Da Mestre-Venezia

I ometi de sassi       

Ometo de sassi su la riva de la Piave.

Ometi de sassi su le Dolomiti, a Lagazuoi.

Altri ometi de sassi su la Piave.

Volendo ciapar un poca de aria e sol, so ’ndada a caminar longo la riva de la Piave, in quel de Nervesa, un spetàcolo de natura e tanti ricordi de storia da no crédar; eco che proprio su l'óro de la riva me so’ incapada su un ometo de sassi, o par spiegarme mèjo su na piramide de sassi, fata metendo un sasso grando ben postà par tera e po’ uno sora de st’altro in gradassion.
De ometi de sassi ghe ne go senpre visti, soratuto in montagna, nel bosco, ’torno corsi de aqua, in posission stranbe o inportanti, e me ricordo che có gero putèa me piaseva fàrghene insieme a i me amighi; me papà postava el primo pieron e po’ noaltri a turno se continuava, stando ben ’tenti a no far cascar tuto.
Par mi el gera solamente un zogo, ma sto "zogo" gaveva origine ne la preistoria e vegneva e vien fato in ogni canton del mondo, da le Americhe a l'Estremo Oriente.
Natural che i ometi de sasso li possa aver nomi diversi a seconda del logo, qua i se ciama anca balancer o cairn, parola de proveniensa celtica; ma a cossa servìveli?
Prima de tuto, za da i tenpi del neolitico la so funsion gera quela de marcar un percorso: l'omo che ’ndava a caciar el faseva sù montagnole de sassi par ritrovar la via del ritorno, e par proprio che i ometi de piera sia stà e sia punti de riferimento messi sù par segnalar un sentiero, un varco, un passagio particolar o na mèta, la strada de la cacia, de la guera, de i tanti comerci.
Ne la antica Grecia ’ste costrussion gera dedicàe a Ermes, el dio de i viagi; po’ senpre par restar in tema religioso i podeva segnar anca loghi votivi o tonbe, loghi de memorie; par solito vegneva posissionà un sasseto bianco sora de altri, come pedagio-oferta a le divinità par domandar protession, ma i gera anca segnal de i posti dove se catava tra de lori diàvoli e strighe.
Ghe xe chi dise che li sia più che altro costrussion decorative o artistiche fate sù par belessa, ma anca orassion de piera che l'omo dedica al so Dio, orassion che se alsa un poco a la volta quasi a tocar el celo.
Serto che bassiar par far sù un ometo de sasso xe belo, se sente na chiete drento che fa ben a l'ànema e al pensar, sto equilibrio de piere che sta sù quasi par miracolo fa capir che ne la vita tuto xe postisso, in prestio se pol dir; par questo l'omo vol segnar el so passagio, par lassar un segno e favorir quei altri che andarà par la so stessa strada.
Sensa, però disquisir più de tanto su muci de piere, postài sù da la note de i tenpi, sensa sercar spiegassion de ogni sorta, penso che i ometi de sassi esista solamente parché xe belo che i ghe sia e so’ sicura de catàrghene senpre e senpre de più có farò le gite in montagna, anca parché i xe de moda, tanto che su le Dolomiti i ghe dedica parfin un festival.

[torna sopra]