Da Vigodarzere (PD)

El baso

Francesco Hayez, Il bacio (1859); ojo su tela, 112 × 88 cm (Milano, Pinacoteca de Brera).

Francesco Hayez, L’ultimo bacio dato da Giulietta a Romeo (1823); ojo su tela, 291 x 201,8 cm (Tremezzina, Villa Carlotta, Museo e Giardino Botanico).

Francesco Hayez, Ritratto di Alessandro Manzoni (1841); ojo su tela, 120 x 92,5 cm (Milano, Pinacoteca de Brera)

La corte Rotta a Santa Maria Mater Domini.

La lapide su la casa indo’ xe nato Francesco Hayez, in corte Rotta, a Venezia.

Stavolta vojo parlare del grandissimo pitore FRANCESCO HAYEZ, venessian, da madre muranese e praticamente da i stessi venessiani pitosto ignorà: forse ghe fa sogession sto cognome straniero. El ga assà tante òpare a Palasso Ducàe, a l’Academia e altre sparse nel Veneto e Europa, e de tante coession private.
El ga frequentà el Corso de Nudo a l’Academia de Venessia con grandissimi risultati. Pochi ani fà, la so casa nadàe a Venessia, mi, co l’aiuto de un amico che abita ne sta sità, so’ riussìa a trovarla, na bea casa co na cale corta che finisse sul canàe.
El Comune ga fato métare sul muro na sènplice lastra de marmo con scrito poche paròe. Manco de cussì!
A ogni modo sto artista el ga ferma su eà tela splendidi capolavoro, ritrati, autoritrati, fiori stupendi (tulipani, gili, iris, rose, lilà, peonie, magnolie, garofani, nasturzi, gladioli, ec.).
Ma el più famoso dipinto xe “Il bacio”, quelo che l’Alpin ghe dà a na tosa co ’l vestito azuro.
Ma ’ndemo avanti con eà so vita. El ga ’assà Venessia, trasferéndose a Milan, dove che ’l xe morto a 91 ani nel 1882, e che ne sta grande sità el ga vissùo gran parte de ’a so vita. Dedicà a lu ghe xe el monumento a Piasseta Brera e poco distante na formèa in bronzo che rafigura el famoso “Bacio”.
E Venessia? Come che no ’l fusse mai esistìo. A Muran i ga esposto ne i vari punti de l’isola grandi sculture fate da maestri vetrài, parché no i pensa… El xe stà piutosto trascurà ne a so sità, ma i xe ancora in tenpo, no ’l ga mai desmentegà el so dialeto e, quando a 90 ani el passegiava par Milan, aiutàndose co ’l baston, ’e persone che lo riconosseva ’e se avissinava e ghe domandava:
“Maestro, come stà?” Lu rispondeva: “No ghe xe mal, podarìa ’ndare mèjo.” A Milano ghe xe ancora el so studio-laboratorio, e a l’Academia de Brera tanti so capolavori. Pochi ani fà ghe xe stà l’atesa mostra su sto grande Artista, rica, meraviliosa, e mi go scrito eà poesia sul “Bacio”; el diretore eà ga apressà, el me ga mandà el voluminoso catalogo e dó bielieti gratis par visitarla. Quando a sta mostra Luigi el me ga basà a pochi centimetri dal quadro, fotografà e stanpà eà foto, qualche giorno dopo el ga esclamà: “Guarda qua, curvàndome, se vede ’a me testa sensa cavéi”, mi ghe go risposto: “Eh, caro, te savevi che ’ndàvino a sta famosa esposission, te podevi farte prestare el capèo de l’alpin dal to amico Roberto!”
So’ vegnù a casa piena de emossion, nel cuore e ne ’a mente, co na sodisfassion che me porto drio ancora ’desso par sto straordinario pitore, pieno de passion e de beessa che ’l ga ’assà a i so quadri.

[torna sopra]