo.
Marcello xe stà anca ator, particolarmente intaressà al repertorio dialetal, specialmente quelo goldonian che lu el interpretava co la pi gran naturalessa e el gavéa come amiçi personagi del calibro de Wanda Benedetti e Toni Barp.
Marcello el xe stà ’na figura inportantissima che ga lassà un segno fondo nel tessuto cultural de la so çità, tanto che la "Congrega per il recupero delle tradizioni trevigiane" presiedùa da l'architeto Giorgio Fantin, nel 2015 la ga deciso de assegnarghe el Premio San Liberio, un riconossimento special a le persone che se ga distinto ne la difesa de la cultura tradissional co la seguente motivassion: "Per la sua profonda umanità, per la grande passione come presentatore, prestigiatore, giocoliere, poeta, dialettologo e scrittore", dove che xe specià veramente la so natura.
ROSA CHE INAMORA
Te vojo senpre ben, rosa,
parché me son inamorà
de ’na tosa e la go conquistada
co' ’na rosa.
Te ricordarò senpre, rosa,
parché adesso son felisse
co' ’na tosa.
Te benedirò senpre, rosa,
parché el to fiorir
se riflete su l'amor
par la me sposa.
Marcello Cocchetto
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Cara mama, te digo: “Grazie!”
Tuti ghemo ’vudo nostra mama… e una sola; tuti ghemo boni motivi par ringraziarla – che la ghe sia o no la ghe sia pi. Par tanti, la mama la xe stà on punto de riferimento, on’amica e soratuto on esenpio da seguire. Pecà che in sto ingarbujo, xe deventà difìcile rivare a dirghe grazie.
de Mario Sileno Klein
Da la Marca
Ricordo de Marcello Cocchetto
de Emanuele Bellò
|
