|
Da Verona
El me mercatin
Son passà da la me amiga par el primo cafè de l'ano e, come senpre, la se n' à profità.
"Te ne conto una de bele. Varda ste do presete qua. Ele poco bele?" Le ciapo in man e con i ocialeti 'ntorno par védarle mèjo, le studio ponto par ponto. I è na smaraveja; da na parte, el roerso, bianche; giale, verde, oro sul drito. Quela che la l' à fate, l' à dimostrà de 'verghe na passiensa da santa; laorando a ucineto, l' à fato saltar fora na stéla de Nadal, con diese pètali rossi, diese fóje verde, el cor gialo oro, che la par propio vera e la risalta con el sfondo bianco.
Sicome ghe paréa de aver laorà poco, la l'avéa bordè con un giro de ponto gànbaro e conpletè con 'n anelin, par poderle tacar via. I era laorè con na bela man, tuti i ponti grandi istessi, bele piate e tonde perfete.
"Secondo ti, 'sa pol-li costar du stranfiereti del gènere? No sforsarte, t'el digo mi, dopo che t' ò contà la storia."
El dito "ano nóo, vita nóa" el va a farse benedir, dato che la me farà pèrdar tuta la matina, come la faséa l'an passà.
"Bison che te pensi che na me visina de casa - na maitona che no saluda mai - la m' à fermà fora de Messa par dirme che l'era drio catar sù robete fate a man par véndarle prima de Nadal in un "mercatino"; i schei i saréa servìi par pagarghe el viajo in Italia a tri butini russi, ospitè da altretante fameje del quartier. Sta inissiativa la me paréa cossì bela che me son data da far a spanpanar la osse. Pensàa de métarme sùbito in bal con coton e ucineto, piena de idee e boni propòsiti, disposta a laorar anca de note, ma... tajando zo el salame, me son portà ia na strìcola de diel e ò mandà così in fumo (ansi in sangue, garsa e ceroti) tuti i me programi. I dise che quando l'aqua la toca in quel posto se 'npara a ogar e l' è vera; rumando ne l'armaron ò catà du-tri capeti bei, messi via par la dota de me fiol, e ghe i ò portè. El giorno dopo, ò visto ne na vetrina ste do presete e le m' è piasùe cosìta tanto che son nà dentro a cronpàrmele, anca se le costàa un capital; tacàndole al muro m' è vegnù i rimorsi; vedéa quei pori butini sospesi in ciel, tachè via, parché no ghera schei in bastansa par farli aterar in Italia e alora ò ciapà le presete e ghe i ò date a ela. L'ùltimo giorno de mercatin son nà a darghe n' ocià: le avéa vendùo tuto. A dir la verità era restà solo le me do presete, parché, a sentir le done, i era massa care. Sensa gnan pensarghe, contenta che le me spetesse propio mi, i ò cronpè e portè a casa."
"Sèntete zo che son invià a finir. Donca, a la sera de quel giorno lì, vien a catarme me neoda che la me domanda se go mia da darghe qualcossa par el mercatino de le missioni. La me spiega che st' ano la racolta l' è par far rivar du butèi filipini ne la so parochia par studiar da prete. Par no farla nar ia con le mane in man, senpre par colpa del diel infassà che 'ntanto l'avéa fato infession, me son privà par la seconda olta de le me do presete, che le ghè piasùe che no se sa. L' è na butela de bon gusto e l' à capìo che i era de valor; la m' à ringrassià con un baso e l' è nà fora da la porta contenta come na pasqua, dopo averme invidà al mercatin. Sicome bison mantegner le promesse, specie co i giovani, son nà a saludarla che i era oramai drio serar. L'era sodisfata, parché i avéa catà sù un progno de schei. Ghe dispiaséa solo parché no la gavéa più gnente da mostrarme, i avéa dato ia tuto, tolte le do presete ancora ben comodè su na tola. Le ghe saréa piasùe a tanta gente, ma le costàa un ocio. Pensando a un scherso del destin, me i ò fate incartar e i ò paghè, soridendo a denti streti. Le ghera restè in corpo par forsa con quel che le costàa, ma vuto métar la sodisfassion de aver inpenìo el serbatojo de l'aereo filipin solo con el me acquisto!"
"Speta, ghe crédito se te conto che 'pena fora da lì ò catà me fradel, capo stòrico de i scaut, che el m' à parlà de un mercatin par catar sù fondi da narghe incontro par le spese de viajo a un grupeto de giovani in partensa par na mission in Equador. L' è vera che ghè ancora tanta bràa gioventù solo che mi l' ò incontrà tuta 'nsieme la stimana prima de Nadal. Te avarè za capìo che go passà de boto le presete, che son nà anca a sto mercatin e sicome no ghè du sensa tri, me son streta le presete - tricronpè - in sen e mi ò portè a casa, sperando de no far altri bruti incontri drio strada."
"Me tocarà far un mùtuo par stupar el buso, ma i è gran bele e, sora tuto le à messo in moimento meso mondo. Tò, ciapa, una te la regalo a ti; quel'altra voi tegnérmela mi par canpion. No se sa mai che par stan che vien..."
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Genaro:
Editoriale
Mi st'ano vorìa... vorìa...
La storia se ripete: có riva l'ano novo, nasse spontanea la voja de fare progeti, de inbastire sogni e de sperare che tuti o in parte i se realiza
de Mario Klein
Cultura orale
La frula sigalina
Da un sfogo de boca, su question de cossiensa, xe nata la curiosità pa un zogo poareto de na volta, quando par gòdarse bastava poco pi de gnente
de Dinerio
Da Verona
El me mercatin
de Giacinta Dall'Ora
|
