|
Editoriale
La giusta stajon de la mente
No ghe xe parole che basta par dire quanto che vale la giovineza che la xe la primavera de la vita, ma anca st’altre stajon le ga la so inportanza. Sarà mèjo che ghe metemo equilibrio tra de lore, par no nare incontro a na serie de “inverni”.
 | | Xe tenpo de inbalare le idee e puntare su la giusta stajon de la mente. |
I xe discorsi decisamente ligà a sto mese, pien de aria nova, de prà che ga canbià colore, de tera che xe rivestìa de verde. Se taca a sentire coalche strucon de primavera e de istà insieme. Aria de giovineza, come ga descrito tanti poeti, a partire da Lorenzo de’ Medici che ne la poesia Trionfo di Bacco e Arianna el canta: Quant’è bella giovinezza, / che si fugge tuttavia! / Chi vuol esser lieto, sia: / di doman non c’è certezza. Trionfo de l’entusiasmo del sentirse zóvani, ma ghe vole prudenza… e, soratuto, testa.
Calche sbianzo de verità, però, el ghe xe, se te pensi al roerso de la medaja quando, nando par le strade de i nostri paesi, te incontri s-ciapi de tosi senpre de malavoja, musoni, vilani, screanzà, sparlacioni e anca pezo. Tosi che buta via la so primavera!
Vardando ben, pole èssarghe, infati, ani de zoventù che ghe someja a “na serie de inverni”: pensemo a i tosi vìtime de la droga. No i ghe someja, forse, sti zóvani, a tronchi de àlbari colpìi dal giazo de l’inverno?
Xe stà giustamente dito che la veceza no la ghe entra par gnente co ’l nùmaro de i ani. Ghe xe zóvani che nasse veci o che da tosi i deventa subito veci, consumà da la mancanza de voja de far ben, sderenà dal vodo che i ga drento de lori, da la mancanza de stìmoli, de iniziative e de valori.
Sarala tuta colpa soa? Nò: la colpa xe anca nostra. Colpa de na distrazion fora misura, el pi de le volte dovuda a la mira del guadagno. Cussì nasse l’inverno mentale de i zóvani che ga bisogno de èssare inpegnà, educà a la responsabilità e sostegnù nel realizare sogni e progeti. In te na sola parola, i ga bisogno de èssare indirizà a la “giusta stajon de la mente”, stajon che la ga da scopiarghe so la testa, prima che in tel corpo.
E par chi no ga pi vint’ani, cossa se pole dirghe?
Se pole dirghe che “el de fora” bisogna portarlo drento; che la stajon de la rinàssita no la riguarda solo l’azuro del celo o el sole che scalda le marissàndole o maura le zarese e el fromento te i canpi.
Nò! La stajon giusta, prima de tuto, se ga da sentirla in boca e la ga da inbocare la strada che porta a la testa, a la mente e al cuore.
Basta no pensare a i ani che se ga, ma a quei che se se sente e a quei che vegnarà!
Bisogna pensare a i boni propositi e a i sogni restà da realizare. Prima de tuto, métare da parte la paura de no fàrghela; lassare pèrdare le critiche, le ripiche e le pìcole barufe, guadagnando na auto-stima; darghe on tajo a le cative abitudini: la pressa, el tenpo che no basta mai, el magnare in piè come i cavài; tornare a gustare le pìcole robe che le xe quele che fa ben al corpo e a la mente.
Se sa che la mente la xe na spugna che la assorbe tuto quelo che la incontra, tipo le preocupazion che la television ne inculca te la testa e la vole che se abituemo; anca qua, ocore sèliare cossa vardare, scoltare o lèzare, e quando ne pare che la mente la sia drio inturbiarse, molare tuto, nare in giardin o inte l’orto, fare quatro passi ’torno casa, nar védare se xe rivà posta te la casseta…
Xe senpre mèjo concentrarse su quelo che ne fa ben, come, par esenpio, ridure el tenpo speso ne i social media che i continua a bonbardare la mente co massa informazion, con emozion negative o spetegolamenti insulsi.
Ne pare che ghe n’è anca massa de robe che se pol fare par nare incontro a la giusta stajon che ga da rinovare el nostro corpo e, soratuto, la nostra mente.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Padova viva
Mario Pinton
Gioielli, sculture e poesia
de Lidia Maggiolo
Editoriale
La giusta stajon de la mente
No ghe xe parole che basta par dire quanto che vale la giovineza che la xe la primavera de la vita, ma anca st’altre stajon le ga la so inportanza. Sarà mèjo che ghe metemo equilibrio tra de lore, par no nare incontro a na serie de “inverni”.
de Mario Sileno Klein
|
