Da la Bassa Veronese

La storia de l’antica casa Gatti

Intel canton ghera la la botega de alimentari co ’l vecio distributor de benzina.

In botega ghera la Antonietta Orlandi Gatti.

Rivando in piazza al me vecio paese, San Pietro di Morubio, ghera ci nava a béarse on’onbra, fin che l’era verto el Caffè che ’desso l’è serà, e ghè ci, come mi, ghe pol capitar de sentire na storia da restare sbasìa.
Dunque, vien che rivo inte la piazza e me sento subito come ciamà da on reciamo vizzin; me fermo incantà a guardarme intorno e no vedo nissuni.
Par prima roba guardo la cesa e saludo el Signor che ghè drento, po’ el canpanile, po’ ancora el vicolo che porta a la canonica indo’ che mi, da buteleta, neoda de me zio, pàroco, don Luigi Mozzambani, stava co la me fameja in te la caseta vizzin de ela. Par questo me mama Ida l’era conossùa come la “Ida del prete”.
Me fermo come intontìa, parché me par de sentire na ozze che me dise:
“Psst…”
Ma ci èla! Me meto sul chi va là e domando: “Ci sito ti, che te me parli?” Eco che subito sta ozze la taca a contarme; la riconosso: l’è quela de la casa che ghè in canton de la piazza, che fa angolo con via IV Novembre, e la me dise:
“Ti, te si la Lucia Pestagalete, vèra?”
“Sì” ghe rispondo mi; “son la fiola de Bepi Beltrame, l’organista, neoda de Santo Pestagalete.”
“Ah, cara buteleta, mi go la me storia da contarte; ormai son vecia, ma se te ghè pazienza, te conto. Go da dirte che i me muri, anca se antichi, jè ancora solidi… Quanta gente che m’à guardà, propio par la inportante posizion che go mi come casa qua in piazza. Te devi savere che qua ghè stà senpre la botega de alimentari pi vecia del paese, quela che porta el cognome de la fameja GATTI, che, come botega, la ga origine fin dal 1888, come ghè scrito inte on vecio documento.
Sta fameja la ga avù come capostipite Gregorio Gatti, sposà con la Virginia Murari. Da lori è nati: Nereo (1891), Alessandro (1894), Agostino (1896), Primilio (1898) e anca le done: la Maria Gatti…”
“Ci ghera che servéa inte la botega de alimentari?” ghe domando mi.
“Prima ghera Agostino che ’l servéa co la pena su la recia, co so mojere la Ines Isalberti ch’i ga avù du fiói: Gregorio e Erasmo, dito Mami. Te ghè da savere che in chel’altra botega, a metà de via Villa, ghera Primilio Gatti co so mojer Rosetta Isalberti, sorela de la Ines e de la Gianna. Da Primilio e la Rosetta è nato Sandro Gatti, che l’à sposà la Luigina Buratto.”
“E dopo, ci ghè stà a laorare inte la botega de la piazza?”
“Faséa el botegaro, salumiere, Erasmo Gatti (Mami) con so mojere, Antonietta Orlandi, e i ga avù na fiola: Monica Gatti, sposà con Roberto Stefani. Gregorio Gatti (1925-1993) invezze l’è deventà dotor e l’à sposà la Annamaria Flangini e da lori è nati: Leila, sister Nives de Madre Teresa de Calcutta, Agostino e Davide, dotor anca lu.
I cari Sandro Gatti con la Luigina i ga avù Corrado e la Mariarosa.
Èto capìo che storia longa ga la me casa: senpre pronti in botega a servire la gente da du secoli oramai (ultimamente ghè stà la VE-GE co la Luisa Formaggio, fiola del Tati). Fra poco, verzo i batenti danovo, co Tabachi e Bar-Ostarìa.
Pensa che quando i vegnéa a far spesa, i segnava tuto su on libreto nero e se pagava a fine mese.
Eco parché ò sentìo el bisogno de contarte la me storia che l’è senpre quela che me tien viva e vegeta!”
“E, vizzin a ti, che case ghera?” ghe domando ancora!
“Sul canton, che porta in via IV novembre, ghera l’ostarìa de la Catina (Caterina Foggini Isalberti), dopo deventà Osteria al Gambero, che po’ la l’à tegnùa so fiola Ida Isalberti. Da la Catina, ghera a dozzena, la maestra Odina Signori (nativa de Rosegaferro de Villafranca), ’pena diplomà maestra, e mi ò visto la so storia d’amore co Silvio Menini, me cliente, che dopo l’è deventà podestà…
Ma adesso me fermo parché el resto ghe lo lasso contare a la Monica e Roberto che vive qua da mi e i porta avanti la tradizion de la fameja Gatti.”
Inbonbegà de ste notizie storiche, instornìa de ricordi, come dopo na borasca de lujo, me vien in mente quelo che diséa i veci de na olta: “Se i muri de casa podesse parlare, se descoerzarìa tante bare.”
L’ò saludà e m’ò incaminà par nar de olta, inte la casa de me noni Pestagalete.

[torna sopra]