|
Da Rovigo
El formenton
 |
| E nantri putini a se butàvino dessora el mucio de formenton par snanararse come s’a fùssino al mare. |
A ghe jera, na olta, la màchina ca destregolava el formenton, za descartozà e mucià in te ’l sélese. La jera quela de Carleto Pozato. La vegnéa messa in mezo l’ara, arente al mucio de le panoce bianche e zale. A me ricordo che na olta tacà el motore che ’l spandeva odore de nafta tuto intorno, a ciapàvino el palon e po’ a ghe butàvino le panoce drento la inbocadóra e sta màchina la se sgoaratava tuta e la tacava a masenare: da la parte de drìo la butava fora i gran de formenton che ’l vegnéa destirà al sole in te ’l sélese e da la panza la butava fora i casteluni ch’i vegnéa portà drento la casteonara.
A laoro finìo, a jera belo védare tuto el sélese coèrto de gran de formenton, ca ne vegnéa le gratarìzole a caminarghe dessora a piè descalzi, zercando de parejare co i piè mote e buse par farlo goaìvo.
E có calava la sira, el formenton el vegnéa mucià-sù e coerto da quarturi incatramà e la matina drìo el vegnéa descoerto ancora par farlo secare, ogni tanto passàndoghe su e zo el rastrèo come a petenarlo, ca paréa che ’l cantasse da la contenteza.
E qualche ragazeto el dovéa senpre èssare presente col palon par parare via le gaìne, ca ghe ’ndava drento el sélese a magnarlo e sporcarlo.
Cussì par raquante giornate, fin quando che i gran i cantava.
E na olta secà, alora el vegnéa butà in alto col palon, a spàlio, in modo da mondarlo da la bula, instararlo e insacarlo.
E po, sachi in spala, el vegnéa portà drento in casa e mucià-sù in te na càmara co raquanti sachi pieni e ligà, missi de tajo uno sora l’altro in modo da fermare el mucio del formenton, tegnù in bona e al coèrto par vèndarlo al munaro quando che el prezo el se fasèa più alto.
E nantri putini a se butàvino dessora el mucio de formenton par snanararse come s’a fùssino al mare, co sti gran ca ne vegnéa drento la boca, zo par el colo e parfin drento le rece. I jera i ultimi salti de l’istà.
Intanto on sole né da mi e né da ti, el calava in te on tramonto rosso invasà e za a se sentiva par aria on frescheto che anca s’a te laoravi no te sudavi più come prima e da l’odore de ua fata za a te sentivi ca jera rivà l’autuno.
E dopo le giornate del vendemare, a bisognava loamare la tera e ararla par l’ano nuovo.
I muci del loame i fumava in mezo ai spròchi de formenton, driti in piè e co la ponta in tajo, sfalzinà da la messura, soto on zielo biso e scarno de luce e dapartuto a calava el silenzio de l’autuno: partìe le rondanine, sparìi i merli, mute le rane e i griji.
Anca l’orto, coaciàndose de le foje zale del figaro o de altri frutari, el se preparava co na coèrta de fumara al sono duro de giazo de l’inverno.
Ma el formenton, al coèrto e al sicuro da bestie, piova e intenperie, el ne dava la sicureza de la poènta bianca e zala par conpagnare renghe, scopetun, cafelate e bacalà par tuto l’inverno, e fin a la stajon de la vèrta quando che in canpagna, tra on piovalon e nantro de la primavera, a sbociava i trimi virdi del formenton novelo.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Poro dialeto!
Mai el gavarìa pensà de deventare el "tormentone" estivo. Xe bastà na proposta polìtica in quel de Roma, par descadenare on putiferio che el dialeto, ogni dialeto no ’l se meritava
de Mario Klein
Salute
Giornata del medico 2009
de Mario Galdiolo
Ciàcole visentine
Le zornade ìtalo-norvegesi de Sandrigo
La manifestassion de fine setenbre, che valoriza el bacalà, se farà par la prima volta sensa el so stòrico fondatore, l’av. Benetazzo
de Giordano Dellai
|
