| de Maria Luisa Furin Zilio |
|
Volontariato... estremo
On problema che scota
 |
| La me amica Jenny col so pìcolo, Francesco. |
El fato che no podarò mai desmentegare de quando gavevo dodes'ani, penso che 'l sia più ùnico che raro e quando che ghe penso, me se strenze 'ncora el cuore. On giorno, so 'ndà trovare me zia Odilia, suora francescana elisabetina, e la me ga conpagnà - indovinè dove - ne la preson de i "Paoloti" de Padova; ela la lavorava là tacà, dal Prof. Zoldan, che 'l gaveva na Casa de Cura par i oci, in via Altinate.
Sicome in sto càrcere ghe gera le suore del so órdine e no sò cossa che la dovesse 'ndar fare, la me ga conpagnà anca mi. Có go visto raquante done co i so putèi pìcoi in preson co le mame, me ga ciapà on convulso. Par questo, deventà granda, go continuà a interessarme de i detenuti, par conóssare come che i passa la so vita drio le sbare e a scrìvarghe a qualchedun. Da un me carìssimo amico, che 'l ga insegnà diversi ani ne le preson de "Piassa Castèo", senpre a Padova, go savudo che ghe gera tanti ciosoti, condanài par contrabando de sigarete e che, par lori, no ghe xe mai stà nessuna amnistìa.
La magior parte gera inalfabeta o quasi e sto maestro el ghe ga insegnà a lèzare e a scrìvare a più de uno. Có 'rivava la posta da casa, i doveva fàrsela lèzare da la guardia e anca rispóndare.
La prima volta che Remo xe stà bon de lèzare na létara de so mojere el ga pianto da la contentessa. 'Sendo, come che go dito, quasi inalfabeti, có i ciapava i schèi del so lavoro, no i gera boni spartìrseli, e 'lora cossa faséveli? I 'ndava tuti insieme in alto mare so na barca co na damigiana de vin da 54 litri e i faseva cossì: on giro, do o tre co le carte da mile: una mi, una ti, una mi, una ti; po' co quele da çinqueçento e, se no le bastava par tuti, i tornava a tera col resto e i conprava tanto vin... e via 'ncora, piutosto alegroti, a bévarselo in santa pace. Da i ani '50 al domila tante robe xe canbiàe anca in te le preson. 'Desso i reati più comuni xe quei par spacio de droga e sfrutamento de la prostitussion.
L'otanta par çento de i reclusi xe extracomunitari: marochini, tunisini, nigeriani, kenioti, senegalesi, rumeni, albanesi, croati, bosniaci, moldavi, russi e cinesi. 'Sendo, par la magior parte clandestini, no i ga el permesso de sogiorno, né la residensa e, difissilmente, i poe trovare on lavoro.
Come fai 'lora a sodisfare el dirito primario de ogni omo che 'l xe queo de magnare? Eco che, el spacio de la droga, pur "essendo ris-cioso", ma frutando tanti schei, el risolve sta esigensa vitale.
Dirìa che i xe quasi costreti a smerciare, par questo el problema scotante e urgente de i clandestini bisognarìa risòlvarlo in pressa, parché, vìvare in preson, sensa libertà, distanti dal propio paese el xe on drama e i detenuti i xe òmani come noaltri.
La me amica Jenny, de madre-lingua inglese, la fa volontariato, na volta la setimana, nel carcere circondariàe de i "Do Palassi", dove che ghe xe le persone in atesa de giudissio.
Ghe go dito: "Prima te si 'ndà, par ani, curare i lebrosi e 'desso te juti i carcerati. Cossa xe che te fa fare sto tipo de volontariato del tuto particolare e singolare par na dona?"
"El xe on bisogno che sento dentro de mi, e, se no lo fasesse, sofrirìa". "Mama mia, come che ghe xe l''alpinismo estremo' cussì xe le robe che te fè ti!" "Eh si! Fasso tuto volentieri e sensa paura, sento na gran forsa che me juta a vìnzare ogni titubansa."
"El to lavoro in cossa consìstéo?" "Prima de tuto nel 'scoltare ste persone, parché le ga tanto bisogno che qualchedun le 'scolta, par sentirse manco sole. Le meto in contato, traverso la corispondensa, co i sui de fameja, parlo par lori co i avocati che i ga in man le cause, me intaresso parché i gabia la fotocopia de la cartela clìnica có i xe stai in ospedàe." "Te te torè on poche de ferie sti'istà?" "Sens'altro! Lujo e agosto li passarò in India, a Calcuta, ne l'orfanatrofio de Madre Teresa dove ghe xe 200 putèi e dove go conossùo Francesco, me fiolo adotivo. 'Ndaremo insieme: no vedo l'ora!" "'Assa che te diga queo che penso de ti: te si come na violeta, sconta in mezo l'erba, che fa sentire el so profumo a quanti che ghe passa vissin!" "Cossa dìsito, Maria Luisa!" "Quelo che xe giusto!"
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Lujo-Agosto:
Editoriale
Afrontemo l'istà senza paura
Stando a le prevision, ghè da métarse le man so i caveji: crisi incalzante, prezi a le stele, caldo tòrido, anziani a ris-cio. Ve basta?
de Mario Klein
|
