Da Verona

Le età de l'amor
"El dolor l'è senpre quel de alora; / come un cortel mai rùseno, / destinà a 'verghe gnaro par senpre / nel fodro del cor." (Ghedi - BS, 1936)

Alberto e la "pìcola italiana" co la so pua.

Inamorarse a sié ani? Forsi la pararà 'na roba da rosaria; 'n afar inpossìbile, insoma, se non ridìcolo, come podarìa èssar, inveçe, ne l'opinion generale, 'n amor che sbocia a 70-80 ani!
Epura quando la 'Delina la g'à 'vù el colpo de fùlmine par el tenente pilota Alberto, de servissio al campo de aviassion de Ghedi (Bs), durante la guera d'Africa che g'à regalà ai italiani le sansioni e al Savoia Vitorio Emanuele III, in zonta a la corona de Re d'Italia, quela de "imperador de l'Etiopia", l'era propio su i 6 ani e no 'l'avéa gnancora scominçià le scole elementari.
So papà, riciamado in aviassion, specialista, sergente-marconista, el s'avéa tirà drio a Ghedi moier e fiola e la buteleta, sveja e scadenà come 'na coéta da sagra, da quel momento l'era stà da la matina a la sera a remengar par el campo, cocolà da tuti, uficiài, sotuficiài e avieri, sù e zo par i arioplani in angar, a pranso e a çena a le mense del canpo. Ma fin dal primo incontro la s'avéa estasià davanti a 'n tenentin pilota belunese che, prima ancora de savérghene el nome, l'avéa sùbito batesà "l'omo quel belo". Tra el pilota Alberto e la buteleta era nata cusì n'amicissia talmente tacaissa (soratuto da parte de ela) che, salvo quando che lu l'era in servissio, l'èra raro védar l'uno sensa l'altra par man.

La 'Delina... pronta al decolo.

La magnava con lu a la mensa uficiài e a la sera no' la se indormensava se no' l'andava a darghe la bonanote con un baseto e 'na sgarufada su la franseta a la francesina. 'Na òlta el g'aveva portà, tra i tanti regaleti, caramele e ciocolatini, anca 'na pua in divisa da "picola italiana" con tanto de calseta nera in testa, camisa bianca e còtola a pieghe e da quela pua no' la s'era destacà più, né giorno né de note.
La se inzegnava a inparar el "linguagio" tècnico par star "al passo" col so Alberto... tèrmini che magari la sacagnava a la so maniera come a ciamarghe, par esempio, "para... guide" al paracadute e, con tanto de casco e ocialoni, la faseva finta de pilotar, fasendo "brun-brun...rrrrr" co' la manina su la cloche.
Po' tuto è finì 'na sera de nebia. A le óndese Alberto no' l'era gnancora rivà e la buteleta, co' la so pua streta sul coresin, no' la voléa butarse-zo a dormir e no' la consolava la rosaria de "Grio sensa testa" che so papà l'avéa tacà a contarghe; 'na storia che de sòlito ghe piaséa tanto. Nò, proprio no' la consolava gnanca le caresse de la mama che quela note l'era stranamente cusì triste. E la 'Delina l'èra stà sveja par ore, piansendo e sangiotando da cavar el cor. El giorno dopo i sói i g'avéa contado che Alberto l'era andà, col so "Breda" a iutar, in Africa, i butini moreti ma che'l sarìa tornà presto-presto.
Solo nel novembre del 1940, el papà, in licensa, riciamà a la nóva e più terìbile guera, l'era sbrissià fóra a contar quel che era sucesso quela sera de 4 ani prima; el tenentin belunese l'era precipità co 'l so Breda in un canpo 'pena arado, dal qual, del picolo aereo, vansava fóra sola la coa. Forsi el papà el pensava che essendo passà ani la 'Delina la se lo fusse desmentegà... e l'è restà mal vedendo inveçe che rassa de desperassion quela pur lontana verità l'à scadenado!

è passà un bról de tenpo e 'sta buteleta ancó l'è 'na vecia piena de ani e de malore. Pura quando el ricordo el torna a rimontar sul mar senpre più de inchiostro de la vita, el dolor che la sente l'è senpre quel de alora e quela coa che
la fantasìa la ghe fa imaginar, drita inpiantada ne la tera nera; biso fantasma che sèita a vègnar-sù da 'na sera distante, l'è come un cortel mai rùseno, destinà a 'verghe gnaro par senpre nel fodro del cor.

[torna sopra]