Da l’Alta Padovana

Nona Irma B. la ghe conta a so nevoda Serena

Pi che te ’a menài e pi ténara ’a deventava…

Se massaja ’a pasta pa farla vegnere senpre pi fina.

Come te dizéa, magnàimo poenta tuti i dì. Anca coatro poente al dì fazìmui! Ghìimo el fogoearo incassà so ’l muro e cò ghe picàimo el caliero so ’a caena, pa smissiare ’a poenta senzha che ’l se dindoeàsse, ne tocava tegnerlo podà so ’l muro co on copo in pìe, urtà co on danocio. Ma el fogo, cò ’l verdìa ’a fiama, el ne brusava ’e ganbe. Sèto coante volte che me mama se ga brusà ’e còtoe che ’a ghea longhe fin a ’e caìce, pa tegner fermo el copo! Ea se ’e metìa anca in medo i danoci, ma coalche volta ’a se ga brusà istesso. Dopo diversi ani me fradèo pi vecio se ga inventà de far fare on trapìe de fero dal fàvaro pa tegner fermo e soévo sto caliero e a noantre fémene el ne ga parso on miràcoeo. Te diré parcossa che no ’l ghe ghea pensà prima. Mah! Forse parché se ’ndava contro ’a tradizhion o forse parché ’a poenta no ’l ghea da farla lu!
Cò ghe jera siroco, cadìa drento el caliero baeochi de caeùdane, ’lora ’a ciapava na cassoeta e ’a tirava via ’a poenta sporcà e dopo noaltri pìcui ghìimo da stare atinti che no capitasse ’ncora. ’A poenta che magnàmui noaltri ’a jera ’a poenta plata che vegnéa da ’a ’Mèrica. Me ’a vendìa F. che jera pi umano de so mojere, ma pi che te ’a menài e pi ténara ’a deventava. Noaltri magnàmui anca ’a nostra, ma ’a jera poca parché meda ghe ’ndava al paron, e ’a finìmui suìto. Fazìimo anca poenta de semoèo pa dàrghea a i vedèi parché ’a late ne servìa pa fare ’e casate.
Me mama jera na artista farle e, cò rivava el paron, ne tocava scòndarle senò el vedéa chi che magnava ’a late. E vuto che noaltri tusiti ghìssimo magnà semoèo al posto de i vedèi? Me tocava mi ’ndar tore ’a poenta dal paron e me zio Piero me dava anca on poco de semoèo pa fare ’a pinsa. Na volta jera drio tornar casa co ’a cariòea carga de sachi de farina insieme co me cujin. Dò pa ’a via Roara piena de buse ghe jera on fosso largo e, co ’a poca forzha che ghìimo da tusiti, no ghemo mia rabaltà ’a cariòea e i sachi là drento. Mi e me cujin semo saltài drento sto fosso e ghemo tirà-sù i sachi, ma i se ghea za bagnài. Cò so’ rivà casa, me mama me ga dito: – Sacranon, ghio za fato ’a poenta prima del tenpo!
’Lora co ’e sece ghemo portà ’a farina so ’a càmara de sora e ’a ghemo tegnesta smissià fin che ’a se ga sugà. Sin’éa bagnà sòeo che du dìi e par fortuna che me opa no l’è mai vegnesto saerlo parché tra fradèi goài farse ’a spia!
Formento ghin vedìimo gran poco. Ghin vedéa tanto me opà cò ghe tocava tegner smissià coéo che F. ghea inte i so granari e ’l se fidava sòeo de me opà pa tegnelo mosso cu i pìe pa secarlo in granaro, dopo ’a trebia, senzha doverlo seezare. El vegnéa casa a ’a sera stufo e inpolvarà da ’a testa a i pìe. Chée poche volte che magnàmui pan so ’e feste principài, me mama tirava fora na pastèa de pan, ’a ghe dontava butiro e coéo jera el nostro dolzhe. Ze vegnesto che ’l pan no ghemo pi podesto fàrseo, ’lora ’ndàimo da S. Na volta so’ ’ndata tore ’l pan co ’l libreto e jero piescalsa. Ghe domando el pan al fornaro e lu me tira na ciopa de pan so ’n pìe e ’l me dize: – Prima de torte el pan, te me porti el formento! – Mi so’ ’ndata casa co ’l sangoe che coréa parché go senpre bio i pìe de carta e là no so’ pi ’ndata.
Co ’l tenpo podarìa vegnerte bon anca ti saère come che se fa ’e tajadèe co ’a méscoea. El paston de uvi e farina bianca sora ’l panaro l’è senpre on zhercio anca cò l’è grosso de spessore. Co ’a méscoea prima el se rùvoea, giràndoeo ogni volta de on coarto co na man pa farlo restare tondo, fin che ’l deventa pi fin possìbie. ’Lora se taca rodoeàrlo so ’a méscoea che se tien levà da on cao, fazéndoea girare in modo da caricare ’a sfoja e co chealtra se massaja ’a pasta pa farla vegnere senpre pi fina. Se scarica ’a sfoja so ’l panaro, on poca de farina destirà e se riparte da naltro canton in modo che ’l massajo vègna intersà e se va ’vanti cussì fin che ’a sfoja deventa bea elastica, coasi trasparente e fina come na partìcoea. ’Lora ’a sfoja se fa-sù in ròdoeo streto e ’a se taja a fetée che bisogna desfare parché no ’e se tache. Se podéa anca secarle, ma casa nostra ’a bastava apena par tuti a meodì. Sta pasta ze cota in du minuti e tegne ben el conzhiero. Altro che coée fate co ’a machineta: roba pa ’l mas-cio! Inte ’e feste grande fazìimo ’a minestra de gaina, cusinàimo i risi so ’l brodo e sìncoe minuti prima de menestrare, ghe butàimo drento ’e tajadèe.
L’unico dolse che girava na volta par casa nostra jera ’a pinsa. Noaltre ’a fazìimo de sera d’inverno, dopo séna, pa inpegnare l’unico tenpo che ne restava: ’a fazìimo co brodo de verda e de fasùi, inpastài co farina, fighiti, tursi e foje de verda: coée pi ciare del core, fasùi e semoèo bianco. ’A vegnéa fora dolzhe e bona, anca parché ’a jera fame. ’A se metéa so ’a ròea snetà del fogoearo, rujà e coerta co ’e foje de verda pi scure. ’A se coerdìa co zhénare calda e parsora de tuto scataruni inpizhài che fa na bea bronzha. ’A se assava là fin a ’a matina dopo. ’A se magnava al dopomeodì in stàea: na fetèa par-una e se beéa on goto de graspìa.
Dopo te conto de ’ncora.

[torna sopra]