|
Feste e tradission
Chel luni de Pasqua
 |
| Na volta sistemà la tenda. |
Calche ano indrìo, che jero pi zóvine, gavevo un caro amigo de nome Benedetto, ma lo ciamàvimo Bene. El jera un tipo particolare, inteigente assè, tanto xe vero che ’l xe deventà professore universitario: el gera senpre drio studiare e el leseva un saco de libri. Penseve che par parlare ben l’inglese el conosseva e el cantava tute le canson de i Beatles e de i cantanti foresti de chei tenpi. El se gheva catà na morosa de orìgine indiana, del Montana, la se ciamava Alice, ma lu la ciamava "Alce Selvaggia".
Chel’ano, vissin a Pasqua, el me ga dimandà de ’ndare a fare na vacansa insieme: sarìssimo partìi el Vènare Santo e tornài la sera del dì de Pasqueta: destinassion Sotocastelo, vissin a Pieve de Cadore dove, so mama, la ’ndava in ferie ogni ano. Casa mia i gheva storto el naso, i diseva che no jera el caso de ’ndare a spèndare schei in giro pa ’l mondo, parché no senpre le robe ’ndava ben e bisognava ’vere giudissio, sparagnare par quando ghe sarìa stà momenti de magra. Alora se ragionava cussì, anca se lavorava za, ma casa mia i gheva senpre paura che podesse mancare calcossa e, vista l’insistensa de Bene, i me ga lassà sta pìcola sodisfassion. Me gavarìa dovudo tore un saco a pelo par dormire, ma par no fare spese fora via me so’ tolto sù na cuerta inbotìa da na piassa e mesa che jera nel casson in cantina.
Al vènare dopopranso, dopo èssare stà in cesa pa’ el Passio, se ghemo catà in stassion, sì parché semo ’ndài in treno, visto che nissun de i do ghévimo na strassa de màchina e ’ndare in prestio jera massa ris-cioso. Come disevo, a la stassion, Bene el me dise de tore sù la canadese, mi a go sùito pensà: "Varda ciò che gentile, el ga pensà anca a mi, lu el ga la indiana e a mi el me ga procurà la canadese!..." Invese, có ’l me ga messo in man un fagoto pesante assè, a go capìo che la jera la tenda dove dovévimo dormire chele tre note. El viajo el xe ’ndà ben, el treno el jera "la Vaca Mora", ’nte la linea Padova-Calalzo: Mora par via del fumo nero che la vaporiera lassava indrìo, visto che, in salita, la jera senpre soto sforso. Fra tossire, cantare e rìdare assè semo rivài a Sotocastelo; jera romai sera tardeto e da la stassion, pin-pianelo, semo ’ndai ne la casa dove la siora Jolanda, so mama de Bene, la vigneva a agosto de ogni ano a passare l’istà.
Chela note la ghemo passà in casa, al caldin e soto un cuerto de copi, visto che jera romai tardi e no se ghe vedeva proprio par gnente. Anca el giorno drio, stufi del viajo del dì prima e no ’vendo voja de fadigare, a semo restài a dormire in casa. Cussì el dì de Pasqua, miga se metévimo a lavorare par montare la tenda, e anca chela note la ghemo passà al cuerto. Al dì de Pasqueta però ghemo deciso de provare l’aventura ne la "canadese" e cussì, rente casa, nel prà che portava al bosco, se ghemo butà ne l’inpresa de montare la tenda: mi dento in zenocio dovevo tignere drito al paleto centrale fin che lori, par fora, i tirava le corde da na parte a st’altra. In chela posission, co i brassi pararia, me sentivo tanto un Totem, senpre par restare in tema de indiani, par via de "Alce Selvagia" che la diseva de intèndarse de tende e la dava órdini a tuti. Na volta sistemà la tenda me son messo a pareciare la griliata par disnare e, par èssare gentile, a go dimandà a la Alice par che ora doveva èssare pronto e ela, in clima indiano, la me risponde: "Par quando che ’l sole el xe alto", che voleva dire par mesodì. Par no fare bruta figura, visto anca che scuminsiava deventare nùvolo, me so’ dà da fare e, par le ùndese le bronse jera za pronte, le costesine in bela mostra col rosmarin e na sbiansada de ojo sora le spetava de èssare distiràe sora la gradèa. Par paura che ’l fogo el se smorsasse, a go fato sù raquante fassine de rame, rancurà nel bosco, e no me so’ acorto che le gheva ciapà fogo brusando tuto quelo che jera intorno. Intanto la Alice che la jera ’ndà in paese a fare i ùltimi aquisti, la xe rivà de corsa, vedendo chel po-po de falò, anca parché mi, co na cuerta, ghevo sercà de smorsare l’incendio e sensa saverlo a ghe go fato i segnài de fumo. Drio la Alice, vedendo chel fogaron, xe rivà anca Nane Balota, l’èbete del paese: i lo ciamava "Toro Seduto" parché l’èra senpre sentà co le ganbe icrosà su un mureto in piassa e parché da picenin el gheva robà la racolta de farfale in te la scola par ’vere i guseini da doparare ne le frece e fare pi colpo. Nane, se ’l te ciapa de bon ocio, el deventa un gran amigo e vedendo che ghevo brusà tuto, anca le costesine, el me dise de no ’vere paura che al pranso el ghe gavarìa pensà lu. Infati, dopo na sbrancà de minuti, el riva co un sesto pien de ogni ben de Dio, pomodori soto ojo, mortadela, sopressa, un salamin picante, un tòco de grana e un butilion de grinton, ghi ne jera in abondansa par tuti e ghemo fato na gran magnada.
Da chela situassion dolorosa a semo passài a na gran festa, dove, Nane Balota, deventà un caro amigo, el ne ga tirà fora da quelo che ’l sarìa deventà un triste "Luni de Pasqua"!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Che aria tira?
Da che mondo xe mondo, l’omo ’l ga senpre ’vùo el so cao de mato, ma ogni tanto el se ferma a vardare el disastro del so progresso
de Mario Klein
Salute
Mario Trivellato
cardiologo-spia a fin de ben
de Mario Galdiolo
|
