Da Lendinara (RO)

Come steto?

Roy-Lichtenstein-Girl-with-Tear-III-1977.

A son al sètimo celo. (Gustavo Dorè)

Dal "Secondo diario minimo" de U. Eco.

Quasi un saludo più che na domanda fata co' vero intaresse, "come steto" la xe una de le espression più doparà quando ca se incontra qualcuno, scominziando na telefonata o mandando un messagio.
"Come steto?" la me dise l'Adriana, vecia conossenza ca no' vedevo da un tòco. Inte la testa go pronta na risposta longa quasi na cartela da 60 righe in corpo 12, interlinea 1,15 che la scominzia supozó cussì:
“Varda, sò ben ca ghe de pèzo, ma da novenbre de l'ano passà fin a sti ultimi mesi del 2021 el xe stà un incubo, tra bàgoli bastanza pesanti e carcerazion domestica no' te digo par quanto tenpo e in più co ’l dispiazere de la perdita de un nevodo al quale no' go podesto dare l'ultimo saludo insieme a i altri parenti… eh sì, quando che la taca a girare male…”
Fermo restando che gnanca a un amigo o amiga gavarìa butà ’dosso, cussì de bruto, i me lamenti – se sa, el pensiero el viagia a la velocità de la luce – a go risposto:
“Insoma dài, se tira ’vanti. Voaltri, tuto ben?"
E cussì in dó e dó quatro, go savesto che so fiolo ga catà lavoro, so marì l'è ’ndà in pension e la lo ga senpre tra i piè che ’l tintona senza far gnente de bon e che so mama, ormai "non autosufficiente" la xe ’ndà in casa de ricovero.
Finìi i agiornamenti, inutili quanto doverosi in zerti casi, se ghemo saludà e fato i auguri che tanto i va senpre ben.
El più de le volte, quando ca se domanda come ca se sta, no' ze zerto par ’ver notizie su la vita e la salute de la persona, anca se qualcuno, inveze, el lo fa con sincero intaresse e el xe pronto a scoltare eventuali sfoghi o confidenze che in momenti de fragilità le pole scapare. I amighi veri, i pochi e rari che no' senpre se ga la fortuna de avere, no' i ga bisogno de farte sta domanda, parchè i capisse prima quando che calcossa no' va par el giusto verso.
Lamentarse a voze alta, el xe giudicà un conportamento infantile; ghe xe tuta na psicologia a riguardo ca ne fa capire che, oltre a no' portare vantagio, sto ategiamento el deventa senpre più automatico, creando dipendenza e, adiritura, "atrofizzando l'area del cervello deputata al problem solving e al pensiero intelligente" (Jessica Stillman).
Me nona, quando ca jèrimo pìcole, la ne strejava ciamàndone "lomento perpetuo" e me ricordo che sta espression la me dava fastidio. El lamento el fa male anca a chi ca scolta che ’l vien caricà de pensieri negativi e privà de l'energia ca serve par afrontare la giornata, provando sentimenti de inpotenza e colpa.
Bisogna anca dire però, che riussire a consolare chi che co' le so lagne a manda segnali preocupanti, fa ben al cuore e ripaga del pìcolo sacrificio.
"Gli ho chiesto come stava e ho visto nei suoi occhi tanto dolore, ma non avrei mai pensato… avrei dovuto…" cussì ga scrito uno sul "social" più famoso inte un comento a la notizia del suicidio de un ex conpagno de scuola, publicà su un quotidiano "on line" de la provincia de Rovigo.
Magari no' sarìa servìo a farghe canbiare idea a chi ca riva a sto punto de disperazion…
Tornando al discorso, al solito "come steto?" corisponde le stesse risposte, ormai prive de fantasia, doparà quando ca se vole tajar curto.
A sto proposito, par sdramatizare, a vien in mente le repliche de personagi famosi al banale "come va?", ipotizà da Umberto Eco intel "Secondo diario minimo", co' la so proverbiale ironia e arguzia che tuti dovarìssimo inparare a coltivare co' le nostre, tanto più modeste, capacità. "Sono in una botte di ferro", "Uno schianto", "Francamente bene", "Magnificamente", "Sono al settimo cielo", tanto par dìrghene qualcuna, le xe le risposte, inte l'ordine, de Attilio Regolo, Icaro, Carlo Magno, Lorenzo de' Medici e Dante Alighieri.
Fra noaltri zente comune, inte i periodi neri, la più getonà da i zóvani la xe: "Gheto na domanda de riserva?"
I più in là co i ani i sa e i risponde che "bisogna senpre voltarse indrìo", anca se la tentazion la sarìa quela de vardare al mèjo...

[torna sopra]