Da la Bassa Padovana

San Martin
On straniero adotà dal Veneto par el “Capodano agricolo”

Elemosina di San Martino de Andrea Briosco (1470-1532), Ca’ d’Oro Venezia.

A te vedevi careti pieni de mobilia passare par le strade, ch’i faséa sanmartin…

Pochi altri santi in Veneto, ma anca in Italia e in Europa, i xe ricordà, festegià, adotà come patrono de parochie, e i ga dà nomi a i paesi, come San Martin!
El xe on santo cossì popolare che par i deti, le filastroche, i proverbi meteorologici, el canbio de usanze agricole, a pare che el sia vivesto l’altro ieri. Inveze el xe vissùo in te ’l tardo Inpero Romano, parché el xe nato ’torno al 316 a Sabaria (Ungheria) in te on avanposto de l’inpero romano, al confine con l’alora Pannonia.
So opà el jera on tribuno militare de ’na legion romana e, ’na volta nà in pension (da veterano) el ga ’vudo on tòco de tera da coltivare e par farse ’na caseta a Pavia, portàndose drio Martino (nome dal dio Marte), la fameja e on schiavo.
Martino a diese ani el scapa da casa, rifugiàndose in te ’na cesa a Pavia par du giorni, forsi el sentìa za calcossa.
Da fiolo de on veterano, anca Martino el xe nà a militare, a disdoto ani, in Gallia, come adeto a l’ordine pùblico.
Durante el servizio de note a Amiens, in te ’l fredo inverno del 335, Martino el vede on mendicante poco vestìo e infredolìo, e lì aviene el fato che el ne lo fa ricordare oncora ’desso: el taja el so mantelo militare in dó parte con la so spada e el ghe ne dà mezo al poareto. A la note el se insogna Gesù con indosso sta metà del mantelo e coando che el se sveja, Martino el cata el mantelo intiero.
Da lì a xe nata la so storia che lo ga portà a farse batezare e a lassare l’esercito a 40 ani par scominziare ’na seconda vita.
El ga vivesto anca a Milan, el xe stà eremita in te on’isola al largo de Albenga par coatro ani, e dopo el xe tornà in Francia indove che el se ga fato frate.
El ga fondà on monastero e el xe deventà anca vescovo de Tours, continuando a fare opere pie, a fondare monasteri e a fare miracoli che ga portà la so fama de santità in tuta Europa.
El xe morto l’8 novenbre del 397, ma el se festegia l’11 novenbre, giorno de la so sepoltura.
E come ogni ano el se festegia con manifestazion popolari, come sagre, antiche fiere e altre usanze ligà a la vita in te i canpi, che la subisse ’na interuzion prima del fredo e del longo inverno.
Da lì la consuetudine de considerare l’11 novenbre el “Capodano agricolo” con i fitàvoli che i pagava l’afito a i paroni, co i paroni che i canbiava el fituale, co i fituài che canbiava el boaro e cossì a te vedevi careti pieni de mobilia passare par le strade, coniando el triste deto: Fare sanmartin!
Inoltre, ne la prima parte de novenbre el clima, coasi ogni ano, el deventa mite, fasendo nàssare el deto: L’istà de San Martin la dura tri giorni e on pochetin!
Ma anca el vin in chel periodo el vegnéa travasà dal tino e messo in bota parché no ’l jera pi mosto, cossì a se diséa: A San Martin ogni mosto el xe bon vin!
E oncora, par el fato che se cusinava e se magnava le castagne co ’l vin novo, xe nato el deto: Da San Martin castagne e vin!
Senpre a San Martin i operai agricoli i vegnéa messi in disocupazion, e alora a se ghe faséa la “galdega”, prometéndoghe che i gavarìa ripreso el laoro a marzo; galdega che la consistéa in te ’na zena a base de ’asàgne con l’oca e po’ oncora oca in pocio, invocando el santo co ’l deto: Chi no magna oca a San Martin no ’l farà on bèco de coatrin!

[torna sopra]