|
Storie vènete poco conossude in triestin
El leon de San Marco
 |
| La colona col "melon" davanti al campanile e a la Catedrale de San Giusto, in te una imàgine del 1930. |
"Gigia, col borineto / a caminar xe un gusto;/ da brava, svelta, véstite / e vien con mi a San Giusto. / E là su quel mureto / se sentaremo arente; coi oci parlaremo / e co la boca gnente. / A Roma i ga San Piero, / Venezia ga el leon, / per noi ghe xe San Giusto / e ’l vecio suo Melon." (Parole de Felice di Giuseppe Venezian - Musica de Ernesto Luzzatto)
El "mureto" xe quel muro basso, costruido a sud-ovest, co le fondamenta su le muralie che costegia la via de la Catedrale, la strada che da la marina porta al Cole de San Giusto; el "melon" xe un globo de piera pozà su ’na colona in mezo del piazal e anca se el ga ’na vaga somilianza co un melon, el sta a significar la piera co la quale xe stà negà San Giusto; dessora xe conficada l’alabarda, segnacolo de la cità de Trieste. De là de la strada ghe xe el museo Lapidario, col tempieto del cenotafio de l’archeologo Winckelmann (Giovanni Winckelmann, 1717-1768, archeologo tedesco operativo a Roma presso el card. Albani; assassinado a Trieste) e co tante testimonianze romane e sul muro esterno la lapide, indove xe incisa la poesia del Carducci "Saluto italico", che termina co l’invito a zigar "Italia, Italia, Italia".
Ma el Stato italian qualche volta el se ga dimenticado i enormi sacrifici che se ga fato per èsser tacài a ste tere orientali. Per restar sul tema de l’iredentismo, per el quale se ga dà tanto da far l’inventor del termine "terre irredente", el garibaldin napoletan Matteo Renato Imbriani, e metendo da parte le visioni estreme, come quela de Guglielmo Oberdan, proprio ’desso che xe nato el problema de trovar el modo mèjo per ricordar i 150 ani de l’Unità d’Italia (nel 2011), se pol andar col pensier al 1866, anca se saremo oltre la data che dovemo celebrar.
Sùbito dopo la guera contro l’Austria, Vittorio Emanuele II, aleado co la Prussia che la gaveva vinto a Sadowa, mentre lu gaveva patido do sconfite, la batalia campale de Custoza e quela navale de Lissa (l’ùnica vitoria gaverìa podudo vignir da Garibaldi che ’l stava avanzando nel Trentino e che inveze el ga obedido a l’òrdine regale de fermarse) el se ga pensà ’na roba stramba sto "re Galantuomo" (tuti i re doverìa èsser galantomini, ma cussì lo gaveva ciamado el papa Pio IX nel ricordo fùnebre del 1978), el ghe fa rivar a l’imperator Francesco Giuseppe ’na proposta de alearse insieme co la Francia contro la Prussia, con la promessa del Trentino a l’Italia; quando dise queste cose al gen. austriaco Mohring l’agiungi: "La sola cosa che mi dà veramente piacere è di fare la guerra." El gaveva apena ricevù Venezia in compenso de aver aiutado Bismark, ma xe stà quasi un sgarbo in quanto i Prussiani ghe la cedi ai Francesi e questi la rende a l’Italia. Naturalmente Ceco Bepe no aceta.
Per quanto riguarda el leon alato de San Marco, andemo più lontan nel tempo e propio al 1379, cò Vettor Pisani, che l’ano prima el gaveva sconfito ’na squadra genovese nel Tirreno, adesso inveze el vien batù, lu e el proveditor Michele Steno, al largo de Pola da Luciano Doria. Sùbito dopo l’intenzion de i Genovesi xe de ciapar Venezia, e dopo de aver investido Grado e Caorle, ’na armata de quarantasete navi guidada da Pietro Doria òcupa Sottomarina, assedia e conquista Chioggia. Xe un bruto momento per Venezia che la ga tuti contro: Padova co Francesco da Carrara, el re d’Ungherìa, el duca d’Austria, el Patriarca d’Aquileia, che i se strensi in una lega. La pol contar solo su l’aleanza del re de Cipro e de i Visconti de Milano. Durante una de le scorerìe de i Genovesi xe stada portada via da la tore centrale del porto de Trieste el leon de piera de San Marco che i Veneziani durante i ùndise ani de dominio i gaveva messo là, costruendo anca un altro castel de difesa, ciamà Amarina, del quale no se sa la posizion. Ancora ’desso sto leon el se trova a Genova, su la fazada del palazzo Giustiniano.
Co la dura notizia de la caduta de Chioggia in man de i Genovesi, Venezia se dà ’na scossa: notabili e popolo i se riunissi in te la cesa de San Marco, i decidi nove legi urgenti, vien richieste enormi oferte, tali da ridur in povertà anca i più richi, vien liberà Vettor Pisani, condanado per la scofita de Pola, vien preparade disdoto galere, che vien messe al comando de un straordinario capitano, Carlo Zen. Sto qua, dopo la liberazion de Loreo, de Sottomarina e de Brondolo, el espugna Chioggia, che vien ocupada dal doge Andrea Contarini, co un botino de disnove galere e 4.500 prigionieri. L’ano dopo, co la pase de Torino, garantida da Amedeo di Savoia, el Conte Verde, Venezia scominzierà a riprènderse e conserverà la su indipendenza ancora per quatro secoli; Sottomarina, la Chioggia minore, fiorente centro de agricoltori e religiosi, investida e distruta da le guere, la resterà "brulla e deserta" per voler del Senato vèneto fin al XVII sècolo.
A tute le inumerevoli "Gigie" de sto mondo, che le ga portado ’vanti, e le lo sta fazendo anca ’desso, i valori de la convivenza civile e de la fameja, una ideale medaja d’oro e un abracio.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
On laoro qualunque...
par sbarcare el lunario
Par come xe drio ’ndare le robe, tanti òmeni e tante done i se xe catà a spasso.
Cussì ’desso va ben anca laori che prima ghe faséa schifo
de Mario Klein
Teatro e Teatri
Curiosità storiche del Teatro padovan
de Piero De Franceschi
Da Verona
La sena de pesse
de Giacinta Dall'Ora
|
